Human sa Gugma, Unsa man Dayon?

Ni Presidente Dieter F. Uchtdorf

Ikaduhang Magtatambag sa Unang Kapangulohan

Ang atong pinalanggang propeta, si Presidente Thomas S. Monson, nagtudlo nga “ang gugma mao ang labing mahinungdanon sa ebanghelyo.”¹

Ang gugma importante kaayo nga si Jesus mitawag niini nga “daku ug unang sugo” ug miingon nga ang matag laing tipik sa balaod ug mga pulong sa mga propeta nalakip niini.²

Ang gugma mao ang sentro nga motibo alang sa tanan natong gibuhat sa Simbahan. Matag programa, matag miting, matag lihok nga kita nahimong kabahin isip disipulo ni Jesukristo kinahanglang maggikan niining hiyas—tungod kay kon walay gugma nga putli, “ang tiunay nga gugma ni Kristo,” kita walay kapuslanan.³

Sa higayon nga atong masabtan kini sa atong hunahuna ug kasingkasing, sa higayon nga atong ipahayag ang atong gugma alang sa Dios ug sa atong isigka tawo—unsa man dayon?

Igo na ba ang pagbati og kapuangod ug gugma alang sa uban? Ang pagpahayag ba sa atong gugma alang sa Dios ug sa atong silingan nakatagbaw sa atong obligasyon ngadto sa Dios?

Ang Sambingay sa Duha ka Anak nga mga Lalaki

Didto sa templo sa Jerusalem, ang punuang mga pari ug mga anciano sa mga Hudeo miduol ni Jesus aron mapangitaan Siya og sayop sa Iyang mga pulong. Ang Manluluwas, hinoon, mibali sa sitwasyon batok kanila pinaagi sa pagsugilon og usa ka istorya.

“Usa ka tawo may duha ka anak nga lalaki,” Siya misugod. Ang amahan miadto sa usa ug mihangyo kaniya nga lakaw trabaho sa parrasan. Apan ang anak mibalibad. Sa kaulahian kana nga anak “nagbasul, ug miadto.”

Dayon ang amahan miadto sa iyang ikaduhang anak ug mihangyo kaniya nga lakaw trabaho sa parrasan. Ang ikaduha nga anak misiguro kaniya nga siya moadto, apan wala gayud siya moadto.

Dayon ang Manluluwas miatubang ngadto sa mga pari ug mga anciano ug nangutana, “Hain man niining duruha ang nagtuman sa kabubut-on sa iyang amahan?”

Sila miangkon nga kadtong unang anak—ang usa nga miingon nga dili siya moadto apan sa kaulahian nagbasul ug mitrabaho sa parrasan.⁴

Ang Manluluwas migamit niini nga istorya aron sa paghatag og empasis sa kaimportante sa baruganan—kadtong nagsunod sa mga kasugoan mao ang tinuoray nga nahigugma sa Dios.

Tingali mao kini hinungdan nga si Jesus naghangyo sa mga tawo sa pagpaminaw ug pagsunod sa mga pulong sa mga Fariseo ug mga escriba apan dili buhaton ang ilang ginabuhat.⁵ Kining mga relihiyusong magtutudlo wala magbuhat sa ilang gipanulti. Ganahan silang mag-istorya mahitungod sa relihiyon, apan subo lang nga nasipyat sila sa kamahinungdanon niini.

Mga Lihok ug Atong Kaluwasan

Usa sa katapusang mga leksyon sa Manluluwas ngadto sa Iyang mga disipulo, namulong Siya ngadto nila bahin sa katapusang Paghukom. Ang mga dautan ug mga matarung pagalainon. Ang maayo makapanunod sa kinabuhing dayon; ang dautan dad-on ngadto sa mahangturon nga silot.

Unsa ang kalainan tali niining duha ka grupo?

Kadtong mipakita sa ilang gugma pinaagi sa lihok maluwas. Kadtong wala ipanghimaraut.⁶ Ang tinuod nga pagkakabig sa ebanghelyo ni Jesukristo ug sa mga mithi niini ug mga baruganan masaksihan pinaagi sa atong mga lihok diha sa atong inadlaw-adlaw nga mga kinabuhi.

Sa katapusan, ang taphaw nga pagpahayag sa gugma sa Dios ug sa isig katawo dili mokwalipay nato sa kahimayaan. Tungod kay, sumala sa gitudlo ni Jesus, “dili tanang magaingon kanako, Ginoo, Ginoo, makasulod sa gingharian sa langit; kondili ang nagatuman sa kabubut-on sa akong Amahan nga anaa sa langit.”⁷

Unsa ang Sunod human sa Gugma?

Ang tubag sa pangutana nga “Human sa gugma, unsa man dayon?” mahimong yano ra ug pintok. Kon kita tinuoray nga nahigugma sa Manluluwas, atong idap-ig ang atong mga kasingkasing ngadto Kaniya ug dayon maglakaw kita sa dalan sa pagkadisipulo. Kon kita nahigugma sa Dios, manlimbasug kita sa pagtuman sa Iyang mga sugo.⁸

Kon kita tinuoray nga nahigugma sa atong isigkatawo, ipaabut nato ang atong mga kaugalingon aron tabangan “ang kabus ug ang timawa, ang masakiton ug ang nag-antus.”⁹ Tungod kay sila kinsa mobuhat niining dili hinakog nga buhat sa kapuangod ug serbisyo,¹⁰ ang sama mao ang mga disipulo ni Jesuskristo.

Mao kini ang moabut human sa gugma.

Mao kini ang kahulugan sa ebanghelyo ni Jesukristo.