Mga Tubag gikan sa mga Lider sa Simbahan
Unsaon sa Pagpakita og Kamapasalamaton
Ni Elder Robert D. Hales
Sa Korum sa Napulog Duha ka mga Apostoles
Gikan sa pakigpulong sa kinatibuk-ang komperensya sa Abril 1992.
Ang akong kinalawman nga pagpasalamat mao ang maulaon nga sakripisyo sa atong Ginoo ug Manluluwas, nga si Jesukristo. Ang Pag-ula mao ang pundasyon diin nagbase ang tanang kamatuoran sa ebanghelyo. …
Ang kamapasalamaton mao ang usa ka kahimtang sa pagpasalamat, usa ka buhat sa paghatag og pasalamat, diin nakapahimo kanatong mapainubsanon tungod kay atong giila ang buhat sa kamabination, serbisyo, o pag-amuma gikan sa laing tawo nga nagbayaw ug naglig-on kanato.
Ang pagkadili mapasalamaton mao ang usa ka kinaiya sa walay pagpakabana o pag-ila kon ang usa ka tawo miabag o mitabang nato o, gani ang mas grabe, kon kahibalo kita nga gitabangan ug wala nagpasalamat sa pribado o sa dayag nga paagi.
Sa laing paagi, ang pagpadayag ug mga pagbati sa pagpasalamat adunay maanindot kaayong makalimpyo ug makaayo nga kinaiyahan. Ang pagkamapasalamaton makahatag og samang kamainiton ngadto sa tighatag ug sa tigdawat.
Ang gipadayag nga pasalamat ngadto sa atong Langitnong Amahan diha sa pag-ampo makahatag og makapakalma nga kalinaw—ang kalinaw nga nagtugot kanato nga dili mahugawan ang atong mga kalag tungod sa unsay wala nato maangkon. Ang kamapasalamaton maghatud og kalinaw nga makatabang nato sa pagbuntog sa kasakit sa kalisdanan ug kapakyasan. Ang kamapasalamaton sa inadlaw-adlaw nagpasabut nga atong ipadayag ang pagpasalamat sa unsay atong naangkon karon nga dili igsapayan kon unsay anaa kanato sa nangagi o gitinguha sa umaabut. Ang pag-ila ug ang pagpasalamat alang sa atong mga gasa ug mga talento nga nagtugot usab kanato sa pag-ila sa panginahanglan og tabang gikan sa mga gasa ug mga talento nga anaa sa uban.
Ang pagpasalamat usa ka balaanon nga baruganan:
“Kamo mopasalamat sa Ginoo nga inyong Dios sa tanan nga mga butang.” (D&P 59:7).
Kini nga kasulatan nagpasabut nga atong ipadayag ang pagkamapasalamaton alang sa unsay nahitabo, dili lang sa mga maayong butang sa kinabuhi apan alang usab sa oposisyon ug mga hagit sa kinabuhi nga nagdugang sa atong kasinatian ug hugot nga pagtuo. Atong ibutang ang atong mga kinabuhi sa Iyang mga kamot, mag-amgo nga ang tanang panghitabo mahimong alang sa atong kasinatian.
Kon mag-ampo atong litukon nga, “ang Imong pagbuot maoy matuman,” kita mipadayag gayud sa atong pagtuo ug pasalamat ug miangkon nga atong dawaton ang bisan unsay mahitabo sa atong mga kinabuhi.
Hinaut atong mabati ang tinuod nga pagpasalamat alang sa kaayo sa Dios alang sa tanang mga panalangin nga nahatag ngari kanato ug ipadayag kadto nga mga pagbati sa pagkamapasalamaton diha sa pag-ampo ngadto sa atong Langitnong Amahan.