“Nagpundok nga naghiusa diha sa Akong Ngalan”
Ang tagsulat nagpuyo sa California, USA.
Gisangunan sa Ginoo ang mga ward ug branch council aron sa pagtabang nato nga mangalagad diha sa gugma ug panaghiusa.
Mga paghulagway pinaagi ni Julie Rogers
Dili pa lang dugay mitambong ko og family home evening uban sa usa ka pamilya nga gimahal nako pag-ayo: usa ka batan-ong bana ug asawa ug sa ilang gamayng anak nga babaye. Isip ilang bishop miadto ko sa ilang balay tungod sa pag-aghat gikan sa Espiritu ug sa pag-aghat gikan sa nagpakabana nga inahan ug igsoong babaye niining batan-ong amahan, kinsa diha usab. Ang Ginoo mitabang niining pamilya aron makahimo og dagkong kausaban sa ilang kinabuhi ug mopabalik kanila ngadto sa mga panalangin sa ebanghelyo ug sa Simbahan. Apan dunay nahitabo nianang adlawa.
Sulod sa pipila ka bulan kining batan-ong amahan nabalaka gayud bahin sa pagsangkap alang sa iyang pamilya. Ang iyang panarbaho gilauman nga motapos na sa dili madugay, ug siya ug ang iyang asawa anaa sa tunga-tunga sa pagdesisyon kon balhinon ba ang ilang pamilya sa laing estado. Nagpasabut kana og grabe nga kausaban alang sa pamilya. Sa sayo nianang adlawa nahibaloan niini nga amahan nga ang gipaabut gayud nga makatabang sa pinansyal dili moabut; hilabihan gayud kadto ka makapasagmuyo nga balita.
Sa pag-abut nako sa ilang apartment, nakita nako ang grabe nga kasagmuyo sa iyang nawong. Ang responsibilidad sa pagsangkap alang sa pamilya ug wala damha nga balita nakahatag og dakong problema niining batan-ong- amahan.
Ang iyang asawa mipili og usa ka kapitulo sa kasulatan alang sa leksyon nga motubag sa ilang mga problema sa pagbati nga nabug-atan. Gibasa sa amahan ang tibuok kapitulo. Mahibaloan tingali ninyo kining mga pulong gikan sa Isaias 55:
“Ang tagsa-tagsa nga ginauhaw, umari kamo sa mga tubig, ug siya nga walay salapi; umari kamo, pumalit, ug kumaon; oo, umari kamo, palit … sa walay salapi ug sa walay bili. …
“Kay ang akong mga hunahuna dili mao ang inyong mga hunahuna, ni ang inyong mga dalan akong mga dalan, nagaingon ang Ginoo” (mga bersikulo 1, 8).
Ug dayon gihisgutan sa pamilya kon unsay kahulugan niadtong mga bersikulo ngadto kanila. Ang Espiritu sa Ginoo mipuno nianang gamayng apartment samtang kini nga family home evening nahimong usa ka family council. Kining batan-ong amahan mipakigbahin sa iyang mga kahadlok ug mga kabalaka ug mga tinguha, ug mipakigbahin ang tanan sa ilang gugma ug pagpakabana alang sa usag usa. Nag-istoryahanay sila kon unsay buhaton, kon unsa ang ilang mga opsyon, unsa nga mga aksyon ang pagahimoon.
Usa kini ka panaghisgutan alang sa tanan. Dunay pipila ka panagsumpaki. Gibati nako nga maminaw lang ug mag-obserbar. Sa katapusan, diha sa panaghiusa ang bana ug asawa determinado nga kinahanglan sila nga dungan nga mohimo sa desisyon uban sa Ginoo pinaagi sa pag-ampo. Mihalad dayon ko og mga pulong sa pagsuporta ug pag-awhag.
Ang Sumbanan sa Ginoo bahin sa Pagpadayag
Makahinumdom ko og pipila lang ka higayon nga naila nako ang Espiritu sa Ginoo nga mas lig-on kay sa nianang gamay nga apartment nianang gabhiona uban nianang mapainubsanon, nanlimbasug nga pamilya. Usa kadto ka katumanan sa saad sa Ginoo nga gihatag ngadto sa Iyang mga disipulo sa dugay nang panahon kaniadto: “Diin duha o tulo nagpundok nga naghiusa diha sa akong ngalan, nga naghisgot sa usa ka butang, tan-awa, Ako anaa diha sa taliwala kanila—gani sama nga Ako anaa diha sa taliwala kaninyo” (D&P 6:32).
Kadto nga mga pulong gikan sa Manluluwas dili lamang maayo nga tambag o mga pulong lamang sa paghupay. Alang sa batan-ong propeta nga si Joseph Smith ug Oliver Cowdery, kadtong mga pulong sa Manluluwas nagtakda sa doktrina ug sumbanan sa pagbaton og pinadayag ug giya ug sa paghimo og mga desisyon diha sa gingharian sa Dios.
Ang Ginoo diha sa taliwala sa family council nianang gabhiona. Ilang gidapit ang iyang Espiritu pinaagi sa pag-ampo ug pagtuon sa kasulatan. Nagkahiusa sila sa usa ka katuyoan. Napuno sila sa gugma alang sa usag usa. Gidala nila ang ilang pinakamaayo nga mga ideya ug mga kasinatian ug gipahayag kini sa atubangan sa usag usa ug sa atubangan sa Ginoo ug nangayo alang sa Iyang giya. Naghiusa sila nga mihimo og mga desisyon ug dayon milihok.
Ang Simbahan Gidumala pinaagi sa mga Council
Ang handbook sa Simbahan nagtudlo sa doktrina bahin sa mga council:
“Ang Simbahan sa Ginoo gidumala pinaagi sa mga council diha sa kinatibuk-an, area, stake, ug mga ward level. Kining mga council mahinungdanon sa kahapsay sa Simbahan.
“Ubos sa mga yawe sa pagpangulo sa priesthood sa matag level, magtinambagay ang mga lider alang sa kaayohan sa mga indibidwal ug mga pamilya.”1
Sa tanang level niini nga Simbahan, naningkamot kita nga molihok pinaagi niadtong sama nga mga baruganan nga gitudlo sa Manluluwas sa Iyang mga disipulo ug nila ni Oliver ug Joseph—nga magpundok diha sa panaghiusa ug sa council.
Ang matag ward dunay ward council nga “naglakip sa bishopric, ward clerk, ward executive secretary, high priests group leader, elders quorum president, ward mission leader, ug mga presidente sa Relief Society, Young Men, Young Women, Primary, ug Sunday School.”2
Tanang buhat nga gihimo niining grupo sa mga lider sa ward sa katapusan nagtutok sa pagtabang sa “mga indibidwal nga malig-on ang mga pagpamatuod, makadawat og makaluwas nga mga ordinansa, makatuman sa mga pakigsaad, ug mahimong mapahinunguron nga mga sumusunod ni Jesukristo.”3
Tingali nadungog na ninyo ang pamahayag nga “Adunay kasiguroan diha sa tambag.”4 Ngano man? Usa sa mga rason mao ang yano nga kamatuoran nga walay usa kanato nga ingon ka utokan kay sa daghan kanato nga naghiusa. Ang matag usa kanato nagdala og talagsaong panglantaw ug hugpong sa mga kasinatian ug mga ideya.
Ang handbook sa Simbahan nagtudlo usab kon sa unsang paagi nga ang mga miting sa ward council mahimong labing epektibo sa paglakip sa talagsaong mga panglantaw sa matag sakop sa council: “Atol sa miting, ipasabut sa bishop ang matag butang nga ikonsiderar, pero kasagaran dili modesisyon kon unsaon pagsulbad sa butang hangtud nga madungog niya ang panaghisgutan. Moawhag siya og panaghisgutan nga dili modominar niini. Mangutana siya ug mahimong mohangyo sa partikular nga mga sakop sa council alang sa ilang mga sugyot. Maminaw siya og maayo sa dili pa mohimo og desisyon. Kini nga mga panaghisgutan kinahanglang moawhag og diwa sa pagdasig.”5
Sa ato pa, dad-on nato ang atong talagsaong mga talento ug mga abilidad ug mga panglantaw. Mangamuyo kita sa Ginoo nga magauban kanato, nga mogiya kanato pinaagi sa Iyang Espiritu, nga maoy mohatag sa bugti sa unsay kulang nato, ug aron masayud sa mga panginahanglan sa mga miyembro nga atong giserbisyuhan. Atong hisgutan ang mga panginahanglan sa mga pamilya ug mga indibidwal ug maningkamot nga makahimo og mga desisyon nga maghiusa. Dayon motrabaho kita ug mohangyo sa Ginoo sa pagpanalangin sa mga miyembro sa ward.
Magtinambagay diha sa Ward Council
Walo ka bulan sa wala pa ko motambong nianang home evening uban nianang bag-o pa nga pamilya, ang ward council nagtigum usa ka Dominggo sa buntag. Gisugdan namo pinaagi sa pag-ampo ug mitan-aw og video bahin sa pagtabang sa mga indibidwal ug mga pamilya nga makadawat og mga panalangin ug mga ordinansa sa ebanghelyo. Akong gipangutana ang mga sakop sa council kon duna ba silay nahunahunaan samtang nagtan-aw mi sa video. Miresulta kini sa panaghisgutan bahin niini nga pamilya. Among gipahayag ang among gugma alang kanila. Naghisgot mi bahin sa posible nga mga calling, kon unsaon namo sa pagtabang ang amahan nga maordinahan ngadto sa Melchizedek Priesthood, ug unsaon namo sa pagtabang ang magtiayon aron makadawat sa mga ordinansa sa templo.
Isip bishop mihimo ko og pipila ka mga assignment. Morag hapit na mahuman ang panaghisgutan, pero dunay butang nga morag dili husto. Ang presidente sa Young Women maoy miingon sa katapusan, “Siguro paspas ra kaayo kita. Gibati nako nga kinahanglan kitang motutok sa sukaranang mga butang uban nila, sama sa family home evening ug pagtuon sa kasulatan ug pag-ampo.” Dayon kanang “dili kaayo husto” nga pagbati nawala. Namulong siya, dili alang sa organisasyon sa Young Women, pero tungod sa gugma alang niining pamilya, ug nianang higayuna ang Espiritu misaksi ngari namo bahin sa kamatuoran sa iyang tambag.
Ang komentaryo niini nga sister miabli og balik sa panaghisgutan. Naghisgot mi kon unsaon pagtabang sa pamilya sa pagpalambo og sumbanan sa pagtuon sa kasulatan, pag-ampo, ug home evening. Ang igsoong babaye sa batan-ong amahan nagserbisyo isip usa sa among mga ward missionary, mao nga gikuha sa ward mission leader ang assignment nga makigtambayayong niya ug sa mga home teacher aron mapasiugdahan ang regular nga mga family home evening. Ang akong asawa ug ako mihatud og kopya sa kapanguhaang basahon nga Family Home Evening ug usa ka hymnbook ngadto sa ilang balay.
Ang kanunayng suporta ug kalig-on nagagikan sa inahan ug sa igsoong babaye niining batan-ong amahan samtang makanunayon silang mitambong sa family home evening uban sa pamilya, nga sa katapusan miresulta nianang importante nga gabii sa pamilya nga duna koy pribilehiyo nga makatambong.
Ang handbook namahayag: “Ang mga lalaki ug mga babaye kinahanglang mobati nga ang ilang mga komentaryo gihatagan og bili isip hingpit nga partisipante. … Ang opinyon sa mga babaye usahay lahi nianang sa mga lalaki, ug kini makadugang sa importante nga panglantaw sa pagsabut ug pagtubag sa mga panginahanglan sa mga miyembro.”6 Isip batan-on nga bishop naglingkod ko sa council uban sa mga presidente sa Primary, Young Women, ug Relief Society kinsa dunay dugang pa nga kaalam ug kasinatian sa kinabuhi ug ideya kay kanako. Sa kasagaran sila ang akong mga magtutudlo sa Kristohanong kinaiya ug bisan gani kon unsaon nga mahimong usa ka maayong amahan ug naghupot sa priesthood.
Mapasalamaton kaayo ko sa kababayen-an niini nga Simbahan. Hinaut nga ang atong mga sister wala gayud mobati nga wala paminawa o gibaliwala diha sa atong mga miting sa council. Ang mga sakop sa ward council naglihok isip magkapareha. Ang mga yawe sa kapangulohan nga gihatag ngadto sa bishop usa ka butang alang sa kahapsay, pag-organisar, ug gisangun nga responsibilidad pero dili gayud usa ka gimbuhaton nga modominar o pagkalabaw sa espiritwal.
Panaghiusa
Ang handbook naghulagway sa kaimportante sa panaghiusa: “Human sa panaghisgutan sa tanan, ang bishop mahimong mohimo og desisyon, o mahimo siyang maghulat nga hisgutan pa ang butang uban sa iyang mga counselor. Human siya makahimo og desisyon, ang mga sakop sa council kinahanglang mosuporta niini sa diwa sa panaghiusa ug panag-uyon.
“Kon ang mga sakop sa council wala makasabut bahin sa usa ka importante nga desisyon, ang bishop mahimong maghulat og laing miting sa council aron makonsiderar pa ang butang ug magtinguha og espirituhanong panghimatuod ug panaghiusa.”7
Ang panaghiusa laing rason nga dunay kasiguroan diha sa mga council. Usahay isip mga indibidwal maghunahuna kita nga nasayud kita kon unsay aksyon nga angayang buhaton, ug kasagaran gusto kitang modiretso dayon sa resulta. Nakalimot kita nga ang katapusang tumong sa Ginoo wala sa atong pagpalambo og plano sa paglihok. Kini mao nga ang matag usa sa Iyang mga anak makaila Kaniya. Nahinumduman ninyo kon giunsa sa Ginoo pag-ampo alang sa Iyang mga disipulo:
“Ug ang kinabuhing dayon mao kini, ang ilang pagpakaila kanimo nga mao ang bugtong tinuod nga Dios, ug kang Jesukristo, nga imong pinadala. …
“Ako nangamuyo alang kanila: wala ako mangamuyo alang sa kalibutan, kondili hinoon alang kanila nga imong gikatugyan kanako; kay sila mga imo man. …
“… Amahan nga Balaan, bantayi sila pinaagi sa imong ngalan nga gihatag mo kanako, aron sila mausa, maingon nga kita usa. …
“Ako anaa kanila, ug ikaw ania kanako, aron sila mamahingpit nga usa” (Juan 17:3, 9, 11, 23).
Ang tumong sa Ginoo mao nga kita mahimo nga Iya—nga kita mausa ngadto Kaniya, uban sa atong Langitnong Amahan, ug uban sa usag usa. Ang proseso sama ra ka importante sa resulta. Ang mga council kabahin sa balaanong gitudlo nga proseso diin ang panaghiusa maangkon ug diin mahimo kita nga Iya ni Kristo. Ang Ginoo namahayag, “Paghiusa; ug kon kamo dili magkahiusa kamo dili akò” (D&P 38:27).
Kana nga sugo mahimo usab nga usa ka pagsulay. Pananglitan, ang Ginoo mahimong mamahayag sa laing paagi, “Pinaagi niini kamo masayud nga kamo akò, kon magkahiusa kamo sa usag usa ug makighiusa kanako.”
Ang amahan sa pamilya mahimong makadawat og pinadayag nga ang pagbalhin sa pamilya magdala og mga panalangin ug panaghiusa. Pero kon wala ang pakighiusa sa iyang asawa ug mga anak, ang iyang plano mahimong dili magdala sa gilauman nga mga resulta.
Ang bishop mahimong makadawat og pinadayag alang sa ward mission plan, pero gawas kon ang ward council magkahiusa uban niana nga pinadayag, ang mga panalangin dili moabut, ug ang bishop mobati nga maghunahuna kon unsay nahimong sayop.
Dinhi gihulagway ni Presidente Russell M. Nelson, Presidente sa Korum sa Napulog Duha ka mga Apostoles, kon sa unsang paagiha maglihok ang Konseho sa Unang Kapangulohan ug Korum sa Napulog Duha ka mga Apostoles:
“Ang tawag sa 15 ka lalaki ngadto sa balaang pagka-apostol naghatag og dakong panalipod kanato isip mga miyembro sa Simbahan. Ngano man? Kay ang mga desisyon niining mga lider kinahanglang magkauyon. Hunahunaa lang unsaon sa Espiritu pagtandog sa 15 ka lalaki aron magkauyon? Kining 15 ka lalaki dunay lainlaing background sa edukasyon ug propesyon, nga nagkalahi og opinyon sa daghang butang. Tuo lang nako! Kining 15 ka lalaki—mga propeta, manalagna, ug tigpadayag—nasayud unsay kabubut-on sa Ginoo kon magkauyon na!”8
Mosaksi ko nga ang Ginoo interesado sa mga detalye sa atong indibidwal nga kinabuhi. Natingala gyud ko kon unsa kaandam ang Manluluwas sa pagtabang, o sa pagpadala sa usa sa Iyang mga sulugoon, sa pagluwas sa usa sa Iyang mga anak. Mapasalamaton kaayo ko alang sa mga council nga gisangunan sa responsibilidad sa pag-amuma sa mga anak sa Langitnong Amahan.