Atong Luna
Nakita sa Dios ang Akong mga Kaguol
Ni Danelys W. Rodriguéz, Dominican Republic
Usa ka Dominggo sa simbahan akong naamguhan nga ang akong panahon nga sakop ko sa Young Women program hapit na mahuman ug sa dili madugay masakop na ko sa young single adults. Naguol ko tungod kay nahibalo ko nga dili na parehas ang tanan. Pagkahuman sa Sunday School, naningkamot ko nga magmadasigon, apan dili nako mahimo. Gisulayan nako og sulti ang akong kaugalingon nga dili gusto ang akong Langitnong Amahan nga mobati ko og kaguol apan malipay hinoon (tan-awa sa 2 Nephi 2:25).
Mohilak na unta ko diha sa abaga sa akong higala diha sa hawanan dihang ang ward clerk miduol nako ug miingon, “Sister Danelys, aniay sulat!” Gitunol niya sa akoa ang puti nga sobre nga akoa rang ngalan ang anaa. Kuryuso kaayo ko nga mahibalo bahin niini, mao nga nangutana ko sa clerk kon kinsay nagpadala niini. Dihang milakaw siya, miingon siya nga gikan sa patriarch ug kopya kadto sa akong patriyarkal nga panalangin. Nakahilak ko, apan luha kadto sa kalipay tungod kay nahibalo ko nga ang Dios nakakita sa akong mga kaguol ug gihatagan ko og paagi aron makaplagan nako ang kalipay atol sa akong mga kaguol. Ang akong patriyarkal nga panalangin miabut ra sa katapusan, sa tukmang panahon nga kini akong gikinahanglan.
Dihang miuli ko og gibasa kini, nakahilak na sad ko ug nagpasalamat niini sa Dios ug sa pagtabang nako nga mahinumdom sa akong pagkabulahan nga mahimo Niyang anak ug anaa kanako ang kahayag sa walay katapusang ebanghelyo sa akong kinabuhi.
Dihang miabut ang subo nga mga panahon, bisan kon niadtong mga higayuna wala pa nako masabti, nasayud ko nga ang Dios mitabang nako sa pagkaplag og kalipay. Kini akong nahibaloan pinaagi sa gugma nga gitanyag sa Dios kanako sa akong kinabuhi. Iyang gitanyag kini nga gugma sa matag usa kanato, ug anaa sa sulod kanato ang pagdawat niining talagsaong pagbati. Mabuntog nato ang mga pagsulay uban sa giya sa Dios. Mahimo ra kitang mopahiyom ug magmalipayon.
Paghulagway pinaagi ni Ben Simonsen
Ang Akong Paborito nga Kasulatan
Ni Kwamena Koomson, Ghana
Kini nga kasulatan nakatabang nako sa pagsabut nga pinaagi lamang sa pagtutok sa atong kinabuhi ngadto kang Jesukristo mabuntog nato ang kaaway. Bisan og ang mga pagsulay moabut kanato, kon kita natukod sa bato ni Jesukristo, ang tanang butang posible.
Kini nga kasulatan nakatabang nako nga magpabiling lig-on atol sa mahagiton nga mga panahon.
Nasayud ko nga buhi ang Dios ug gipadala Niya ang Iyang Bugtong Anak nganhi sa yuta sa pagtubos sa mga sala sa katawhan.