Ang Atong mga Panimalay, Ang Atong mga Pamilya
Nagpaabut og Kaluha, Nakakaplag og mga Milagro
Ang tagsulat nagpuyo sa Pilipinas.
Nagtuo mi nga ang tanan sa among kinabuhi hapsay ra, apan sa wala madugay ang kinabuhi nahimong komplikado ug nahadlok ko kon unsa pay moabut nga dili maayo.
Usa ka gabii nagtan-aw ko sa balita, dunay nakadani sa akong pagtagad. Akong nailhan ang reporter nga classmate nako sa college. Nakab-ot niya ang iyang damgo nga mahimong usa ka newscaster!
“Ako diay?” Nangutana ko sa akong kaugalingon. “Unsay akong nakab-ot?” Gitan-aw nako ang masuso nga natulog sa akong mga bukton ug naghunahuna sa mga panghitabo sa milabayng tulo ka tuig.
Kanunay kong naghunahuna nga duna koy trabaho, apan sa dihang ang akong bana, nga si Charles, ug ako nakaanak sa among unang anak nga babaye, nga si Chevy, ang akong mga prayoridad nausab. Mihunong ko sa akong trabaho aron sa pag-atiman kaniya. Kami dunay pagtuo ni Jesukristo nga kon mobayad lang mi sa among ikapulo ug mosunod sa mga sugo, OK ra ang tanan.
Maayo ra ang tanan hangtud, usa ka adlaw, si Charles nataktak sa trabaho. Duna mi pagtuo nga maayo ra ang tanan, apan kinahanglan mi nga molihok. Nakahukom mi nga kinahanglan usab nga motrabaho ko, mao nga si Charles ug ako nagsugod sa pagpangita og trabaho. Human sa pipila ka semana, nakasulod ko og trabaho sa call center. Dili ko ganahan nga biyaan ang akong siyam ka bulan nga anak uban sa yaya kada adlaw, apan mao kadto ang among labing maayong solusyon.
Mga usa ka bulan sa akong trabaho, akong nahibaloan nga ako mabdos. Maayo gani, nakakita na og trabaho si Charles. Dili kaayo dako ang suweldo, apan makatabang na kini. Sa makadiyot gibati namo nga nahupay.
Lisud kaayo ang akong pagmabdos, ug kinahanglan kong moundang sa akong trabaho. Sa akong binulan nga checkup, nakugang mi nga kaluha ang akong gimabdos. Si Charles ug ako nahadlok, apan misalig mi sa Langitnong Amahan.
Mga tulo ug tunga ka bulan sa akong pagmabdos, nakamata ko nga nagdugo. Kaingon nako nga nakuhaan ko, maong miadto ko sa ospital. Ang mga bata OK ra, apan ang doktor mipapahulay nako hangtud ko manganak.
Nakomplikado na kaayo. Nahurot ang among tinigum tungod sa bayranan sa ospital, ug ang gamay nga kinitaan ni Charles dili paigo sa among mga panginahanglanon. Gibati nako nga walay mahimo. Dili ko makatabang sa pagpangita og kwarta o pag-atiman ni Chevy. Usahay makalimot ko nga nagdala ko og duha ka espesyal nga espiritu nga mga anak. Nangamuyo ko adlaw ug gabii sa akong Langitnong Amahan alang sa kahupayan. Nahadlok ko kon unsa pay moabut nga dili maayo. Apan nagbalik-balik sa akong hunahuna: Buhi ang Langitnong Amahan ug nasayud Siya sa among mga panginahanglan.
Nakigbisog usab si Charles, apan nagpabilin siyang lig-on. Mitabang siya nako ug miatiman ni Chevy bisan sa iyang trabaho. Ang iyang mga panalangin sa priesthood nakahupay nako, ug ang iyang gugma nakapalig-on nako. Nahadlok mi, apan giatubang namo kining bag-ong pagsulay.
Gipaningkamutan nako nga makadawat sa sitwasyon. Imbis magbuhat og dili importante, nagbasa ko sa mga kasulatan, sa mga magasin sa Simbahan, ug maayong mga libro. Mikanta usab ako og mga himno—“How Firm a Foundation” (Hymns, no. 85) nakahatag gyud kini og kalainan. Mas nasuod ko sa akong Manluluwas. Nakaamgo ko nga mas daghan kog angay nga pasalamatan bisan pa sa among sirkumstansya.
Paglabay sa mga adlaw, gibati namo ang kamot sa Ginoo nga mitabang sa among kinabuhi. Dagko ug gagmay nga mga milagro miabut. Ang among mga pamilya ug mga higala mibayad sa pipila namo ka mga galastuhan. Gibati nako ang gugma ug pagpakabana sa among pamilya. Ang kapangulohan sa Relief Society mi-assign og usa o duha ka mga sister nga mobisita nako kada adlaw. Nagdala sila og mga grocery, nagluto ug nanglimpyo, miatiman ni Chevy, mipakigbahin og mga hunahuna, ug midasig nako. Nag-ampo sila nga mamaayo ko ug sa padayon nga maayo ra ang kaluha. Wala gayud kami magutmi. Kini nga mga sister wala gayud masayud kon unsa ka dako ang natabang sa ilang serbisyo sa pagpagaan sa akong mga problema. Sa pag-abut na sa panahon, gihimong sayon sa Langitnong Amahan ang akong pagpanganak, ug ang duha ka batang babaye himsog.
Milabay ang katuigan sukad nianang mahagitong panahon sa akomg kinabuhi, apan wala gayuy adlaw nga wala namo mabati ang gugma sa Dios. Ang among sitwasyon sa panalapi mas maayo na karon, ug ang among mga anak nagtubo nga smart ug dunay talento. Mas lig-on na kami ug mas andam sa umaabut nga mga hagit tungod kay nasayud kami nga ang Langitnong Amahan mopanalangin sa Iyang mga anak sa Iyang kaugalingong panahon ug dili gayud mobiya kanila nga walay tabang o wala mahupay. Ang kinabuhi dili sayon nga panaw, apan ang Dios sa kanunay magauban ug mogiya kanato.