Ikapulo, Tayming, ug Transportasyon
Ang tagsulat nagpuyo sa São Paulo, Brazil.
Kami walay kwarta nga iplete padulong sa simbahan, mao nga nanglakaw na lang mi.
Usa ka Sabado ang akong asawa ug ako nakaamgo nga kami walay igong kwarta nga ikaplete sa pampublikong transportasyon padulong sa simbahan sa sunod adlaw, ug walay paagi nga makahimo og cash withdrawal. Ang among ikapulo anaa na sa sobre sa donasyon andam nga ihatag ngadto sa bishop. Nag-istorya mi unsaon namo sa pag-adto sa simbahan. Kon gamiton namo ang kwarta sa ikapulo nga iplete, gibati namo nga mosabut ra ang Ginoo; hinoon, nakahukom mi dili kini sakto.
Ang laing posibilidad mao ang dili pagsimba, ug nagtuo usab kami nga ang Ginoo mosabut ra tungod kay sukad wala gyud mi makapalta sa pagsimba sukad. Hinoon, kon mahitabo na, dili namo ikahatag ang among ikapulo ngadto sa bishop, mao nga kana nga posibilidad wala madayon.
Naningkamot nga magmatinud-anon, nakahukom mi nga mobiya og sayo kay sa kasagaran ug molakaw padulong sa simbahan. Mibiya mi nianang matahum nga adlaw sa Igpapahulay, nga mga tulo ka milya (4.8 km) gikan sa among balay. Alang sa among upat ka anak (ang kinamagulangan nag-edad og sais), mora kini og party, ug nalingaw sila sa pagdagan-dagan ug pagdula diha sa dalan.
Sa dihang miabut mi sa lugar nga lapad ug kuyaw nga dalan, nakadungog ko nga ang Espiritu misulti nako, “Kinahanglan kamong motabok karon.” Gisultihan nako ang akong asawa, ug mitubag siya nga kuyaw kadto kay kana nga bahin sa dalan nasugod na sa pagliko, dili na namo makita ang nagpadulong nga mga sakyanan. Mitubag ko nga akong gibati nga kinahanglan kaming molabang, mao nga dali kaming milabang, ang akong asawa ug ako nagdala og duha ka bata kada usa. Sa among pagtungtong sa sidewalk, usa ka sakyanan ang mihunong niana nga bahin, ug ang drayber nangutana, “Padulong ba kamo sa simbahan?”
Ang drayber dili namo kauban sa ward, apan nagkahimamat na kami kaniadto tungod kay mibisita ko sa ilang ward. Miyango mi, ug mitanyag siya nga ihatud kami niya didto. Sa among pagsulod sa sakyanan, ang brother mipasabut nga wala gayud siya sukad moagi dinhi ug miagi na lang siya tungod kay ang iyang business partner nawad-an sa yawe sa opisina ug iyang ihatud ang iyang yawe ngadto sa iyang partner.
Naghunahuna sa akong kaugalingon nga dili lang kini sulagma. Ang Ginoo nasayud nga kinahanglan kami og transportasyon padulong sa simbahan. Ang among ikapulo anaa sa akong bulsa, ug kini nakahatag namo og oportunidad sa pagtudlo sa among mga anak mahitungod sa mga panalangin nga moabut tungod sa pagbayad sa ikapulo. Miabut kami og sayo sa chapel kay sa kasagaran apan malipayon ug mapasalamaton. Miapil mi sa tanang mga miting ug wala mosulti ni bisan kinsa unsay nahitabo.
Ang summer sa São Paulo init kaayo, ilabi na sa udto, sa dihang nahuman na ang mga miting sa Simbahan. Sa dihang nangandam na kami sa pagpauli dihay miduol ug nangutana namo, “Duna bay mohatud ninyo?” Mitubag mi nga wala, ug miingon siya namo, “Gusto ba mong ihatud nako?” Gidawat namo ang iyang tanyag, ug akong asawa ug ako nagtinan-away sa usag usa uban sa emosyunal nga pahiyom.
Labaw sa kausa ang Ginoo mihatag namo og dakong panalangin tungod sa among pagkamasulundon.