Pagserbisyo diha sa Simbahan
Napanalanginan tungod sa Akong Pagserbisyo
Ang tagsulat nagpuyo sa Western Australia.
Ang Ginoo mahimuot sa pagpanalangin kanato, ug akong nabantayan nga dili igsapayan kon unsa ka dako ang akong pagserbisyo, padayon ako nga dunay utang Kaniya.
Samtang ako gipaila-ila isip mamumulong bag-ohay lang, ang tawo nga nagpahigayon niini matinahurong misulti sa pipila sa akong prominente nga mga calling sa Simbahan kaniadto, sama sa pagka-bishop, pagka presidente sa misyon, ug pagkasakop sa kapangulohan sa stake. Kini nga brother mabination, apan ang hunahuna misantup ngari kanako, nganong wala man ko ipaila sa akong pagka ward mission leader (nga maoy akong calling karon) o sa uban nakong mga calling nga dili kaayo makita?
Makasulti ko sa tinuoray nga akong gibati ang sama nga tiggiya nga espiritu diha sa matag calling, ug ang matag usa magantihon. Kanunay ko nga nagtinguha sa giya sa Ginoo diha sa akong mga calling, ug wala gayud ako mobati nga gipaubos. Nakaingon ko nga ang Ginoo mahimuot sa pagpanalangin kanato—dili igsapayan kon asa kita nagserbisyo.
Mituo ako nga kita makadawat og “korona sa pagka-imortal ug kinabuhi nga dayon” (D&P 81:6) dili tungod sa prominente nga mga calling apan hinoon tungod kay kita mapaubsanong nag-alagad sa bisan unsa nga mga calling nga atong nadawat. Ang Manluluwas miingon:
“Himoa nga ang ulo dili moingon ngadto sa mga tiil nga wala magkinahanglan sa tiil; kay kon walay tiil unsaon sa lawas sa pagbarug?
“Usab ang lawas nagkinahanglan sa matag sakop, aron ang tanan mahatagan og kaayohan, nga ang paagi mahimo nga hingpit” (D&P 84:109–10).
Nahadlok ko sa pipila ka mga calling sa Simbahan sa akong kinabuhi. Matag higayon nga maghunahuna ko bahin sa potensyal nga calling, sigurado ko nga kini akong madawat. Ang pagdawat niana nga mga calling nagkinahanglan og hugot nga pagtuo ug pagsalig sa mga saad nga anaa sa mga kasulatan.
Si Nephi miingon, “Ako moadto ug mobuhat sa mga butang nga ang Ginoo nagsugo, kay ako nasayud nga ang Ginoo dili mohatag og mga sugo ngadto sa mga katawhan, gawas kon siya moandam og paagi alang kanila nga sila unta makatuman sa butang diin siya misugo kanila” (1 Nephi 3:7). Gipahayag ni Pablo, “Kay kita wala sa Dios hatagig espiritu sa katalaw kondili sa espiritu sa gahum, ug sa gugma ug sa pagpugong sa kaugalingon” (2 Timoteo 1:7).
Usahay kita mobati nga atong katungod ang pagbalibad og calling kon kita nahadlok niini. Apan kinahanglan natong hinumduman nga ang mga lider sa Simbahan nag-ampo mahitungod sa mga calling ug sa mga tawo kinsa modawat niini.
Kon kita mobalibad og calling, ang katungdanan ipasa ngadto sa lain, kinsa adunay oportunidad sa paglambo ug mapanalanginan sa pagserbisyo (tan-awa sa D&P 58:32).
Ang Ginoo mahimuot sa pagpanalangin kanato, ug akong nabantayan nga dili igsapayan kon unsa ka dako ang akong pagserbisyo, padayon ako nga dunay utang Kaniya. Sa pagkatinuod, Siya mipanalangin sa akong pamilya ug kanako lapas sa pinaka-imposible nakong mga pangandoy alang sa among pagserbisyo sa Iyang gingharian.