Mga Tingog sa mga Santos sa Ulahing mga Adlaw
Ang Wala Nako Makita nga Investigator
Napanalanginan ko og talagsaon nga mga ginikanan. Ang akong inahan usa ka miyembro sa Simbahan, ug bisan tuod nga dili miyembro ang akong amahan, misuporta gihapon siya namo sa among mga kalihokan sa Simbahan. Samtang nagdako, nag-ampo ko kada adlaw nga ang akong amahan mopasakop sa Simbahan.
Sa dihang nadawat nako ang akong patriarchal blessing sa edad nga 16, gisaaran ko nga mahimo kong impluwensya sa pagtabang sa akong amahan nga mopasakop sa Simbahan. Nakig-istorya ko niya bahin sa mga butang nga akong nakat-unan sa seminary. Ako siyang gisultihan bahin sa mga kasulatan nga nag-ingon nga gikinahanglan nga mabunyagan ug makumpirmahan aron makasulod sa gingharian sa Dios (tan-awa sa Juan 3:5). Naghilak, ako siyang giingnan bahin sa mga panalangin sa templo nga maghimo niining posible alang kanamo nga mag-uban hangtud sa kahangturan.
Mieskwela ko sa gamayng eskwelahan sa Arizona, USA. Duna koy talagsaong mga higala sa high school bisan tuod nga ako ra ang miyembro sa Simbahan sa akong klase. Nianang higayuna, si Presidente David O. McKay (1873–1970) mao ang propeta. Kanunay namong madungog ang iyang tambag nga ang “matag miyembro [mahimong] usa ka misyonaryo” (tan-awa sa Mga Pagtulun-an sa mga Presidente sa Simbahan: David O. McKay [2011], kapitulo 6). Usa ka summer ang akong igsoon nga si Marilyn ug ako midapit og pipila ka mga higala nga maminaw sa mga leksyon sa misyonaryo. Miapil sila sa duha ka leksyon ug wala na mainteresado. Nasagmuyo mi, pero wala kadto makaputol sa among panaghigalaay.
Mieskwela ko sa kolehiyo sa katapusang bahin niana nga summer. Panahon sa semester sa tingpamulak, nakadawat ko og sulat gikan sa akong papa. Misulat siya: “Labing dako nako nga pribilehiyo nga mahimong pangulo sa usa ka pamilya nga dunay talagsaong mga babaye. Tungod sa tanang lig-on ninyong mga pagpamatuod sa ebanghelyo ug sa mga miting ug sa interes diha sa ubang mga batan-on sa miaging summer, misugod gyud ko og kainteresado sa Simbahan. Samtang namintal ko didto sa gawas sa balay ug kamo ug ang mga batan-on naa sa sulod nga nagpahigayon niadtong mga miting, nakumbinsir ko nga dugay na gyud diay kong naa lang sa gawas. Nagpasalamat ko sa Langitnong Amahan sa daghang higayon alang sa inyong inahan ug sa kamatuoran nga nagdako siya sa Simbahan ug sa paagi sa iyang pagpadako ninyo.”
Sa wala madugay nabunyagan ang akong amahan, ug usa ka tuig human niana ang among pamilya na-sealed alang sa karon ug sa kahangturan didto sa Templo sa Mesa Arizona.
Bisan tuod nga walay usa sa among mga higala ang mipasakop sa Simbahan, mipasakop ang labing importante nga tawo sa among kinabuhi. Wala gayud kita masayud kon sa unsang paagi kita mapanalanginan kon mosunod kita sa tambag sa propeta.