Unsaon Nako sa Pagkahibalo
Nganong Gikinahanglan ang Basahon ni Mormon?
Ang tagsulat nagpuyo sa Pilipinas.
Kanunay gyud kong nagsalig sa uban alang sa pagpamatuod sa Basahon ni Mormon, pero nakadesisyon ko nga panahon na aron magtinguha alang sa akong kaugalingon.
Nganong nagkinahanglan pa man kita sa Basahon ni Mormon nga duna na man kitay Balaang Biblia? Kadaghan ko naghunahuna niini nga pangutana. Isip tin-edyer nakuryuso ko bahin sa Basahon ni Mormon, pero wala koy kadasig nga mobasa niini. Usa ka butang, walay miawhag nako nga mobasa niini sa balay tungod kay ako ra maoy miyembro sa Simbahan sa akong pamilya, gawas sa akong lolo nga namatay na.
Usa ka Dominggo atol sa usa ka miting sa pagpamatuod, daghang mga miyembro ang mipamatuod bahin sa katinuod sa Basahon ni Mormon, nga bag-o lang nakong giduha-duhaan. Ilang gihagit kadtong wala pa makabasa niini nga magbaton og kaugalingon nilang pagpamatuod nga ang Basahon ni Mormon tinuod, nga si Joseph Smith usa ka propeta sa Dios, ug nga Ang Simbahan ni Jesukristo sa mga Santos sa Ulahing mga Adlaw mao ang gingharian sa Dios dinhi sa yuta.
Namalandong ko kon ang akong pagpamatuod bahin sa Simbahan ug ni Joseph Smith lig-on na ba aron makalahutay sa mga tintasyon ug mga pagdani ni Satanas. Nakaamgo ko nga dili. Ang akong pagpamatuod huyang tungod kay nagsalig lang ko sa mga pagpamatuod sa mga lider ug mga miyembro sa Simbahan. Misaad ko sa akong kaugalingon nga sugod nianang adlawa, magtinguha ko og akong kaugalingong pagpamatuod.
Nakadesisyon ko nga mobasa sa Basahon ni Mormon. Diha sa pasiuna akong nabasahan, “Kami nagdapit sa tanan nga mga tawo sa tanan nga dapit sa pagbasa sa Basahon ni Mormon, sa pagpamalandong diha sa ilang mga kasingkasing sa mensahe nga gilakip niini, ug unya sa pagpangutana sa Dios, ang Amahan sa Kahangturan, sa ngalan ni Kristo kon ang basahon tinuod ba. Kadto kinsa mosunod niini nga pamaagi ug mangamuyo sa hugot nga pagtuo makaangkon og usa ka pagpamatuod sa katinuod ug kabalaan niini pinaagi sa gahum sa Espiritu Santo. (Tan-awa sa Moroni 10:3–5.)” Nasayud ko nga personal ko nga gidapit nga mobasa sa Basahon ni Mormon. Samtang nagpadayon ko sa pagbasa, akong gibati ang malinawong pagbati gikan sa Espiritu Santo nga nagpamatuod sa kabalaan ug katinuod sa basahon.
Akong nahibaloan nga ang Basahon ni Mormon nagpamatuod gayud bahin ni Kristo, ug naulaw ko tungod sa pagduda sa katinuod niini. Sa eskwelahan akong nakat-unan kon giunsa sa mga maghuhukom sa balaod sa pagtuon og maayo sa ebidensya sa usa ka kaso sa dili pa mohatag og paghukom. Ang sukwahi maoy akong gibuhat sa Basahon ni Mormon: ako kining gihukman sa wala pa nako kini basaha.
Nahuman nako ang pagbasa uban sa mapainubsanong kasingkasing ug kaisug nga manalipod sa unsay akong gituohan. Usab, malipayon ko tungod kay duna na koy kauban samtang magbasa ko pag-usab sa Basahon ni Mormon. Ang akong lola nabunyagan sa dayon nakong pagkahuman og basa sa Basahon ni Mormon sa unang higayon.
Duna koy lig-on nga pagpamatuod nga si Jesukristo mao ang akong Manluluwas, nga si Joseph Smith usa ka propeta sa Dios, ug nga Ang Simbahan ni Jesukristo sa mga Santos sa Ulahing mga Adlaw mao ang tinuod ug buhi nga Simbahan sa Dios dinhi sa yuta.