Gikan sa Misyon
Adtoa Si Rebecca
Ang tagsulat nagpuyo sa Utah, USA.
Walay usa nga miduol sa pultahan sa dihang nanuktok mi, pero nasayud mi nga gipadala mi didto aron motabang sa usa sa mga anak sa Dios.
Pipila pa lang ko ka bulan sa akong misyon sa Illinois Chicago South Mission ug nagserbisyo gihapon ko sa akong unang area. Ang area sa mga sister nga tupad namo bag-o lang nga gi-close, mao nga duna mi responsibilidad alang sa tanang mga investigator nga Kinatsila ang pinulongan gikan niana nga area. Apil nila mao ang usa ka babaye nga ginganlan og Rebecca.
Sa unang higayon nga nahimamat namo si Rebecca, nakadayeg ko sa iyang pagtuo. Nagpuyo siya sa basement sa usa ka balay, mao nga kinahanglan mi nga manuktok sa iyang bintana aron iyang ablihan ang pultahan para namo. Ang mga misyonaryo sa una misugod sa pagtudlo niya human siya mihangyo og usa ka Finding Faith in Christ nga video. Kon wala pa siya nanawag alang sa usa ka video, wala unta siya makit-i sa mga misyonaryo.
Makita nako nga gikan sa unsay iyang gisulti namo nga lisud ang kinabuhi ni Rebecca. Usa siya ka malipayon kaayong tawo sa una, pero karon nabulag siya gikan sa iyang anak nga lalaki ug sa ubang pamilya. Bisan anaa siya sa ubos nga kahimtang, akong gibati ang gugma sa Ginoo alang niya.
Samtang nagtudlo mi niya, akong makita nga gibati niya ang Espiritu. Ang among pagbisita mas makapalipay niya. Apan layo lang ang iyang gipuy-an, ug lisud ang pagbisita niya pirme bisan gusto pa namo.
Usa ka Biyernes sa dihang duna mi zone conference, nagplano mi nga moadto niadtong dapita sa among area pagkahuman kay duol na man lang mi didto. Gipangutana namo si Rebecca kon naa ba siya sa balay, pero miingon siya nga magtrabaho siya. Nakadesisyon mi nga magbisita gihapon mi sa uban namong mga investigator diha sa area.
Duna mi sobra nga oras didto, ug dili mi sigurado kon unsay buhaton. Dayon miingon ang akong kompanyon, “Siguro adtuon nato si Rebecca kon naa ba siya sa balay.” Kini nga sugyot morag walay pulos ngari nako kay giingnan na mi ni Rebecca nga wala siya sa balay. Mao kanang higayuna nga nakadungog ko og tingog nga miingon nako, “Balik ug bisitaha siya.” Gibati nako nga mora gyud og gibira ang akong lawas paingon sa balay ni Rebecca. Mao gayud kadto ang kinakusgan nga impresyon nga akong nabati sukad.
Gisultihan nako ang akong kompanyon nga pabalikon ang sakyanan sa agi, ug nangadto mi sa balay ni Rebecca. Nanuktok mi og kaduha sa bintana, ug walay mitubag. Nasagmuyo kaayo ko tungod kay nasayud ko nga duna gyuy rason nganong gipaadto mi sa Ginoo. Misugyot ko nga manuktok mi og kausa pa. Naghulat mi, ug dayon sa dihang mobiya na unta mi, giablihan ni Rebecca ang pultahan.
Nauli siya tungod kay bag-o lang siyang gitaktak sa iyang trabaho, ug nagkinahanglan gyud siya og tawo nga ikaistorya. Nag-ampo gyud siya nga moabut mi. Gisultihan mi niya nga iya ming mga anghel. Nakig-istorya mi niya ug mas mipagaan sa iyang pagbati pinaagi sa pagtudlo niya og dugang pa bahin sa ebanghelyo.
Malipayon kaayo ko nga nagpakabana ang Langitnong Amahan sa matag usa sa Iyang mga anak ug naminaw sa pag-ampo ni Rebecca, ug malipayon ko nga nakasunod mi sa pag-aghat nga mobisita niya, aron mahimo mi nga tubag sa iyang pag-ampo. Ang atong Langitnong Amahan nasayud sa tanang butang nga nahitabo sa matag usa sa atong kinabuhi, ug kon mosalig kita Kaniya ug mangayo nga dunay pagtuo, motabang Siya kanato sa mga butang nga atong gikinahanglan.