Mga Profile sa Young Adult
Pagtukod sa Gingharian didto sa Australia
Ang tagsulat nagpuyo sa Utah, USA.
Mga problema ug pagkawala sa pandungog dili makapugong niining young adult sa pagtabang sa pagpadali sa buhat sa Ginoo sa Australia.
Sa pagsubang sa adlaw sa Mount Baw Baw, si Callan Brooks nagbuhat unsay iyang ganahan: ang pagtukod. Mipahiyom siya sa iyang pagpahaum sa laing two-by-four ngadto sa iyang lugar, mibati nga nagmalampuson sa maayong trabaho.
Kon magtan-aw ka ni Callan nga nagtrabaho, dili ka makasulti nga bungol siya. Apan wala kini makapahinay niya. Alang ni Callan, natawo siya sa pagbuhat niini. Ug tingali mao gyud siya—kay sulod sa lima ka mga henerasyon ang iyang pamilya mga tigtukod.
“Sa dihang nag-edad ko og 15 anyos, miundang ko sa pag-eskwela aron magsugod sa apprenticeship,” miingon siya. “Kon duna kay makit-an nga apprenticeship nga imong maganahan, komon ra sa mga Australiano nga moundang sa pag-eskwela ug mag full time niini.” Si Callan nagsige na og tukod sukad adto. Magtukod man siya og balay, magpalig-on sa iyang kaugalingong pagpamatuod, o magpalambo og calling, si Callan kanunay nga moapil sa pagtukod sa gingharian sa Dios.
Bisan nawad-an siya sa pandungog wala kini makapugong niya sa iyang trabaho sa kontruksyon, wala kini makapugong niya sa iyang tinguha sa pagkat-on ug pagsangyaw sa ebanghelyo.
“Samtang nagtubo ko, hapit dili ko kasabut og 10 porsyento sa unsay gisulti sa pulpito,” miingon si Callan. Gusto siya nga moserbisyo og full-time mission apan wala mokwalipay tungod sa iyang pandungog. Hinoon, nag-ampo siya ug misalig nga ang kabubut-on sa Ginoo ang matuman. Dayon dunay wala paabuta nga nahitabo: migrabe ang pandungog ni Callan.
“Sa dihang 18 anyos pa ko, hingpit akong dili makadungog sulod sa unom ka bulan. Mosimba ko tungod sa mga pagbati, tungod kay mao ra kana ang akong makuha,” mipasabut siya.
Niining higayona, gipalig-on ni Callan ang iyang pagpamatuod ug misalig sa Espiritu. Apan unsay dako nga pagsulay sa sinugdanan nahimong tubag sa iyang mga pag-ampo. Tungod sa kalit nga pagkagrabe sa abilidad sa pandungog, mikwalipay siya sa cochlear implant, nga nakapabalik sa iyang pandungog igo nga nakapakwalipay niya sa full-time nga misyon. Sa wala madugay si Callan nagserbisyo sa Perth, Australia.
Karon nakauli sa Moe, Victoria, si Callan nagserbisyo sa Young Men presidency sa iyang ward, diin iyang gitabangan ang 10 ka batan-ong mga lalaki nga magpabiling lig-on sa ebanghelyo sa dapit nga ang pagpabilin nga lig-on lisud kaayo. Sa pagbuhat niini, iyang gihatagan og gibug-aton ang tahas sa Espiritu sa pagpalig-on sa tinuod nga pagkakabig.
“Among gipaningkamutan ang paggiya sa batan-ong mga lalaki sa pagsinati sa ilang kaugalingong pagkakabig pinaagi sa pagbasa sa Basahon ni Mormon ug sa paggamit sa mga programa sa Simbahan,” miingon siya.
Ang epekto sa trabaho niining ikalimang henerasyon nga tigtukod klaro, pinaagi sa iyang pagtrabaho sa mga bilding, sa iyang pagsaksi sa ebanghelyo, ug sa iyang pagtudlo sa batan-ong mga lalaki sa iyang ward.