Mensahe sa Visiting Teaching
Ang Pagkaginikanan Mao ang Sagradong Katungdanan
Tun-i sa mainampuong paagi kining materyal ug pagtinguha sa inspirasyon aron masayud unsay angay nga ipakigbahin. Sa unsang paagi nga ang pagsabut sa “Ang Pamilya: Usa ka Pamahayag ngadto sa Kalibutan” makapadugang sa inyong hugot nga pagtuo diha sa Dios ug makapanalangin niadtong inyong giamumahan pinaagi sa visiting teaching? Alang sa dugang nga impormasyon, adto sa reliefsociety.lds.org.
Hugot nga Pagtuo, Pamilya, Kahupayan
Ang atong Langitnong Amahan miestablisar sa pamilya aron sa pagtabang kanato nga matudlo ang husto nga mga baruganan sa mahigugmaon nga kahimtang. Si Presidente Thomas S. Monson miingon: “Dayga ang inyong anak ug gaksa; ingna nga, ‘Gimahal ko ikaw’; ipahayag kanunay ang inyong pasalamat. Ayaw itugot ang usa ka sulbarunon nga problema maoy mahimong mas importante kay sa tawo nga angayng mahalon.”1
Si Susan W. Tanner, kanhi presidente sa kinatibuk-ang Young Women, mitudlo: “Ang atong Langitnong Amahan naghulagway sa sumbanan nga angay natong sundon. Siya nahigugma kanato, nagtudlo kanato, nagpasensya kanato, ug Iya kitang gisaligan nga molihok sumala sa atong kabubut-on. … Usahay ang pagdisiplina, nga nangahulugan og ‘pagtudlo’, masaypan nga pagsaway. Ang mga bata—ingon man usab ang mga katawhan sa tanang pangidaron—momaayo ang kinaiya tungod sa gugma ug pagdasig kay sa pagpanaway.”2
“Kon kita matinud-anong nagbuhat sa pag-ampo sa pamilya, pagtuon sa kasulatan, family home evening, mga panalangin sa priesthood, ug pagbalaan sa adlaw nga Igpapahulay,” miingon si Elder Quentin L. Cook sa Korum sa napulog duha ka mga apostoles, “ang atong mga anak … maandam alang sa mahangturong panimalay sa langit, dili igsapayan unsay mahitabo kanila sa malisud nga kalibutan.”3
Dugang nga mga Kasulatan
1 Nephi 8:37; 3 Nephi 22:13; Doktrina ug mga Pakigsaad 93:40; 121:41
Buhi nga mga Istorya
“Nagbasa ako og pamantalaan sa diha nga usa sa akong gamay pa nga apong lalaki mitupad og lingkod kanako,” miingon si Elder Robert D. Hales sa Korum sa Napulog Duha ka mga Apostoles. “Samtang nagbasa ko, nahimuot ako sa pagkadungog sa iyang malumo nga tingog nga nagpatakag sulti diha sa luyo. Hunahunaa ang akong kakugang sa dihang, pipila ka mga gutlo sa wala madugay, mipatunga siya tali kanako ug sa pamantalaan. Gihakop ang akong nawong sa iyang mga kamot ug giduot ang iyang ilong sa akong ilong, siya nangutana, ‘Lolo! Anaa ka ba diha?’
“… Ang pagka anaa diha nangahulugan nga nakasabut sa mga kasingkasing sa atong mga kabatan-onan ug nagpakabana kanila. Ug ang pagpakabana kanila nagpasabut nga dili lamang ang pagpakigsulti uban kanila kondili ang pagbuhat usab og mga butang nga kauban sila. …
“Kinahanglan gayud magplano kita ug mopahimulos sa mga kahigayunan sa pagtudlo. …
“… Sa gidugayon sa akong pagpakabuhi, mas akong naamgohan nga ang mga panahon nga natudloan ko atol sa akong kabatan-on, ilabina kadtong gihatag sa akong mga ginikanan, nakaimpluwesya sa akong kinabuhi ug nakahulma kanako kon kinsa ako.”4