Praktisa ang Relihiyon nga Putli

Ni Elder Don R. Clarke

Nagserbisyo isip usa ka General Authority Seventy gikan sa 2006 hangtud 2015

Gikan sa usa ka debosyonal nga pakigpulong, “Pure Religion,” nga gihatag didto sa Brigham Young University–Idaho niadtong Enero 13, 2015. Alang sa kompleto nga pakigpulong sa Iningles, adto sa speeches.byu.edu.

Kon gusto mong magmalipayon, mobati sa Espiritu Santo, ug mag-anam og kaduol sa Manluluwas, nan praktisa ang relihiyon nga putli.

Duha ka tuig ang milabay, usa ka batan-ong lalaki nga tawagon nako og John ang miadto sa akong opisina human nga nakauli gikan sa iyang misyon.

“Elder Clarke, nagkinahanglan ko og tabang,” miingon siya nako uban sa dakong kabalaka. “Ganahan ko sa akong misyon. Nakapausab kini kanako. Bisan pa niana, nagkawala kanako ang pipila niadtong sagrado ug espesyal nga mga pagbati nga akong gibati sa mission field. Unsay akong buhaton aron mobati sa unsay akong gibati didto sa mission field?”

Nakita ko na kini nga nahitabo sa makadaghan. Unsay iyang gipangutana mao ang, “Unsay akong mabuhat aron magmalipayon, mobati sa Espiritu Santo, ug mahiduol sa Manluluwas?” Usa kini ka pangutana nga kinahanglang ipangutana natong tanan matag adlaw.

Nianang hapona sa akong opisina, gipakli namo ang Santiago 1:27 ug mibasa, “Ang relihiyon nga putli ug dili bulingon sa atubangan sa Dios nga atong Amahan mao kini, Ang pagduaw sa mga ilo ug mga babayeng balo sa ilang mga pagkaguol, ug ang pag-amping sa kaugalingon nga dili mahugawan sa kalibutan.”

Sunod among gibasa ang Alma 34:28: “Kon kamo mosalikway sa timawa, ug sa hubo, ug dili moduaw sa masakiton ug sa may balatian, ug mohatag sa inyong kabtangan, kon kamo aduna, ngadto sa nanginahanglan—ako moingon nganha kaninyo, kon kamo dili mobuhat sa bisan hain niini nga mga butang, tan-awa, ang inyong pag-ampo makawang, ug dili ninyo mapahimuslan, ug kamo ingon sa mga nagpakaaron-ingnon kinsa naglimud sa hugot nga pagtuo.”

Dayon giribyu namo ang istorya sa Ebanghelyo ni Juan diin si Pedro ug ang ubang mga disipulo nanagat ug walay nakuha apan gisultihan sa Manluluwas nga ibalhin ang ilang pukot sa laing bahin sa sakayan ug nakakuha og 153 ka isda. Human sila nakakaon, nag-istoryahanay si Pedro ug ang Manluluwas. Nasayud ang Manluluwas nga nagtudlo Siya niining umaabut nga propeta sa dili madugay ug presidente sa Simbahan sa usa sa katapusang mga higayon.

“Gihigugma mo ba ako?” nangutana ang Manluluwas.

Mitubag si Pedro, “Oo, Ginoo; nasayud ka nga gihigugma ko ikaw.”

Dayon miingon ang Manluluwas, “Pakan-a ang akong mga nating karnero.”

Nangutana ang Manluluwas sa samang pangutana sa makaduha pa ka higayon ug dayon mimando: “Pakan-a ang akong mga karnero” (tan-awa sa Juan 21:3–17).

Gimandoan gayud si Pedro nga praktison ang relihiyon nga putli, o ang pag-amuma sa mga tawo. Ang propeta sa Dios karon nag-amuma usab ug nahigugma sa mga tawo. Si Presidente Thomas S. Monson usa ka talagsaong ehemplo sa usa ka tawo nga nagpraktis og relihiyon nga putli. Gigahin niya ang tibuok niyang kinabuhi sa paghigugma ug pag-amuma sa mga tawo.

Nakakita ko og daghang mga returned missionary sama sa akong higala nga si John. Kon inyo silang pangutan-on kon nganong ganahan sila sa ilang mga misyon, kanunay silang moingon nga tungod sa ilang gugma sa mga tawo. Sa adlaw nga ang mga misyonaryo magsugod sa pag-amuma sa uban kay sa ilang kaugalingon, mahimo silang malipayon. Ingon niana ang paagi alang kanatong tanan. Ang atong kinabuhi mas magmalipayon kon kita moamuma ug mohigugma sa uban.

Ang katugbang sa pag-amuma sa uban mao ang paghunahuna bahin sa kaugalingon: akong sakyanan, akong pagtuon, akong trabaho, akong mga problema. Kon kanunay lang nga bahin nato, ang atong koneksyon sa langit dili ingon kalig-on sa unsay angayan unta.

Akong gisultihan si John nga kon magpraktis siya og relihiyon nga putli, magmalipayon siya ug mobati sama sa iyang gibati didto sa iyang misyon. Sa samang paagi, kon kamo ganahang magmalipayon, mobati sa Espiritu Santo, ug mag-anam og kaduol sa Manluluwas, nan praktisa ang relihiyon nga putli. Gikan sa mga kasulatan sa ibabaw atong makat-unan ang upat ka mahinungdanong butang nga praktison nga magpasabut og relihiyon nga putli.

1. Bisitaha ug Amumaha ang mga Balo

Mibalik sa kolehiyo si John ug mibuhat sa unsay among gihisgutan. Sa wala madugay gipadad-an ko niya og email diin mipakigbahin siya sa iyang kasinatian nga nagbasa og makapadasig nga mga istorya gikan sa mga magasin sa Simbahan ngadto sa mga tigulang sa usa ka assisted-care facility.

“Daghang mga indibidwal ang mibati og dakong gugma ug suporta gikan sa Manluluwas samtang mipamatuod ang Espiritu sa yano nga mga kamatuoran ug mga pagpamatuod,” misulat siya. “Wala gyud ko kahibalo nga mahimo diay kong mobati sa ingon nga gugma gikan ug ngadto sa mga estranghero kinsa wala kaayo koy koneksyon. Apan gibati nako ang gugma sa Manluluwas alang kanila, alang niadtong mabinationg mga tawo. Naklaro ngari nako nga mahimamat nako kining mga indibidwal—nga karon grabe nga naapektuhan sa dementia ug pisikal nga mga balatian—didto sa laing kalibutan. Makita nako ang ilang mga bana ug mga asawa, nga nagbantay kanila gikan sa laing kalibutan. Gibati gyud nako ang presensya sa akong lolo—nga wala gyud nako mahimamat—samtang naglingkod ko tupad sa akong lola, ug ang iyang espiritu milig-on nako ug misuporta nako. Nasayud ko nga malipayon siya sa yano nako nga pagbisita.”

Mipadayon siya: “Kinsay nasayud nga makakita diay ko sa ingon ka malumo nga mga kalooy? Morag wala kini kahulugan nga mouli human sa butang nga ingon niana ug mopasalida lang sa TV o morelaks sa laing paagi. Nakapausab kini nako nga makaamgo nga kining malumo nga mga kasinatian anaa sa tanang panahon sa adlaw samtang kita, isip mga Santos, maningkamot nga motutok ug motabang sa uban sa pipila ka paagi.”

Mahimo usab ninyo kini, ug ang Ginoo mopanalangin kaninyo sama sa Iyang pagpanalangin ni John.

2. Tabangi ang mga Ilo

Dunay daghang mga ilo sa tibuok kalibutan. Dili ba nindot kon duna kitay koneksyon o mosulat kanunay sa usa ka tawo?

Sa dihang ang among anak, nga si Nate, mipauli gikan sa iyang misyon, duna siyay samang mga pagbati sa akong higala nga si John. Nakahukom si Nate nga moboluntaryo aron mahimong mentor sa programa nga mopares sa mga hamtong ngadto sa mga bata nga nagkinahanglan og tinagsa nga suporta nga mga relasyon. Kana nga pagserbisyo nakapausab sa iyang kasinatian sa kolehiyo. Karon nga minyo na siya, si Nate ug ang iyang asawa, si Carla, “nanagop” na usab pinaagi sa programa. Dakong panalangin alang nila sa ilang kaminyoon nga mopakigbahin sa unsay naa nila niadtong nanginahanglan.

Sa dihang ang akong asawa, si Mary Anne, ug ako miserbisyo sa Bolivia Santa Cruz Mission, duna mi usa ka misyonaryo nga ilo. Wala siyay pamilya. Ang Ginoo mi-assign niya nga mahimong trainer ni Elder Hawkins. Sa akong hunahuna dili siya mao ang pinakamaayo nga trainer, pero si Elder Hawkins mao ang pinakamaayo nga kompanyon alang sa usa ka bata nga ilo nga nahimong usa sa mga misyonaryo sa Ginoo.

Ang mga ginikanan ni Elder Hawkins misulat niini nga misyonaryo atol sa iyang misyon ug nagpadayon sa pagsulat niya sulod sa miaging 15 ka tuig. Tungod ni Elder Hawkins ug sa iyang pamilya, kining bata nga ilo gihigugma ug naamumahan ug karon malipayon sa kaminyoon, dunay trabaho, ug aktibo sa ebanghelyo ni Jesukristo. Makatabang kitang tanan sa mga bata nga ilo.

3. Pag-amuma sa mga Kabus ug Timawa

Ang mga kasulatan kanunay nga nagpahinumdom kanato sa kaimportante sa pagtabang sa mga kabus ug timawa. Kitang tanan aduna niini nga responsibilidad.¹ Usa ka paagi nga madugangan nato ang atong pagtabang sa mga kabus ug timawa mao ang pagbayad og ubay-ubay nga halad sa puasa. Si Presidente Brigham Young (1801–77) miingon:

“Sa unang tuig nga miabut ko niini nga walog wala koy igong harina nga makapatunhay sa akong pamilya hangtud sa ting-ani … , ug ang mga tawo moanhi sa akong balay kada adlaw alang sa pan. Nasagmuyo ko bahin [niini] usa ka adlaw; miadto ko sa karaang kuta [fort] ug sa higayon nga nakabalik na ko sa akong balay hingpit na ko nga naayo. Giingnan nako ang akong asawa, ‘Ayaw tuguti nga dunay tawo nga moanhi dinhi alang sa pagkaon ug molakaw nga walay madala, kay kon imo kanang buhaton mag-antus kita sa wala pa ang ting-ani; apan kon mohatag ka sa kada tawo nga moabut duna kitay igo nga makapatunhay nato. …

“Nagtinguha ko nga magpadayon sa pagbuhat sa ingon, aron ang akong pan molungtad sa sunod nga ting-ani, kay kon dili nako kana buhaton wala koy igong pan nga molungtad sa sunod nga ting-ani.

“Motuo ba mo niana nga baruganan? Nasayud ko nga tinuod kini, tungod kay napamatud-an nako kini sa daghan na kaayong higayon.”²

Ang mosunod nga kasinatian gimantala sa usa ka Christian website pinaagi sa usa ka doktor didto sa Colorado, USA, kinsa hapit wala kaabut sa gasolinahan human nga nagkaproblema ang iyang sakyanan ug napalong ang makina. Samtang nangandam siya nga motawag og trak nga moguroy, nakakita siya og babaye nga nadakin-as ug natumba, kansang karaan nga sakyanan giparking duol sa bomba sa gasolina.

“Tan-awon nako kon okey ra ba siya. Sa dihang miabut na ko didto, morag mas grabe pa ang iyang pagbakho kay sa iyang pagkatumba; [usa] siya ka batan-ong babaye nga luya kaayo tan-awon nga nanglagum ang ubos sa iyang mga mata. Dunay nahulog samtang ako siyang gitabangan, ug ako kining gipunit aron ihatag niya. Usa kadto ka sinsilyo.

“Nianang higayuna, nagsugod ko sa pagkaamgo sa iyang sitwasyon: ang naghilak nga babaye, ang karaan kaayong [sakyanan] nga puno sa mga butang nga dunay tulo ka mga anak sa likod (ang usa naa sa lingkuranan para sa gamayng bata), ug ang bayranan sa gasolina nga [U.S.] $4.95. Ako siyang gipangutana kon okey ra ba siya ug kon nagkinahanglan ba siya og tabang, ug pirme lang siyang moingon, ‘Dili ko gustong makit-an sa akong mga anak nga naghilak.’”

Nakasabut sa iyang sitwasyon, gikuha sa doktor ang iyang credit card, gipuno ang iyang sakyanan og gasolina, ug dayon nagdala og duha ka dagkong bag nga puno sa pagkaon ug pipila ka mga gift certificate alang niya ug sa iyang mga anak sa usa ka fast-food restaurant tupad sa gasolinahan.

“Gisultihan ko niya sa iyang ngalan, ug nga nagpuyo siya sa Siyudad sa Kansas [Missouri, USA],” miingon siya. “Mibiya ang iyang uyab duha ka bulan na ang milabay, ug wala gyud siya makasangkap sa panginahanglan sa iyang pamilya. … Tungod sa pagkadesperada, sa katapusan mitawag [siya] sa iyang mga ginikanan, nga wala niya maistorya sulod na sa mga lima ka tuig. Nagpuyo sila sa California ug miingon nga pwede siyang makapuyo uban nila ug mosulay sa pagbarug sa iyang kaugalingon didto. Mao nga giimpaki niya ang tanan niyang gipanag-iya diha sa sakyanan.”

Gigakos siya sa doktor ug mihalad og pag-ampo alang sa luwas niyang pagbiyahe sa dalan. Samtang naglakaw siya padulong sa iyang sakyanan, nangutana ang babaye, “Usa ka ba ka anghel o unsa man?”

Mitubag ang doktor, “Usahay gamiton sa Dios ang kasarangan nga mga tawo.”

Dayon nakaobserbar siya: “Talagsaon kaayo nga mahimong kabahin sa milagro sa usa ka tawo. Ug siyempre, … sa pagsulod nako sa akong sakyanan miandar ra dayon kini ug nakauli ko sa balay nga walay problema. Ako ning isulod sa shop ugma aron masusi, pero nagduda ko nga walay makit-ang problema ang mekaniko.”³

Misalig ba ang Ginoo nato nga mahimong tubag sa pag-ampo sa usa ka tawo? Makasalig ba Siya nato nga mosunod sa mga pag-aghat sa Espiritu Santo? Kon kanunay kitang mosunod sa mga pag-aghat sa Espiritu, mas daghang mga oportunidad ang ihatag sa Ginoo ngari nato aron mahimong tubag sa pag-ampo sa usa ka tawo.

4. Pakan-a ang Iyang mga Nating Karnero ug mga Karnero

Sa dihang nakig-istorya si Jesus kang Pedro, ang Iyang unang tambag mao ang, “Pakan-a ang akong mga nating karnero.” Nasayud ang Manluluwas nga kon atong pakan-on ang mga nating karnero, dili na kita mangita pa sa nawala nga karnero. Ang uban nato tingali dunay mas manghud nga mga igsoong lalaki o babaye, mga pag-umangkong lalaki o babaye, o laing tawo nga atong nailhan nga nagkinahanglan og tabang. Unta mahimo kitang maayong mga ehemplo alang nila, ug unta makit-an nato ang mga nating karnero nga nagkinahanglan sa atong tabang.

Inyo bang pangitaon ug tabangan ang usa ka nating karnero? Kamo ba, isip usa ka magbalantay sa mga karnero, igo nga masaligan sa pag-amuma sa mga nating karnero ug sa mga karnero, sama sa gipabuhat sa Manluluwas kanato?

Ang pangutana sa Manluluwas ngadto kang Pedro mahimo usab nga ipangutana sa matag usa kanato: “Gihigugma mo ba ako?” Samtang magpraktis kita sa relihiyon nga putli pinaagi sa pagbisita ug pag-amuma sa mga balo, pagtabang sa mga ilo, pag-amuma sa mga kabus ug timawa, ug pagpakaon sa Iyang mga nating karnero ug mga karnero, atong gipakita sa Manluluwas nga ato Siyang gihigugma! Sa pagbuhat nato niini, magmalipayon kita, mobati sa Espiritu Santo, ug mobati nga mas duol ngadto Kaniya.