Kon matinud-anon ko didto sa kinabuhi sa wala pa dinhi sa yuta, nganong lisud man kaayo nga mahimong matinud-anon karon?

Tanang tawo nga moanhi sa yuta mipili didto sa kinabuhi sa wala pa dinhi sa yuta nga mosunod sa plano sa Langitnong Amahan ug modawat kang Jesukristo isip Manluluwas. Apan wala kana magpasabut nga ang pagkamasulundon ug pagkamatarung niining kinabuhia mahimong sayon. Tungod kay ang plano sa Langitnong Amahan gituyo aron kining kinabuhia mahimong tinuod nga pagsulay kon unsaon nato paggamit ang atong kabubut-on, ang atong mga panumduman sa kinabuhi sa wala pa dinhi sa yuta gitangtang. Usab, isip kabahin sa Iyang plano, nakadawat kita og pisikal nga mga lawas, nga makasinati og mga gana, mga kahigal, ug mga tintasyon nga wala nato mahibaloi isip mga espiritu. Mas makapadani kini kanato sa mga butang nga may “pagkakalibutanon, pagkamahilayon, ug pagkayawan-on” (Moises 5:13), kon ngano nga “ang kinaiyanhon nga tawo mao ang usa ka kaaway sa Dios” (Mosiah 3:19).

Ang tawo makabuntog lamang niining mga hagit kon siya “motugyan ngadto sa mga pagdani sa Balaang Espiritu, ug isalikway ang iyang kinaiyanhon nga pagkatawo ug mahimo nga usa ka santos pinaagi sa pag-ula ni Kristo ang Ginoo” (Mosiah 3:19). Dili kini sayon, apan si Jesukristo molig-on kaninyo ug mousab kaninyo samtang maminaw kamo sa Espiritu, mohimo og maayong mga pagpili, ug moduol ngadto Kaniya.