Te Aki Mamatam ibukin te Burabeti
E maeka te tia korokaraki i Hawaii, USA.
Silioti e tangira Beretitenti Kimball. E tangiria bwa e na marurung.
“Kanuai tamneira, kaoni nanora n namakin aika raraoi, ao kakabwaia ara aki mamatam, ti tataro” (Kuna n Taromauri, nambwa. 138).
Silioti e rianna nakon mweengana man te reirei n rirarikin aroka bwabwaiaa ma uaaia aika baboobo ao mwangkoo aika tawaa. Ngke e noora te uanikai, e uringa are e rang bora ni baki. E uringa naba are te bong aei bon te bong ae onoti. N te bong aei aomata ni kabane n ana titeiki i Tonga a aki mamatam ibukin te burabeti, Beretitenti Spencer W. Kimball. E aoraki te burabeti ao e kainnanoa te korokoro. N te tairiki ao aomata ni kabane n te titeiki a na bootaki n tataro ao ni kaina aia aki mamatam ni kabane.
Ngke e roko ni mweengana Silioti, e aroka boin te kuuka inanon te ‘umu, te umuumu ae kenaki iaantano. E kokoaa birotona. E kukurei Silioti bwa e a bon ikawai n aki mamatam ngkai, ma te aki mamatam ni bongin te reirei e bon rangi ni kaangaanga riki nakon te aki mamatam n te Tabati.
E kataia Silioti ni mwaninga are e bora ni baki. E kunea te aia ao n iakina baan te mai ake a bwakabwaka man te mai are e katana ana katawanang irarikin ana auti.
“E oota te Tama are i Karawa ngkana I tii temeka te ran teutana,” e iango Silioti ngke e kaitiaki baina ibukin karaon tabena. Ngkanne e iangoia bwa mwaitira ana tangira ibukin Beretitenti Kimball. E tangiria bwa e na manga marurung. E baireia bwa e na tataninga (n amwarake ao ni mooi).
E tekateka inano Silioti iaon te kaman ao ni kawenea atuuna iaon rangan tinana. E bon rangi ni kua.
“Ko kona ni kaina am aki mamatam ngkana ko tangiria,” e taku Tinana.
“Ma I tangiria n aki mamatam,” e taku Silioti. “I kona ni karaoia.”
Ngke e okira te auti Tamau man ana mwakuri, aomata ni kabane inanon te utu a ibuobuoki ni kanakoa rabunan te ‘umu. A kaotinakoa te beeki are e niiraki n taian baanikai, te ika, ao te mai ake a umunaki inanon te ranniben. Ngkanne a niira te amwarake inanon te kuunikai ao ni uotia nakon te kawai n tataninga te bwati.
A kaitibo ma tabeman utu n te kawai, ni kabane ma oin kanaia. A bane ni momoangare ao ni marooro ngke a uaia n toka n te bwati. Siloti e kunea te tabo ae mwaawa irarikin tinana. E aroka boin te amwarake ae kangkang ngke e buti te bwati n te kawai ae aobuaka.
E a roo ngke e a roko te bwati n te umwantabu. Inanon te umwantabu, e katorobubua Silioti ma ana karo, mwaanena ao tarina, ao 100 riki kaain ana Ekaretia Iesu Kristo ibukiia aika Itiaki ni Boong aika Kaitira.
N tain te tataro, e tataro Silioti inanona, “Taiaoka kamarurunga Beretitenti Kimball.” E ataia aomata ni kabane inanon te ruu a tataro n te aekaki naba anne. Ana namakin ae rau inanona e tuangnga bwa e bon MARURUNG Bereitenti Kimball.
Ngke e kaurei matana e nooria aomata ake irarikina ma rannimataia iaon ubuia. Aomata aikai ni kabane a tia n aki mamatam, ao e a tia n aki mamatam ma ngaiia. E bon kaangaanga, ma e a tia ni karaoia!