Te Anene ibukin Manon
Te waaki ni kakukurei are e boo n te tairiki e kanoaaki ma kamataku ake a kaota aron te tangira ae moan te bati ibukiia kairake n ataeinaine n tatabemaniia nako.
Kamataata n te korotameni iroun Elizabeth Thayer
A rangin ni kukurei ataeinaine. Ni koauana, te uoote ae bwanin i Buranti Maiaki a kukurei. Ni kaungaakin te katiteuanaaki ae moan te korakora, ikawai n te bootaki n ataeinaine a bairea ana reitaki ni waaki ni kakukurei te uoote, ma te katairiki ao te kamataku. N ataakina bwa te Biiaiwe, te Mwaia Meite, ao te Raoroo a kaman tia n reiakin kuuna ao mwaie n tain tabeua waaki ni kakukurei, taan kairiiri a kaoiia bwa a na katauraoa te kamataku ibukin kanoan te tairiki.
Ao ngaia are ataeinaine n te uoote a moanna ni kakorakoraiia n rei—ngaiia ni kabane ma tii temanna. Manon e aki kona ni kamataku. E a kaman bwainaorakiaki ibukin te kaentia n ae riaon uoua te ririki.
Manon C., ana ririki 16, e teimatoa n roroko ni bootaki ao waaki ni kakukurei n angin te tai n aron ae konaa, ao n taainako e kaota momoangarena e ngae ngke tera te bwai ae e rinanona. Ma n tain kabonganaan keemikoro ni katokan aorakina (kemoteerabi) n tabetai ai bon akea korakorana ni karaoa riki are iaona nakon ae e na rawea motirawana. Kaain te uoote a karaoa aia aki mamatam ao a tataro n te tai ae bati ibukina. Akea ae e kantaningaia bwa e na rei ke e na mwaie.
Ma e kona n roko n te katairiki. Ngaia are e aera ngkai tiaki anga te tairiki aei bwa ara karinerine nakon Manon?
Te Tairiki n Anga te Karinerine
A bane ni kukurei aomata n te iango aei.
“Ti tangira Manon bwa e na namakina tangirana man te uoote ao boutokaakina,” e kabwarabwaraa Emma S., 16. “Ngkana e tangiria ara uoote bwa e na riki ni katiteuanaaki, tera te kawai ae tamaroa ae e na karaoaki nakon ae te reitaki ni waaki ni mwakuri ni kaota ara tangira ibukin Manon?”
E a karaoa te mwakuri ni katauraoi te uoote ae bwanin. Utu a karekei mwiokoaia ni uoti amwarake ibukin te katairiki; te Bootaki n Aine e ibuobuoki ni karaoi kunnikai ibukiia ataeinaine ake a na kabonganai n te kamataku; kairake n ikawai a anga aia boutoka ni katauraoi bwaai aika a maiu man te iti (te taura, bwanaa ni katangtang, ao tamnei ake a kaotaki n te tikuriin mai buki) ibukin te rei ao te kabanea ni kamataku; ao mwaane n te nakoanibonga a ibuobuoki ni barongai taibora ao kaintekateka.
Mwakuri ni kabane a karaoaki mairouia kaain te uoote ake a maeka n ae raroa n te aono ae moan te bubura. “Kairake n te uoote a rangi ni uakaan n aia namakin,” ma ti maeka n ae raroa,” e taku Aiolah V., 16. “Ti aki nonoorira n te reirei, ibukina ti maeka ni mwakoron te taaun aika kakaokoro, ngaia are ti karaoa ara mwakuri korakora ni kakoaua raoi bwa akea temanna ae e na tiku.”
“Ti rereitaki n taainako, e rarabwa taian tareboon,” e taku Inka S., 15. “Ti reireiniira i bon imarenara man tibwauakin baika ti rinanona aika kakaokoro. Ti ataia ti kona n onimakiniira i bon imarenara, ao ti kataia ni kaoti banna ni katooto aika raraoi i bon ibukira n tatabemaniira nako. Kairake n ataeinaine, ake a tangiria ni kan rereitaki ngkana a konaa, a kunea bwa te rei ibukin te kamataku n te katairiki e karekei riki rakan kakabwaia ni kakorakora te iraorao.
“Imwaain waakinan ara rei, I bon maamaa,” e kabwarabwaraa Inka. “I maaku rimwi e bure au kai. Ma ngke ti mwaie n te kurubu, I kararoa maamaau. I ataia bwa ai bon te tai aei ni kaotia nakon te uoote bwa ti karaoa te mwakuri korakora.”
Manon e nanorinano ao ni kakateke. “Ngke a tuangai taekan te katairiki ao te kamataku ao N na riki bwa te aomata ae e rine, I taku bwa N na aki rau ngkai e korakora aia kekeiaki ae a karaoia ibukiu,” e ururing. “E ngae n anne, I kukurei ni mena ikekei!”
Te Kamataku n Tangira ao ni Boutoka (nakon Manon)
Ni waekoan rokon te tairiki are e na karaoaki iai te bootaki ni kakukurei, ao bon te tai ae kororaoi ni kaotan te tangira ao te boutoka ibukin Manon. “Te amwarake, ni koauana, e nakoraoi,” e taku Aiolah. “Aio Buranti, n te koaua!”
Ao ngkanne te kamataku—ae aranaki bwa te tai ae kakukurei i Buranti—e kamiimi. Taian takakaro, anene, ao mwaie a kakukureiaki iai taan mataku. Ngkanne ataeinaine, n aron te kuaea ni bootaki, a katauraoa te tai ae moan te kakukurei n aia kamataku. A kamataku n anene nakon Manon, te anene are e koreia Emma ao ni kanakoraoia n te katangitangi i bon irouna. Mwanewen te koorati e kakimototoa ni kabwarabwara te tangira ao te boutoka are tangiria bwa e na namakinna Manon.
Taiaoka tai kabwara nanom,
’Ibukina ti kakoaua i nanora bwa ko na kamarurungaki,
Ao tai mwaninga bwa antai ngkoe,
’Ibukina ti kakoaua i nanora bwa ko na kamarurungaki.
Ngkai ataeinaine a kamataku n anene, taraan ae kanga aomata ni kabane n te uoote a kaota te aekaki n namakin anne, tao i bon inanoia. I namakinna bwa ana anene Emma ae bebete e bitaki ni kabwarabwaraa te iango are e korakora namakinana inanoia Aomata Aika Itiaki n taabo ake a mena iai—te kuna n ninikoria ao n nanoanga; utu ao raao; katiteuanaaki, onimaki, ao te kantaninga; te tataro are e ongo karawa.
Nanoia taan kairiiri ni bairean te reitaki ni waaki ni kakukurei bon katiteuanaakin te uoote. Katabuan te tairiki akon Manon tiaki n tii buoka kakoroan nanon te kouru ma ni karaoa te iango n boutoka ae reitinako ibukin Manon ao ana utu ao te atatai bwa natin te Atua ni kabane a kakawaki. “Bon ana kouru te Ekaretia ni buokiira ni kaanira riki ma te Tama are i Karawa ao Iesu Kristo,” e taku Aiolah. “Ti ataia bwa A tangiriira ao ti aki maroaa.”