Bwanaaia Aika Itiaki ni Boong aika Kaitira
Karaunano imwiin Bwakan Natiu
Kamataata n te korotamnei iroun Allen Garns
Te bwi ma wanua te wiiki n au kaaua n namwakaina ni bikoukou, I uti ao ni kunea bwa iai te raaraa ae nako teutana mairou. I namakina te raraoma ngke e aki toki te raaraa, ngaia are I a baireia bwa N na nako n te ruu ae te imetientii.
Inanon butiu ae moan te abwabwaki nakon te onaoraki, iai au kantaninga ao n tataro bwa a na nakoraoi bwaai ni kabane. I taku bwa te bwai ae buakaka ae e na riki e na bae te taokita n tuangai n rawea motirawau iaon te kainiwene tabeua te bong.
Ngke I a karinaki n te onaoraki, a karaoi tabeua tutuo taan mwakuri. A kunea bwa e aki kakamwakuri buroon te ataei. N te tutuo e “mate te ataei inanon te biroto.” Akea te bwai ae e kona ni karaoia te taokita n te iango ae riaon riki anne, ngaia are e a kaotinakoai man te onraoraki.
I okira mweengau ma namakinan te nanokawaki ao te maaku. I aki kona ni matu n te tairiki anne. Ngke I teirake man au kainiwene n te ingabong are i mwiina, I kanamakinna N na riai nako n ira te tetere ibukin te entaumente n te moaningabong n te tembora.
Ni kaanian banen te tetere, a toka matau iaon taian mwamwa ni mare ao ni kabae ake a nim iaon baiu. Bon ana bwai tibutoru are I aranaki imwiin arana. E mate ngke nimaua au ririki, ao I a tia ni wareka rongorongon maiuna n te tai ae nako. I uringnga bwa a mwaiti ana tai ni bwabwaka natina inanon ana tai ni bikoukou ngke uabwi tabun ana ririki.
N te ingabong koraki I kataia ni kakorakoraai n aki tang n nanokawaki ao ni maaku, ma n te tai anne, I namakina te rau. I namakina karauan nanou. E a tia tibutoru te unaine n rinanon taneiai ni kakatai aika ti te arona inanon maiuna, ao e a tia te Tia Kamaiu ni buokia. I namakina te kakoaua bwa E na bon buokai naba.
“Ao e na uota iaona mamaaraia, bwa e na on nanoia ma te nanoanga ni kaineti ma te maiu n iriko, bwa e na ataia ni kaineti ma te maiu n iriko bwa e na kanga ni buokia ana aomata ni kaineti ma mamaaraia” (Aramwa 7:12).
I kakaitau n ae korakora ibukin te rau are e kaoti man kakawaran te tembora, ibukin aia kakaonimaki au bakatibu, ao ae moan te kakawaki riki, ibukin ana karea ni kamaiu te Tia Kamaiu Iesu Kristo.