Kairake
Ngke e Mate Raoraou
E maeka te tia korokaraki i Utah, USA.
Inanon au ka te 16 n ririki n te kauarinan, e tibu kaburoron raoraou ao e mate n te bong are imwiina. E ngae ngke I kaaina te Ekaretia, I teimatoa ni karawawataaki. I a kaman tia n reireinaki inanon maiu ae bwanin bwa I kona n rairaki nakon te Tama are i Karawa ao te Tia Kamaiu ibukin te bwai are I tangiria, ma I bon tuai n rinanon te aekaki ni bwai aei mai imwaaina.
I tang inanon tabeua te aoa, ni kataia ni kakaea te bwai teuana—te baere—e na anganai te rau. Te tairiki are e mate iai, I rairaki nakon te boki n anene n taromauri. Ngke I eietabaana, I kauka te boki n anene nakon “Tiiku Irou; ’Bwa E a Kaan Bong” (Kuna n taromauri, nambwa. 165). E anaaki nanou n te katenikibu:
Tiiku Irou; ’bwa e a bong,
E kamaroaa te bong
Ngkana I aki reitaki ma ngkoe,
Ke n aki kuneko n ootau.
Roon te aonaaba, I maakua,
E na tiku ni mwengau.
O te Tia Kamaiu, tiiku irou n te bong;
Nooria, ’bwa e a bong.
Te kibu aei e kaonai ma te rau ae bati. I ataia ngkanne bwa e aki ti kona te Tia Kamaiu n tiku n te tairiki anne ma ngai ma E ataa raoi naba are I namakinna. I ataia bwa te tangira are I namakinna rinanon te kuna n taromauri e aki tii buokai rinanon te tairiki anne ma e uotai naba rinanon tabeua kaangaanga ake N na kaitara ma ngaai.