Desideria Yáñez: Te Bwaeoniia ibuakoia Aine
I mwiin miina e a kairia nakon te euangkerio are e a tia ni kaokaki, te Aomata ae Itiaki are ngkoa mai Mexico e riki bwa te bwaeoniia ae kakaonimaki n te Ekaretia.
Kamataata n te tamnei iroun Kathleen Peterson
N te tairiki teuana ni moan te 1880 e matu Desideria Yáñez n te auti ae baobao taubukina ae kamwengaraoi n te tabuki ma arokana aika kariin ni maten baaia ao ni kateketeke i Nopala Mexico. Ngke e mii, e noora te boki ae te bamburete n atuunaki Voz de Amonestación (Te Bwanaa ni Kauring) are e na bita maiuna ao ni buoka maiuna n tamnei. Ngke e a uti, e ataia bwa mwaane ake a booretia te bamburete a mena i Mexico City.1 E ataia naba e bon kaangaanga rabwatana ni mwananga 75 te maaire (120 te kiromiita) nakon te kaawa, ma e motikia bwa e na irira te namakin ni miina ao ni kakaea te kaeka.
Ana Onimaki te Utu
E marooroakina miina Desideria ma natina te mwaane ae José. E kakoaua neiei ao e mwananga nako Mexico City n oneamwiina. E a moanna ni ingainga ni kan marooro ma aomata ao n te kabane e kaitibo ma kaain te aro ae Plotino Rhodakanaty, are e kairia nakon te Outero ae San Carlos.2
N te outero, José e kunea Unimwaane James Z. Stewart ni kaeta te kaobii are e booretia Parley P. Pratt Voz de Amonestación, te bamburete are e nooria naba Desideria inanon miina. I mwiin marooron José ma Unimwaane Stewart ibukin miin Desideria, mitinare a angan José tabeua ana bamburete te Ekaretia, n te tai are Voz de Amonestación e tuai ni bobonga booretiana, ao Unimwaane Stewart e korea taekan te marooro ae kakukurei inanon ana tienoro.3
I mwiin te mwananga ae abwabwaki n te kawai ae bubu, e a manga kaitibo José ma tinana. N reiakinan koauan raoi te bamburete, e ataia Esideria bwa e bon koaua miina. E kamatebwaia te bamburete are e uotia José nakoina, ao aan reirein te euangkerio ake a mena inanona e riingaki iai nanona. E tangiria ni kan bwabetitoaki.
E kuneaki iroun te Mitinare
Ibukina ngkai e teimatoa Unimwaane Stewart ni katiaa Voz de Amonestación, Unimwaane Melitón Trejo, te mitinare mai Tibein, e kamwanangaaki nako Nopala bwa e na kakaea Desideria ao José. N Eberi 22, 1880, Unimwaane Trejo e bwabetitoa Desideria Quintanar de Yáñez, José Maria Yáñez, ao natin José te aine ae Carmen. Desideria bon te ka 22 n aomata ni bwabetitoaki n te Mexico Mition ao te moan n aine i Mexico nuuka.4
Rimwi n te namwakaina anne, José e okira riki kawan Mexico ao n okira mweengana ma 10 katotoon Voz de Amonestación. N te kabane ao e a noora te bamburete Desideria inanon miina. Irouna te bamburete bon te kauring ae rabwata bwa e kanga te Uea ni mwakuri nakoina n ae onoti ao ni kairia nakon te euangkerio ae e a tia ni kaokaki.
Ana Boki Moomon n te Moan Taetae n Tibaeniti.
N ana ririki ae 72, e kunea Desideria bwa e tabe ni kekeerikaki marurungin rabwatana. N te 1886 e aki kona ni kitana mweengana ae uarereke i San Lorenzo irarikin Nopala. N te tairiki teuana ae kakamaaku, taan ira a urua ana auti ao n rin inanona, a tiriboia, ao ni birinako ma $3,000.5 E maiu Desideria. N oneamwiin buan te kantaninga, e kakantaninga Desideria inanon te onimaki ibukin ana ibuobuoki te Uea. E a kaman reiakinna man miina bwa te Uea e ataa ana kaangaanga.
Ngkanne n Okitobwa 1886, te Abotoro ao uoman beretitenti n te mition a karina n roko ni kawara te aono E tuangiia José Yáñez taekan korakain tinana. A waekoa n roko taari aikai nakon mweengan Desideria. E kukurei Desideria ni kaiitibo ma Unimwaane Erastus Snow man te Kooram n Abotoro n te Tengaun ma Uoman ao ni katokai baina i aon atuuna ao n anganna ana kakabwaia te nakoanibonga.
N rokoia taari aikai, te berititenti ae boou n te mition, Horace Cummings, e miimi iai Desderia ma rongorongo aika kakawaki. E tuangnga bwa moan rairan ana Boki Moomon ae bwanin n te taetae n Tibaeniti e a kaan tia i Salt Lake City. E waekoa Desderia ni bubuti katootoon te boki ae tabu ae e a kaan tia.
Teuana te namwakaina imwiina, Beretitenti Cumming e oki nakon mweengan Desideria ma katootoon te boki. Man te bwai are e rinanona, e koreia, “Kawarakin te unaine ae Titita Yáñez, ae kainnannoa buokana ao e anganna ana Boki Moomon are I kanakoa nako Utah ibukina. Bon te moan taetae n Tibaeniti are a karekeaki i Mexico. … E rang n taraa ni kukurei iai.”6 Aio bon ana kabanea n roko te mitinare ni kawara Desideria inanon maiuna.
E tionako ma e aki Mwanuokinaki
N 1889 10 te ririki i mwiin rokon te euangkerio i Mexico nuuka, taan kairiiri n te Ekaretia iai aia kanamakin bwa a na kanakoi bwaai n ibuobuoki n te Ekaretia ni katei taian korone i Mexico meang. Kaain te aro i Mexico City, tao 1,000 te maaire (1,600 kiromiita) man taian korone, n taraakina kanga ai aroia tiibu ake akea aia tia kawakin tibu n aroia mitinare ngkana a nako meang. E ngae ngke e mena ibuakoia ana utu, e ataia Desideria bwa a riai ni kamwakura te euangkerio n te tabo ae raroanako. E nanonaki n ae e na bon aki kona n reke ana tai n ira te Bootaki n Aine ke ni karekei kakabwaia man te tembora ngkai e maiu.
Ma e ataia bwa te Uea e kinaa. Rinanoia Ana toro, te Uea e kaota Ana iango ni buoka temanna ma temanna nakoia Ana nanai. Ibukin miina, ana kakabwaia te nakoanibonga, ana Boki Moomon, e a kona Desderia ni kaota ana koaua ae matoatoa bwa te Atua e tabeakina kainnanona ni maiun rabwatana ao n tamneina. E ngae ngke te rabakau aei e aki katoka kataakina ma kakaewenakoana ake a kaoti inanon maiuna, e anganna te onimaki bwa te Uea e na katoka rawawatana n taainako.
Te Aroaro ae Teimatoa
N 1903, a oki mitinare nako Mexico maiaki ibukin te moantai man 1886. A kaitibo ma José, are e kakimototoa ni karakina aroaron Desideria ma teimatoana ni uaa te toki ao ana onimaki man taku bwa buuna te aine ao tinana “a mate ma aia kakaonimaki ae bwanin n te Moomon” ao bwa iai a ana “kantaninga ni mate inanon te moomon.”7
I mwiin miina, e moana tikuna Desideria ni kawain te euangkerio, n riki bwa te bwaeoniia n te Ekaetia i Latina. Uaan te onimaki are e unikaki rinanon te mii n 1880 e aki matebuaka; e bwebwerake ngkai e karaoa ana berita ae tabu Desideria n te bwabetito ao n rinanon kataakina inanon te onimaki. E na taraa ni bebete iroun Desideria ni mamaara n te maiu n tamnei ngkai ngaia ma ana utu a maiuakina te euangkerio n te tabo ae tionakoma kaain te Ekaretia, ma e teimatoa ni waaki nako. E ataia e tabeakinna te Atua ao n tararuaia ni mwakoron ana aonaaba ae uarereke.
E ngae ngke e aki kona ni kitana mweengana, e riki bwa te katooto n te onimaki, botumwaaka, ongotaeka, ao te tia kamanoia tiaki tii ana utu ma nakoira n tatabemaniira nako n reitanako taimneia bwaeoniia.