Bwanaaia Aika Itiaki ni Boong aika Kaitira
Katokaana ao Tibwauaan te Euangkerio
Kabwarabwara n te tamnei iroun Allan Garns
Te buti ni kawain aban Engiran n taabo ake aoatata e rang mabu man rau iaon ni kawaiu nakon te umwantabu ni moaningabongin te Tabati. Iaon kawaiu I noora te unaine n iteran te kawai. N na baireia bwa N na waekoa n tei ke N na aki ao n nooria ngkana e kan toka.
I namakinna bwa I riai n tei. E tuangai arana ae Mary ao e taku bwa e a tibwa roko naba n te tabo arei. I kunea bwa tabeua te teekan imwiina ibukina ke tabeua te teekan imwaina ibukiu ao ti kona n tibanako mai iroura. Bon te tai ae rokoraoi!
E tuangai te tabo are e tangiria n nako iai, ao e bon kaan ma te umwantabu. I taekinna bwa bon iaon kawaiu n nakon te umwantabu ao I titirakiina ngkana e a tia n ongo taekan te Aro. E taekinna bwa iai ana onimaki iroun te Tia Kamaiu ma e uarereke ana atatai irouia aika Itiaki ni boong aika Kaitira. Ngke ti buti I tibwaua te euangkerio ma ngaia.
Ngke I nikira Mary, I tuangnga bwa I kona ni katoka n okiu man te umwantabu ngkana e bwara te taromauri. E kariaia, ao ti bairea bwa ti na kaitibo n te umwantabu. Ngke I nakonako nako nanon te umwantabu, I kuneia mitinare ao I butiia katotoongan ana boki Moomon bwa a na angan raraou ae boou. Imwiina, ngke e roko n te umwantabu, kain te aro a rangi n iraorao ao a tibwa aia koaua nakoina.
Ni butira n oki I tuanga Mary e kona ni karaka riki ana atatai iaon Iesu Krito man warekan ana Boki Moomon. I tuangnga naba te tabo are e kona iai ni karekea rongorongon kaotin te Tia Kamaiu nakoia Nibwaite. E ngae ngke reken ana tai ma Aika Itiaki ni Boong aika Kaitira e uarereke taina, I ataia iai te bwai ae e a tia n namakina. I kabwaka Mary n te tabo are ti kaitibo iai. I aki kantaningaia bwa N na manga noria riki.
Ngke I buti n okira mweengau man te mwakuri n te bong are imwiina, te karao kawai e kairai nakon te kawai ae I aki totoua mai imwaina. I kubanako ngke I a manga noora Mary! Ngke e noorai, e moangare. I kukurei ni manga katoka.
I tuai manga noora Mary imwiina, ma ngke I uringa are I rinanona, I kakaitau bwa te Uea e a tia ni karekea au tai n tibwaua te euangkerio. I ataia bwa te Uea e kakabwaiaira ma ana tai ae kororaoi.