Kaikawaakin Natira te Mwaane n ara Reitaki ma te Atua
E maeka te tia korokaraki i Utah, USA.
Ngke I reiakina kamanenaan bwaai n ibuobuoki n te maiu n tamnei ake a tauraoi nakoiu, I karekei iango ni kawai ake a na buoka iai natiu te mwaane ao ni kona ni kaitaraa oin kataakiu.
Kamataata n te tamnei iroun Robert Hunt
Au taratara n te nakoa ni karo bon teuana ataakin raoi te riai irouia ataei ake a kunnikaiaki n ae tararaoi n taainako ao n aki kona ni bareka. I waekoa ni katamneia te atatai are I mateakinna ngaia bon te kario iango. I rikirake ni kariaia au auti ae barekareka ao bwairi aika a ngako ibukina I ataia bwa a kaoti ma kakabwaia aika moan te kamiimii ake I kona ni karekei. Ma te bwai are I aki kona n iangoia bon te korakai are N na kaitaraa ngkana I kaikawairake natiu, ai moararariki natiu te mwaane ae Brad.
E kaoti inanon te maiu aei Brad n aron te ataei, ma e aki rang maan ibukira ae ti na ataia bwa iai kaokorona. E aki kona n nako n te netiuri n akea kainnabau ke ngai ma ngaia ibukina bwa e bon rang kakan unuun. Ngke e a ikawai ao n takakaro ma ataei, e kainnanoa reitinakon tararuana. Ngke ti ukoukora buokara, ti tuangaki bwa ti riai n teimatoa n reireinna. Ti karaoi bwaai ni kabane ake ti kona n iangoi: ti kakae i aonraain, ti wareware ni booki ni wareware n nakoaia kaaro, ao ni bubutia taokita ao kaain te utu. N te kabane, ngke e a moana ana reirei Brad, e kuneaki bwa e karako ana kakamwakuri ma nakobuakan ana kakaungo, ke ADHD, n ai aron naba ana kaangaanga aika mwaiti.
N te moan tai ti namakinna bwa iai ara kantaninga. Ngkai ti a karekea ana kukune te taokita, ti a moanna ni karaoa te baire ni kamarurung. Ti kantaningaia bwa e na iai buokakin Brad ni bwainaoraki ake a buokaki iai tabeman. N aki tekeraoi, anuan Brad iaon bwainaoraki e rikirake ni buakaka ngkana e aki kabongana, ngaia are e a riai ni katokia. I namakinna bwa mwakoron au kantaninga e a bua.
N te bong teuana ngke onoua ana ririki Brad, I kaitaraaki ma teuana rootakin ana namakin. I a tangiria ni kabwara nanou. I nakon au ruu teutana te tai ni bon tii ngai, ao a waanako ranin matau iaon ubu. I tataro ibukin te korakora bwa N na konaa ni kaaitarai taai ni maatu ngkana a kaoti. N na kanga n teimatoa ni karaoa aei, te bong teuana ma teuana? I namakinna I tuanako ma te bwai are I kona ni kaitaraa. E oota te Tama are i Karawa n aron rawawatan te kaangaanga? Ngkana e tangirai raoi, I iangoia, E na kanakoa te rawawata aio mairou ao ni kaoka marurungin natiu. Iango ma namakin akana a katobibiai akanne ngke I kataaki are I kaitara ma ngaia e rikirake ni buakaka n oneamwiin te nakoraoi.
Rikin ni Koaua te Kataaki
I taku bwa I oota n taian kataaki. Ti bon riai n rinanona n ai aron te bwaata ae kabueeaki iaon te ai ni umuumu. Ti riai n rinnako ao n otinako man te ai, ao ngkanne e na oki te maiu nakon arona are mai imwaaina ni karokoa te raaun are imwiina ni kabuebuena ao uranana. Ma I a kaman tia ni kaitaraa te kataaki aei inanon ririki, ao e aki toki. I namakina te rawawata bwa e rikirake, ao namakinan te mamaara e kananorinanoai ni bubuti buokau rinanon te tataro.
I ataia ngkanne bwa te tabo are I riai ni kawaria ibukin karauan nanou ao te atatai bon te tembora. Man ana kairi te Tamnei, I nooria bwa ti aki kona n rinei kataaki ake ti karekei n te maiu aei ke maanra ae a na toki iai. Te bwai are ti kona n taobaraia bon te kawai are ti iangoia ao ni mwakuri ngkana a roko taian kataaki.
I nooria bwa bukin namakinan te rawawata i bon ibukiu ibukina bwa I kariaia te nanoanga are e a kaona nanou. Te moan bwai are I baireia bwa N na karaoia bon katokan iango n tarai baika a kabwaka ake a kaoti n au iango, n aron ae “E katanginano aio,” “I aki kona ni karaoa aei,” “Bukin tera e aki kona n okira aron rikina Brad?” ke te bwai ae te kabanea ni buakaka are a karika te iango n taraakin baika a kabwaka, “Ngai tao te tina ae buakaka.” I mwakuri korakora ni katoka iangoakin baika a kabwaka i atuu, ao I nooria bwa bwanaau raoi e a taotaonaki n nano riki ao n tangira ngke I barongai aroia natiu.
I kaungaai naba n iangoan baika a raraoi. I moanna n iangoia,“E tamaroa ae ko karaoia,” ao N na boni bae n anganai kamoamoaakiu, n aron ae “Kauarerekea bwanaam ao tai takaarua. Arom ae ko na katotoonga!”
Onimakina te Atua
Imwiin te bong ae onoti ae kaangaanga, I titirakina kainaabau bwa e na anganai te kakabwaia. N tain kakabwaiakiu I kauringaki bwa Ngai natin te Atua te aine, E kinaai ao e atai kainnanou, ao natiu te mwaane bon natin te Atua te mwaane. Brad bon natin moa te Atua, ao Ngai ma kainnabau ti ibuokanbwai ma te Atua n tei ibukin Brad. I nooria bwa I aki bae ni kamanenai bwaai ni mwakuri ni kabane ake a katauraoaki n te ibuokanbwai ibukiu. Ngai ma kainnabau ti karaoa ara kakae ao ni kunei bwaai n reirei aika mwaiti ibukin buokara, ma ti mwaninga teuana are te kabanea ni kakawaki: te tataro.
I moanna n tataro ni katoa bong bwa N na kanga ni buoka Brad. Ngkana e a roko te namakin ni kakaiun irouna, N na bae ni waekoa n tataro ibukin ana kairi te Tamnei imwaain kawarana. Ngkai I onimakina te Atua ibukin au boutoka ma ana kairi te Tamnei ibukin natiu te mwaane, I a moanna n oota bwa aekakira arou ao tera ae I kona ni karaoia ibukina. I keiaki n ira ana taeka Aramwa: “Ao aio au kakatonga, bwa N na kona n riki bwa te bwai ni mwakuri inanon bain te Atua” (Aramwa 29:9).
E waekoa te bitakil I iangoi iango ao kawai ibukin buokan Brad. I kamanena te bootaki n utu n te tairiki bwa te bwai ni mwakuri ao n tataro ibukin iango bwa tera ae N na reireia. I wareki naba booki aika tabu ma nanou raoi ao ni kinai taeka n reirei irouia kaaro ake a mena inanona. I a moanna ni kaonaki ma te kantaninga ao te raunnano.
Ngkai ti reitinako ni kamwakura te iango are Ngai ma kainnabau ti ibuokanbwai ma te Atua n tararuakin natira ao ni kamanenai bwaai ni mwakuri ake E a tia n anganiira, I a moanna n onimakina riki te Atua. I ataia bwa au rabakau n tararua n aron nakoaia kaaro e karako, ma te Tama are i Karawa ae tangira are e atai bwaai ni kabane ao n tangira natiu te mwaane nako are I tangiria e kona ni buokai n riki bwa te tina ae tamaroa ao ni korakora. Ao e ngae ngke I teimatoa ni korakai, I ataia bwa e na reke iaa buokau. I ataia ngkai bwa tabeua kataaki akea tianakin taia, ma ngkana I kateimatoa matau iaon te bwai ae akea tokina, e na buokai te Atua.
Karekea te Kimwareirei n te Tai ae Uarereke
Ngkana a rang nakobuaka taai, I reireinaki ni karaurau n anaa te tai ni kimwareirei ni bwaai aika tamaroa riki—bwaintangira—ake ti anganaki. Ngkana e rawa ni kairoroaki natiu te mwaane ni kiitinai, I bon kakaitau. Ngke I matakuakina natiu te mwaane n toka n te bwati n akea temanna ae e na tekateka irarikina, I kakabwaiaaki ni karekea te boki ae tabu are e kaoti n au iango: Bwa E na nako n rimoara. E na mena i angataira ao i angamaingira, ao E na mena tamneina inanora, ao Ana katobibiira Ana anera, ni uotira rake (taraa D&C 84:88). I ataia bwa e aki maroaa Brad ao e na bon aki.
Boni ngaira te utu ae akea tokina, ao ma aia ibuobuoki aomata ake a tangiriira ao Tamara are i Karawa ae tangira ae tararuaira, I kona ni butimwaai bwaintangira aika uarereke ake I anganaki ni katoa bong ao n namakina te kimwareirei ao te kukurei are ti bon riai ni karekei. Ao ma kakabwaia akana a uarereke akanne ao ana ibuobuoki te Uea, I kona n riki n are N na bon riai n riki iai, n aki tabe bwa maanra anaakina.