Bwanaaia Aika Itiaki ni Boong aika Kaitira
E Rarikin ma E Onrake n te Onimaki
Kamataata n te Tamnei iroun Carolyn Vibbert
Imwiin au beku i Biribin Cagayan de Oro Mition, iai nanou ae korakora bwa n na ira aia reirei burabeti ao abotoro ni mare n te tembora. Angiia au koraki aika tiaki kain te aro ao raraou, ao bon tabeman kain te aro, a taku bwa I riai ni karekea moa au tekurii ke ni karekea au mwakuri ae tamaroa imwain ae I iangoa te mare. Ngai naba I aki iangoia ni karokoa I a kabae.
E bon nako nanou, ma I uringa karakinan BeretitentiI Gordon B. Hinckley (1910–2008) ngke e karekea te wewete bwa e na nako ni mitinare i England. E katauraoi ni kamwananga i nuukan bwakan kaubwain te aba ao raraoma ake a katabeaianga. Bon imwain nakona, tamana e anganna te kaati ma taeka aika nimaua iaona: “Tai maku, ko na ti onimaki” (Mareko 5:36). I uringa naba ana taeka au bitiobi: “Bwaina te onimaki. E na katauraoi bwaai te Atua.” Taeka aikai a kaunga nanou ao a anganai te korakora ni waaki nako.
E ngae ngke I rarikin, I mare ma au kabae ae tangiraki n te Tembora i Manila i Biribin. Tabeua te tai imwiina I a mwakuri n te kambwana are e tangirai bwa N na mwakuri n te Tabati. I tangiria ni kawakina mimitongin te Tabati, ngaia are I taua te mwakuri aei n te tai ae uarereke. A mwaiti aika a titiraki bwa e aera I kiitana au mwakuri, ma I kataia n teimatoa, ni kaokiokia ibon irou te taeka ae “Bwaina te Onimaki. E na katauraoi bwaai te Atua.”
I waaki ni kabuta te bao ao ni mwakuri bwa te tia kabonakoi bwaai ni karekei kainnanora ao ni katauraoi imwain bungiakin ara moan nati. Kainnabau e ataia ae I a rangi ni kua ni kataia ni karekei bwaai ibukin ara utu. E tuangai bwa I riai n oki nakon te reirei, ma I taku bwa e na bon kaangaanga ae ko na mwakuri, beku n te Ekaretia, ao n riki bwa ataein te reirei.
I bon eti, bwa e bon matoatoa. Ma ti karaoa ara kabanea n tamaroa ni kawakin tuua. N tainako e na aki tau ara mwane, ma man ana ibuobuoki ana Mwane n Reirei ae Teimatoa te Ekaretia ao I a kona ni kabanea au reirei imwain bungiakin ara kauoman n nati. E reke au mwakuri bwa te tia reirei n te kauarinan ao n tokin te tai I a riki bwa te Kouoteneita n te Tieminari ao Intitute.
Imwiin irakin aia reirei burabeti ao taan kairiiri tabeman n te Ekaretia e buokai n ataia bwa te mare e karekei tibwanga aika a korakora ibukin te rikirake n te maiu n tamnei ao te nano ni mwaane. I a tia ni kakabwaiaki ibukin au mare ao te euangkerio.
Ti aki riai ni maaku, riki inanon kaangaanga aika matoatoa. Ti na tii riai ni karaoi ara kabanea n tamaroa n uringii taeka aikai: “Bwaina te onimaki. E na katauraoi bwaai te Atua.”