Bwanaia Aika Itiaki Ni Boong Aika Kaitira
Anera a Uota te Oota nakon Mweengau
Moaningabongin te Tabati teuana I titirakinaki ngkana I tangiriia taan reirei n te mweenga ni kawarai. I a bon tiba buuraure n te tai ae aki maan ao I mena n te tai ae matoa n aron te maiu ni mwakuri iroun te tina ae iai natina uoman aika uarereke. I taku I butimwaea kawarakiu. N te tai anne, I bon namakina te un n arou ao n namakina te kakorakora n tiku n tii ngai.
Te wiiki are imwiina, uoman taari mwaane aika tamaroa a roko ni mweengau. Inanon aia kakawari a titiraki n aron te titiraki ae babainaki ao n tibwaua rongorongon te euangkerio ae uarereke ma au utu.
Ngkanne taari mwaane aika tamaroa aikai a titiraki, Titita Nereida, tera ae ti kona ni buokiko iai?”
N aki iango teutana n aron taekana, I tuangiia wiikin te taura aki ura ietan te kaintamwarake ni uaerake nakon te kauoua ni burooa. Iai onean mwiin wiiki, ma I aki kona n rootia ieta teutana ibukin oneakiia, ao I raraomwa ni kabongana te kaintamwarake iaon te tabo n tamwarake. I tuangiia naba bwa akea te taura ibukin te mwakuri mai bukin te auti.
Ngkekei naba a teirake. Temanna e otinako nakon ana kaa ao e oki ma baoki ni mwakuri. Teuaei e kan roko abwakina onoua ao te itera te buuti (1.9 m), ngaia are e tamwarake n te kaintamwarake ao n onea te wiiki ma akean ana kaangaanga. N te tai anne naba, toana e nako mai bukin te auti ao e noora toman te uaea are e okirikaaki. N te tai ae tawe e reke angan karaoana.
Ai kukureira ngai n reken au tia reirei n te mweenga n te ririki ibukin aia mwakuri n akoi, tangira ao mwakuri n anganano ao ibukin tamaroan te reirei ae a reireinai. Au tia reirei n te mweenga bon anera ni koaua ake aki tii uota te oota nakon mweengau ma a uota naba te rau, kantaninga, ao te kamanoaki n te euangkerio, are e uota te oota nakon aekan nako rotongitong.