Te Kawai nakon Tion
E maeka te tia korokaraki i Texas, USA.
Richmond, Missouri, Tuun 2, 1862
“Mary, tera ae e ko nooria?” Tinan Mary te kauaei e amarau n taetae man ana kainiwene n aoraki.
“E taraa n ae tabe ni kaan te buaka,” e taku Mary, ngke e tara tinaniku man te winto. Te buaka imarenaia kaain Amerika maiaki ao meang e a tia n riki tabeua te kiromiita raroana. Rebwen taian katii e kaona te eea ma ngke e ingabong. Mary e rairaki nakon tinana te kauaei. “I rangi n nanokaawaki. I taku bwa tiaki kona ni kiitana te auti n nakon te taokita.”
Mai kaaniiko riki.” Mary e tekateka n uakaan nakon te kainiwene ao e ana bain tinana te kauaei. “I ataia bwa tamam e tuai ni marurung,” E karaurau n taetae te kauaei, “ma ko riai n uota te utu nako Tion—mwanem, tarim ao bwebwee. Tai angan tamam te raunnano ni karokoa ko roko n te Rocky Mountains! Berita nakoiu!”
Mary e ata nanon ana utu ni kan nako n te kaawa are Salt Lake City. Imwiin ongoraia n te euangkerio ao a bwabetitoaki, a tia ni kiitana Engiran bwa aonga n raoniia aika Itiaki i Tion. Ma e na kona n reke? E tara tamana, are e tekateka n rau iaon ana kaintekateka. Teniua te ririki n nako, Tamana e taonaki n te boo are e a boitera iai.
Mary e karina te ang. “I berita,” e wirikiriki.
N te tai ae waekoa e kaotia tinan Mary te kauaei bwa e a mate.
Teuana te ingabong imwiina, Mary e baireia bwa e a roko te tai are e nang tuanga iai tamana ana berita. “I ataia bwa ai tibwa 14 au ririki,” e taku, “ma I riai ni kairiia au utu nako Tion.” E ongo utiia naake a bwebwe. “I riai n nako ni katauraoa te kaingabong,” e taku. “Ma ti iangoa anne, taiaoka.”
Tabeua te bong imwiina, ana karo e wetea aran Mary. “E a tia ni baireaki,” e taku. Ana taetae e tuai rang ota imwiin boona. “I a tia ni kabonakoa abara ao ara tabo ni kenikoora bwa ti aonga ni kabooa te kaa, tabeman kaomwaane, kaoaine, ao tabeua riki bwaai. Te kambwana ni kaa a nang nako maeaon iteran te United States. Bon tiaki naake a Itiaki ni Boong aika Kaitira, ma ti kona ni mwananga ma ngaiia ni karoko i Iowa. Ngkana ti roko ikekei, ti kona n raoniia aia kurubu aika Itiaki nakon Mwanonon Salt Lake.”
Mary e kanakoa baina ni koonna. “Ko rabwa, Tamau.” N te tai ae tawe a nang nako Tion!
E waekoa n nako te bong ngke e buokiia ana utu Mary ni katauraoia ibukin mwanangaia. “A na nakoraoi bwaai ni kabane,” e taetae i bon irouna. “Ti nang roko i Tion.”
Ma imwiina e manga bwaka n aoraki Tamana. Man aron bwakan mwangaina nakon te iterana, Mary e maaku ngkana e manga boo riki.
“E a rang aoraki ibukin te mwananga,” e tuanga mataniwiin te mwananga n te kambwana ni kaa. “Ti bon tii kainnanoi tabeua te bong ibukin kamarurungana.”
“Ti aki kona n tataninga” e taetae te mwane n teebururu. N noorakin moan Mary, e taetae n tangira nakoina. “Ko kona n tiku ikai ni karokoa e tauraoi ni mwananga, ao imwiina ko kona ni karoko iroura.” Akea riki aia aanga, ngaia are e a kariaia Mary.
Te wiiki imwiina, Mary e katauraoia ana utu nakon te mwananga kaua. “Bwebwe a kona n toka iaon te kaomwaane,” e tuanga Jackson, mwanena ae 9 ana ririki. “Tamau e kona n toka inanon te kaa, ao ngkoe ko na buokai ni kaira te kaomwaane.”
“I maaku,” Sarah e taetae ni bwanana ae uarereke. Ai tibwa onoua ana ririki, ao e tara ni baki iaon nuukan te kaomwaane. Bwebwe ake aua aia ririki a toka mataia n taraa Mary.
“Ti na kawaekoaira ni mwananga ao ni karoko irouia kain ara kurubu!” Mary e taetae ma te kukurei n ana iango.
Ibukin te tai ae maan tarin ao mwaanen Mary a mwananga, tabeua te kiromiita, ao imwiin tabeua boong. N tokina, bon Mary e na kaota te koaua.
Te ikotaki ni kaa e aki tataningaiia. Mary ma ana utu a na bon mwananga n tii ngaiia n nako Tion.
Te Karaanga ae Platte, Nebraska, 1863
“Te kaetieti ae matoatoa nakoia kao bwa ana tei” Mary e katika kaon te roobu, ao te kao e karaurau. “Kam nakoraoi?” E taraia taarina ake teniman, ake a toka i akuun te kao, A katoui atuiia.
Te karaanga are Platte e a wene imwaaia, n raababa ao ni bokaboka. “Tera ngkanne ngkai?” mwanena are e arereke riki, Jackson, e titiraki. Ai tibwa ruaiwa ana ririki, ma e bubuoka Mary ni kairiia kaomwaane. Tamara e na wene n te kaa, e teimatoa n aoraki imwiin boona.
“Ti aki riai n rinuukan te karaanga,” e taku Mary. “Ma ti na ira abwakina.” Bon akea te kawai nako Tion, ma te karaanga e kairiia ngkai a kaineta maeao. “Kiriao!”
Mary e aki ataia bwa bwaeoniia n te Moomon a mwananga n iteran te karaanga are teuana ao a n toua te kawai ae e okoro. N aki rinuukan te karaanga, a rinnako n te tabo ae bubura ae katauaki iroun te Tautaeka n te United States ibukiia India aika kaain Amerika bwa ana maeka iai. A na aki manga noori kaa inanon te kawai, ni bane ni mwananga nakon te tabo ae ti teuana n te mwananga are imwiina.
A reitinako ni mwananga. Wiiki imwiina, Mary e noora te nang ni bubu ae kainetiia. “Teei n aki kakamwakuri,” e wirikiriki nakoia kaomwaane ao nakoina. “Tai Kakamwakuri.”
E nako te bubu ao a kaoti te kurubu n Inria ae uarereke n toka iaon taian aoti. Temanna te kairake n Inria ae te mwaane n toka iaon te aoti e kaineta te kaa, are e wene iai Tamaia.
Iai matan te tia mwananga ae nanoanga. “E aoraki?” e titiraki, ao e kotea te karo.
“Eng,” e wirikriki Mary. E taekina te bwai teuana n oin ana taetae, ao te kurubu n Inria ae uarereke a waekoa ni birinako n aron rokoia.
Mary e taraa taai i karawa. “Tia motirawa ikai,” E tuanga Jackson. E tabeka Sarah aao naake a bwebwe ni karuoia.
“Mary, nakomai nooria!” e taku Jackson. Te mwaane are e mata n akoi e birimai ni kainetiia ma te bwai ae rawawata i baina.
“Te take,” e taku. “Ao raabiti. Ibukimi.” E tii kona n taraia Mary, n aki kona n taetae, ngke e kabwakai maan aikekei mai i baina. E katoutoua atuna (bwa kaotan te karinerine), ao e birinako ngke e nang bung taai.
“Te amarake!” E takarua Mary. “Te irikomaeu!” Ana bwaintangira te aomata bon te kakai.
A mwaiti riki kakai ake a riki iaon kawaia. Te kurubu ni bwabwarou a roko ni uakaan ma ngaiia ma imwiina a bwenauaia ao a nakonako ni katobibia te kaa, n nakon iterana are teuana. Te bubu man te ang ae korakora e uota temanna te bwebwe nakon nanon te karaanga, ma e kamaiua Mary.
Ma te mwananga e teimatoa ni matoatoa. Ni katoa bong ao e tabe n uruaki te kaa, ao kaomwaane a moanna n taraa ni kua. Aontano e katati ao e kiriatibu. E kangaanga te rinuukan taian maunga. Ma Mary ao ana utu a teimatoa ni waaki nako.
A tibwa ruorikaaki mai tabukin te maunga ngke Mary e noora te mwaane ni buti ni kainetiia ma te kaa ae katikaki.
“Tao e kona n tuangiira te kawai nako Lehi, Utah!” e taku nakon Jackson. Iai tarin tamaia ae ikawai riki ae maeka ikekei.
“Kam a roko ngkai i Echo Canyon, e aki rang n raroa man te mwanono are Salt Lake,” e kaeka te mwaane ngke e titirakinna bwa a mena ia. “Ma a nga nikiraia ami koraki ni mwananga?”
A tuanga te mwaane aia karaki ni kabane, ao te mwaane e ongora ma te mimi. “Kam a tia ni mwananga n te raroa ae raka iaon 1,000 te maire (1,609 km) n tii ngkami?” E ioioa atuna ni kaota mimiina. “Ngkoe Mary bon temanna te ataeinaine ngkoe ae ko ninikoria. N na tuangi ngkami te kawai nako Lehi. Kam a uakaan nako ikekei.”
“Tia kan roko,” e wirikiriki Mary ibon irouna ngke e korea te mwabe te mwaane iaontano. Tia kan roko i Tion “I taku bwa ti nang bon roko raoi ikekei, imwiin aei.”
A roko Mary ma ana utu i Lehi, Utah. Imwiina e mare ao e a katea oin ana utu ae bubura. Ana banna ni katoto n te onimaki ao te ninikoria e a tia ni kakabwaiaia aomata aika a mwaiti.