Karaoan te Mwakoro ae te Kabanea ni Kakawaki
E maeka te tia korokaraki i Washington, USA.
I a bon tibwa tia n anganaki tabeu ae moan te buburaa inanon maiu. I bon kukurei—ni karokoa are e roko te beeba ma taekana.
Tamnei iroun Getty Images
Te kaotioti ae maeu n te tabo ni kamataku bon mamaten nanou! Ngke te kairake n ataei ngai, I kukurei n iriiri waaki ni kamataku ao n anene n te bao ni kamataku. I kakabwaiaaki ma te taarena ao ni kantaningaia ni katea arou man karaoan au mwakuri ni kakamataku ae I rang bwaati iai. I tokanikai i aon taabe ake a rang kaangaanga ake I kona ni karekei ao n taainako I karaua raoi aua kamataku ma te karinerine ibukiia raou n aekita.
I kukurei ngke e tuangai te tarekita ae te kabanea n anainano inanon ara aono bwa e na booa te kamataku ae uarereke ibukin te taetae ao e tangirai bwa N na kataia. E na karaoaki te kamataku n te tabo ae kakannato, ao taraana bwa raoraon au tarekita e a kaman iangoia bwa e na kamanenaai n te beku ae kakawaki anne.
E aki tauraoi te beeba ma taekana ibukin warekana imwaain te kamataku, ma taetaena e boboto iaon te karaki mairoun te tia rabakau n te ka te 18 n tienture, are I warekia. I moanna ni kinaa naba katangitangin te kamataku, are e bon rang tamaroa ao ni kakaewenako.
E nakoraoi te kamataku, I waekoa n tuangaki bwa kairan te beku—te kabanea ni kakannato ni mwakoro—bon au bwai! I ataia bwa te beku aei bon te kakabwaia ae moa te korakora.
I namakina te kukurei—ni karokoa are e roko te beeba. Ngke I warekia, kukureiu e waekoa n toki. Ngkai e kororaoi te karaki ma katangitangina, te beeba ma taekana akea te karinerine iai ao kanoana bon kaetieti ao babaire aika aki riai. I ataia bwa N na aki riai n irekereke ma te karikirake aei. Bon te bwai ae aki kakukurei.
N te tai ae waekoa I a karaoa te rinerine ae kaangaanga. Te anua ae riai n te tabo ni kamataku are imwiin butimwaean te beku, e riai n aki buubai te aekita ibukina bwa bairean waakin te kamataku akea taina ni manga bita te tia kamataku. Ngkana ko buubai ngkai e aranaki bwa akea mwaataim iai. I maaku ni kabua te onimakinaki man te kambwana ni kamataku, ni uotarikaaki te tarekita, ao riki ni kabuaan te kakabwaia n reitanako te kamataku n taabo nako.
Ni kouana, I kaririiaki bwa N na kakaea bukina! E korakora au namakin ma au iango, “Ko aki kona ni buubai ngkai. E aki rang buakaka te beeba ma taekana. Raoiroin te kamataku e na onei mwiin mwakoro ake a tokonoono.” Ma te Tamnei ae Tabu e mena inanou n taainako—e kaungaai, e kamatoaai, n taotaonaki n nano, n aki bibitaki bwa I riai ni kitana te tabo ni kamataku.
I ataa te bwai ae I riai ni karaoia.” N ruruu ni maaku, I tabeka te tareboon ao n orea ana nambwa te tarekita.
“Mauri, noo,” I taku ngke e kaekaai. “Aio Annie.”
“Annie! I rang kukurei n taekan te kamataku. E reke te beeba ma taekana?”
“Eng, e reke Irou, ao I … I …”
E a waanai te tang. Aio te anua ae aki mwaatai!
N angana teuana, imwarenan tangiu, I kataia ni kamataata nakon te tarekita bukin tera ngkai I aki kona n ira ana kamataku. Ao ngkanne I a tataninga te bwai ae e na riki imwiina.
E ngare te mwaane ae tangiraki. E karinea au rinerine. N te moantai e kataia n taetae nakoiu bwa N na tiku n te kamataku, ma e a manga aki anaa nanou. E taku bwa e na bon teimatoa n tangirai e ngae ngke I aki kaaina ana kamataku. Ao e butiai bwa N na nikira te beeba irouna n te tai ae waekoa bwa e aonga n angan riki temanna. I katuka te tareboon, n namakina te maamaa ao te burababa n tangiu ma I kakaitau ibukin ana tangira te tarekita, n oota n au kaeka.
I kaoi ranin matau ao ngkanne I anaa te beeba ao n toka n au kaa. Ngke e rurunga te intin, e maiu naba te reerio. E kamaiuaki nakon te titeition ni katangtang ae kinaaki, ao ni miimiu, te mwanewe are e tang bon nootin naba te katangitang arei. I bon tuai man ongoongo n tang n te reerio mai imwaaina.
I namakinna bwa te Tama are i Karawa e katanga te kuna aei ibukiu. E tangirai bwa N na ataia bwa E tangirai ao E kariaia au rinerine. Te kuna are e nako man te kanakobwana bon teuana mai buakon ana nanoanga te Atua. Rinanona I namakina te rau ao Ana tangira.
I reita au kamatebwai iaon te kamataku n te iuniwetiri. N te tai ae bati I kuneai n aekakin taabo naba akanne. Iai taai ngke e bon riai bwa N na aki ira te reita ni waaki iaon karikirake ibukin kanoana ae aki riai. Taabo aikai aki bebete ke ni kakukurei, ma I kona ni butimwaai riki ma te akoi ao n aki tang. Tao au taneiai are mai imwaaina bon te katauraoi ibukin taai aika riki aikai. Tao e buokai ni kan kamataatai raoi bwa antai Ngai ao tera ae I rang tangiria ni kan riki iai.
E koroboki William Shakespeare:
Te aonaaba ni kabane bon te tabo ni kamataku.
Ao mwaane ao aine ni kabane bon taan kamataku:
Iai aia tabo n otinako ao n rinnako;
Ao temanna te mwaane e kamataku ni mwakoro aika mwaiti.1
I reiakinna bwa iai teuana te mwakoro ae e na kamataku te aba iai are e rang kakawaki riki nakon ake tabeua. Bon aron te riki bwa ana reirei Iesu Kristo ae koaua. N tokanikai iaon aia uboubo ara roronako e kona ni kaunga ma ni kakukurei, ma bon ana kariaia te Atua ae kakawaki riki. Ara kamataku ae moan te korakora e roko n aron ae ti reiakinaki bwa ti na iriira ara Mwaatita.