Kaota Am Taura
I kan tuangkami rongorongoia ataeinaine aika uoman ake I kinaia ake a kaota te katooto n tibwauakin te euangkerio. Ngke e a kaan koro wanua ana ririki natira te aine ae Nellie, a maeka ara utu i Switzerland. E kukurei Nellie ni bwabetitoaki. Imwaain ana koronririki, ti karaoa ara bootaki n utu n te tairiki ma raoraora ae Tina. E a tia n reireinaki Tina irouia mitinare. Ma e aki koaua raoi ngkana e tangiria ni bwabetitoaki.
Imwiin ara reirei ti butiia Tina bwa e na tataro. E aki rang bwaati n taetae n Imatang Tina, ngaia are e a tataro n Tiaina. Ti aki oota n ana taeka, ma ti namakina te Tamnei ngke e tataro.
Rimwi n te tairiki anne e titiraki Nellie ngkana ngaia ma Tina a kona ni bwabetitoaki n te bong naba anne. Ti aki ataia e kanga ana namakin Tina ibukin te iango anne. Ma ti bane ni kariaia bwa tao e riai Nellie n tarebooniia Tina ao n titirakinna. Ti miimi ngke e kangai Tina ngaia!
Nellie ao Tina a bwabetitoaki n te wiikente anne. I mwiina, Tina e kaongoraira te rongorongo ae kakukurei. E kauringiira taekan ana tataro n ara bootaki n utu n te tairiki. N ana tataro e butiia te Tama are i Karawa bwa e na ataia ngkana e riai ni bwabetitoaki. Ngke e tareboon Nellie rimwi n te tairiki anne, e ataia Tina bwa te Tama are i Karawa e ongo ana tataro.
Raoraora ae Jasmine bon te katooto ae tamaroa nakoira naba. Jasmine bon 12 ana ririki ni maiu. Ana utu a riki bwa raoraora ngke ti maeka n te Middle East. I abana, kaain te Ekaretia a aki kona ni marooroakina taekan te euangkerio nakoia tabeman. E bon kaitaraa te tua. Ma e baireia Jasmine e kona n tibwaua te euangkerio man karaoan are e karaoia Iesu. E kona ni kaota te tangira ao te akoi nakoia aomata. Te tabo are e nako iai Jasmine ke n te bwai are e karaoia, e kataia n riki n ai aron Iesu. Bon te banna ni katooto ae korakora nakoia tabeman.
Nellie ao Jasmine a kaotia nakoira bwa ti na kanga n riki bwa banna ni katooto ibukin Iesu Kristo. Ti kona ni karaoa aei n aki taraaki ara ririki ke taabo raa ake ti maeka iai.