Teimatoa ni Korakora Inanon te Wiiki

Roronrikirake aikai a tibwa aron kakabwaiakiia iroun te Uea ngkai a taua te toa ao n uringa aia berita ae tabu inanon te wiiki.

Bon tairikin te Tabati. Are nanona ningabong bon te Moanibong—okira karaoan bwain te reirei, am mwakuri, kataneiai ni butibooro, reirei n te biano, ao a mwaiti riki. E bon mwaiti ae e na karaoaki n te wiiki aei! Ma e a reke iroum aei. Ko kona ni kakoroi nanon am rinan ni mwakuri n te wiiki aei.

Ko kan ataia bwa ni kanga?

Iai korakoram n tamnei ae raoniko. Ni katoa Tabati, ko taua te toa ao ni kaboua am berita ae tabu are koa tia ni karaoia. Ngkai ko karaoia, ko berita bwa ngkai ko katoka aran Iesu Kristo iaom, ao n aki toki n uringnga, ao ni kawakin Ana tua, e na raoniko n tainako Tamneina (tara D&C 20:77, 79). Are nanona ko na namakina korakoran tamneina n aki taraia bwa tera are ko kaitara n te wiiki aei.

Ti butiia tabeman mairouia kairake bwa a na tibwa aia namakina ma te toa ao aron kakorakoraakiia ngkai a tia n uringa aia berita ae tabu inanon te wiiki manna. Noori tabeua aia rongorongo. Tao ko bon kaitarai naba aekakin aikai!

Uringnga n tainako bwa te Tia Kamaiu e buokai ni karekea te ninikoria ni kaitarai kanganga. I nuukan au kabanea n ririki n te kauarinan, au utu a mwaing nakon te United States, ma ngai I tiku i Aotiteria ni kabanea au ririki n reirei. Imwiin kawarakiia n tain te motirawa, I kiba n oki nako Aotiteria, ao I namakina te maroa ae korakora. E ngae n anne, I waekoa n uringnga bwa I aki maroa; ao I bon tuai n tiku tii ngai ao N na bon aki maroa bwa bukina Tamnein te Tia Kamaiu e raonai n tainako ngkai I kataia n toua mwiina. Bon anne te mweengaraoi are I karekea n te tai anne.

Shannon S., 19, Sydney, Australia

Ngke I ongo taekan te tataro n toa, I kauringai bwa ngkana I karaoa tibwangau n au berita n te bwabetito, I kona ni kateimatoa te Tamnei bwa e na raonai. E bebete kanoan au wiiki ngkana e mena irou te Tamnei. Te katoto, a mwaiti ataein te reirei n au reirei aika a kabonganai taeka aika aki raraoi ao n taetae n aki akaka. Uringan au berita ae tabu e buokai ni katinanikui bwaai ake I ongo ao ni karekeia tabeman raraou bwa a na katoka te taetae ae aron anne.

Jacob B., 14, Colorado, USA

N te reirei ao iai te ataeinnaine ae aki toamau. Angiina aomata a kabongana anne bwa kaanga kawaia ni bwainikiriina neiei. Ti ngai ma raraou aika ti kataia ni buoka neiei. Ni boong tabeua e tara n ae ni kabane te kiraati a tei ni kaitara neiei. E bon kanganga ataakin te bwai ae ko riai ni karaoia. I tangiria n tii kiitanna, ma I rineia bwa N na uringnga ae neiei bon natin te Atua ao n iangoa aron Iesu nakon neiei. I namakina ana rau te Tamnei ae Raoiroi. I uringa ae I kona ni karaoa te bitaki. Irirakin ana banna ni katoto te Tia Kamaiu e rang ibuobuoki, ao I atai bwa bwaai ni kabane a na bon nakoraoi.

Inanon au berita ni bwabetito I berita bwa e na raonai n tainako te Tamnei ae Raoiroi ngkana I karaoa are e na karaoia te Tia Kamaiu. I kakatonga ngkai I kona n namakina te raunnano anne ao te korakora mairoun te Tamnei ae Raoiro.

Alexis L., 13, Kansas, USA

Ataakin ae iai te berita ae I katoka iaou aran Iesu Kristo e anganai namakinan te tibwanga n toua mwiina, ma e bon aki bebete n tainako. N te tai teuana n te waaki ni kakukurei n te kurubu I noora te ataei ae akea raona ni maroro. I namakinna bwa I riai n nako n taetae ma ngaia. N te moan tai, I rawa. Bon akea rabakau bwa N na kona ni karekeia raraou. Ma uringan are e na kona ni karaoia Kristo, I a karekea te korakora ni karekea raraou ae boou. Ngke I taetae ma ngaia, I kona n namakina ana wirikiriki te Tamnei bwa N na titirakinna ao ni kaunga.

Evan A., 16, Utah, USA

N tain te toa, I taneiai n iangoi bwaai n aron bwaai ake N na karaoia n te wiiki, au bwai n reirei, ke raraou. Ma imwiin rinanon te kiraati n te Reirei n Tabati ao aia rongorongo ara burabeti, I a moanna n ota n nanon raoi te toa. Ngkai I a iangoa ana Mwakuri ni kamaiu Iesu Kristo, are E anga maiuna ibukira, kabooi ara bure, ao ni korakai ni bwaai ni kabane. Anne ae e anganai te ungannano ni katoabong n taekinna, I kona ni katotonga ao ni karaoi aekakin te tangira are E kaotia nakoia tabeman. I kona n tibwa te euangkerio ma tabeman. I kona ni karaoa te bwai teuana bwa N na tau riki n rin n te tembora ao n taua te toa.

Alessandra B., 17, Santiago, Chile

Te toa e kabirimwaaka te maiu n tamnei n te wiiki. E kauringai te berita are I a tia ni karaoia ma Tamau are i Karawa, ao ni kairai rinanon te wiiki. E kauringai bwa N na iangoa ana anganano Kristo ibukira, ao anne are e katauraoai n te maiu n tamnei ibukin te wiiki are e na roko.

N te taina ao I taonaki n te rawawata ao te un, ma ngke I taua te toa ao ni wareka taekan te kuna n toa, I kaonaki ma te Tamnei. I mwaninga taekan rawawatau ao I a kabanea au iango iaon te Tia Kamaiu.

Brett B., 17, Colorado, USA

Irou, katokaan aran Iesu Kristo iaon nanona bwa n ururinga bwa Tamneina e na kona n raoniira n tainako ao ti riai n rineia ni kakaraoa ae eti. N te taina n tain te bootaki ni koronririki, raraou a manging ao anganai te manging bwa N na nimma. I taku I aki. Ngkanne raraou ae kain te Aro e roko n tuangiia bwa ti aki mamanging ibukin ara aro. Ururingan te Tia Kamaiu e uota n tainako te Tamnei ni kaniia nakoiu ao ni kawakinai man bwaai aika buakaka.

Miguel C., 16, Paraná, Brazil

Tauakin te toa e anganai te namakin ae rau ao te iango ae angaraoi nakoiu bwa I kona n rinanon bwaai n te maiu ake I kaitarai. N Tuun ae nako, I rinanon kanganga inanon maiu. Temanna raraou e mwaing nako, I taonaki n te rawawata ma te nanokawaki; ao a roko iango aika kamimi n tein te rabwata. N te Tabati teuana, I taua te toa, ao e roota rabwatau angin te rau. I namakina te kukurei ni koaua.

Olivia T., 14, Virginia, USA