Bon Tii te Bwai Are e Kamaiuai
E maeka te tia korokaraki i Tokyo, Tiaban.
Temanna te rao e buokai ni bita maiu man te aki kukurei nakon te kakukurei.
Kamataata n te tamnei iroun Pat Kinsella
Te takakaro ae te kaobu i Tiaban e rang kinaaki, ngaia are I a moana takakarou ngke 14 au ririki ni maiu n te kawai are N na kabanea iai au tai ma tamau. E kaunga mai imoana, ao n te kabane I a moanna ni kataneiai i bon irou ao n takakaro n te tiim ni kaobu n au reirei ae te kauarinan. I a moanna n rena ma kaain au tiim ao au kouti, ake a kaungaai ni kakoroa bukin au iango n riki bwa te tia takakaro n te kaobu ae mwaatai.
I mwakuri korakora, n aki tii nakoraoi i aon tii au takakaro ma i aon au kamatebwai, n angabeeba ni kuri ni momoanna i aoia kaain au kiraati.
Ngke I moanna n rin n te kuura, e korakora renau ma au kouti n te kaobu ao kaain te tiim. A rabakau riki nakoiu, ngaia are I kabanea au konaa bwa I aonga n roko irouia. Tabeman kaain te tiim a taetae iaon au moan ara, Shuho. I tuangiia bwa tibu te unaine ae kaain Korea mairoun tinau e anganai ao nanona n i Korea “te maunga ae tamaroa.” Man te waaki anne I namakinna bwa anuaia nakoiu e bitaki, ni kabuakakai aia iango n aia namakin ni maaku n unuunia rooro ake ngkoa imarenaia tenaan i Tiaban ao i Korea.
A moanna ni weteai “ataein Korea” ao n taku bwa N na uruana tamaroan aran te iuniwetiri. N oneamwiin are N na kataneiai ni kaobu ma ngaiia, a karaoai bwa N na kaitiaka te roki.
E a rikirake ni karawawata aron te mena ibuakoia kaain te tiim. Ibukina bwa i bon raroanako ma mweengau, I namakinna bwa I tiku i bon irou. I kataia n onimakina au iango ao ni kaoka tangirakiu iroun au kouti ao te tiim, ma i mwiin uoua te ririki, I aki kona n taobarai aia mwakuri riki aika bubuaka nakoiu, ngaia are I a okira mweengau.
Aio bon te tai ae aki kakukurei ibukiu. E karawawata iangoana n roota te iango ao te rabwata. Onimakinau i bon irou e tabe ni kekeerikaki inanon uoua te ririki. Au iango ni kan riki bwa te tia takakaro n te kaobu ae mwaatai e a roko n tokina. I aki ataia bwa tera ae N na karaoia ma maiu. Ao I a un. I un irouia aomata ni kabane: te kouti, kaain au tiim, ao au karo. I a bon rang ni un, e kakamaakai au iango. Akea raoraou, ao I namakinna bwa akea onimakinaia ke n reitaki ma tabeman riki aomata. Inanon onoua namwakaina, I tii okira mweengau ni kakataneiai inanon te tabo n takakaro.
Inanon mwakoron maiu ae roo aei, e a reke raoraou ae Justin Christy, are I kaitibo ma ngaia n te tabo n takakaro. Ngke I moan nooria, I taku bwa ataein te reirei are e roko man te aba teuana n tiku n reirei. I nanokokoraki n taetae ma ngaia ni karokoa are I a nooria n taetae ma temanna n te tabo n takakaro ao ni miimi n ongo ae e taetae n Tiaban. I teimatoa n aki onimakiniia aomata tabeman, ma e iangoia bwa ti na kaai ni kataneiai. Iai te bwai ae kaokoro irouna are I aki oota n te tai anne. I aki rang kakarongoa ngkana I airiri ma ngaiia. I a moanna ni kakantaninga nakon ara tai ni kaai ni kataneiai. I a kunea temanna are I namakinna bwa N na kona n onimakinna bwa raoraou.
I mwiin ara kaai ni kataneiai ibukin tabeua namwakaina, e kaoai Justin nakon aia katairiki kaain te kurubu are e nanako iai ni katoa tai. I nanokokoraki, ma i mwiin tabeua te kakao I baireia bwa N na nako iai are e aranaki bwa aia katairiki kairake n ikawai aika tuai n iein ni mweengaia Richard ao Corina Clark. A kamaurai ngke I roko ni mweengaia, te Tari Clark e taetae n Tiaban ao Titita Clark e taetae n Imatang. I aki ataia bwa tera ae e taekinna, ma I kataia ni kaeka. E ngae ngke tabeman aomata a aki taetae n Tiaban, bon te kurubu ae kakukurei ake a rau man iraorao. E mwaiti te ngarengare.
I a moanna n iriira aia waaki ni kakukurei kairake n ikawai aika tuai n iein ao ni bon tuai man karekea te unga ma tabeman aomata inanon maiu. I miimi bwa tera taekan aroia aomata aikai are e a karikiia bwa a na tamaroa ao n iraorao.
Inanon te tai aei e titirakinai Justin tera ae I tangiria ni kan karaoia ma maiu. I miimi ni kunea bwa au kouru a moanna ni bitaki. I tuanganga I tangiria n reiakina te taetae n Imatang ao n tangiria ni kan riki bwa raoia aomata ni kabane, n aekakina. E tuangai taian kiraati aika aki kabooaki n ana aro. I a nako ni kaea te kiraati n te taetae n Imatang ao ni kaitibo ma mitinare. E ngae ngke I bon tuai man iangoa taekan te Atua, I namakinna I riai n ongora irouia mitinare. A reireinai aan reirein te euangkerio ao ni tarebooniai e kuri ni katoa bong. A riki bwa raoraou aika tamaroa, are e a karika iai kukureiu ibukina aki rang mwaiti raoraou.
I a moanna ni kakaitibo ma kaain te Ekaretia aika mwaiti ake a nako n iriira te reirei ni mitinare ma ngai ao n riki bwa rao ngaira aika tamaroa. A reireinai te euangkerio ao ni kaota te banna ni katooto ibukiu. E taetae nakoiu Justin ibukin taekan ana Boki Moomon ao ni karakini rongorongo mai iai bwa I aonga ni warekia i bon ibukiu. Temanna raoraou, Shingo, are e nanano n rongorongo nako, e maroroakin reirei ma ngai n te kawai are N na kai oota iai. E aki toki ni kakaota ana koaua i mwiin banen ara marooro.
Iai te bwai ae I kunea ae I kakoaua ao te tabo ae I namakinna bwa I kaainna. I mwiin bwabetioakiu ao kamatoaakiu I a moanna n iangoia bwa N na karaoa au mwakuri ni mitinare, ma I raraoma n anga uoua te ririki nako iai. I mamarooro ma aomata aika mwaiti ibukin te mwakuri ni mitinare, ai moararaiki ma raoraou ake a tia ni bane aia tai ni mitinare. I tabe n iangoia, ao ni kunea bwa te euangkerio bon tii te bwai are e kona n anganai te kamaiuaki.
I ataia bwa e a tia te Atua n anganai bwaai ni kabane: au iango, kantaninga, raoraou, ao ai moararariki te tangira. E buokai te euangkerio ni kaotinakoai man te rotongitong nakon te oota.
N na Kanga n Tibwaua te Euangkerio ma Shuho
Iroun Justin Christy
Ngke I kaitibo ma Shuho n te tabo n takakaro, e taku bwa e kan reireinna te taetae n Imatang ao n nako ni kaea te burokuraem ni kaaibibiti n te takakaro ae te kaobu. I tuangnga taekan te kiiraati ibukin te taetae n Imatang n te aro, ma anaakina bon tabeua te wiiki i mwaain are ti kona ni kaea. Imarenan baika uoua, ngkai ti kaai ni mwakuri, ti marooroakina taekan te euangkerio n ae bati, taekan ana Boki Moomon, ao aron te maiu ae kabuta.
Aia iraoraoi ma aia katooto kaain te Ekaretia ake e kaitibo ma ngaiia e anaaki iai nanona ao ni buokia n reiakina taekan te euangkeiro. Bon te tamnei are e kairia bwa e na rairaki; bwaai are ti na karaoi bon karokoan te rongorongo ao ni boutokaia aomata ngkai a na bon karaoa te rinerine i bon irouia.
E taraa ni karawawata ibukiu n iangoa tibwauakin te euangkerio. Ma I kunea bwa ngkana ti moanna n taetae n te tai ae eti, ti na karekei taai ni kakabwaia ibukin te mwakuri ni mitinare. Te bwai ae ti riai ni bane ni karaoia bon kaoakiia aomata nakon ana waaki ni kakukurei te aro ke ana bootaki n taromauri. Ngkana ti tauraoi n iangoi iango aika kakaokoro, e na iai n taainako taai n tibwauakin te euangkerio.