Ариун Сүнсээр ЗААЛГАСАН НЬ

Эдгээр өсвөр үеийнхэн Ерөнхий чуулганы өмнө Сүнсээр заалгахад бэлтгэгдсэн. Тэд өмнөх Ерөнхий чуулганаас дараах зүйлсийг сурч, өөрөөр хийдэг болсон.

Сүнсээр өдөөгдсөн удирдамж

Getty Images-ийн хөрөг бус зураг

Ерөнхий чуулган намайг сүнслэгээр өдөөсөн. Бусдад үйлчлэн, Христэд найдаж, төмөр бариулаас чанга зууран барих талаар удирдагчдынхаа өгсөн зааврыг сонсож байхад Ариун Сүнс энэ сайн мэдээ үнэн ба бид зарлигуудыг сахиж, Бурханы үгийг дагаснаар мөнх амьдралыг авах боломжтой гэдгийг надад гэрчлэхийг би мэдэрсэн юм. Би орон нутагтаа илүү ихээр үйлчилж, өөрийн гэрчлэлийг өдөр бүр залбиран, судраас судлах замаар хүчирхэгжүүлэх зорилго тавьсан. Би Тэнгэрлэг Эцэгийн охин гэдгээ мэднэ. Тэр амьд бөгөөд намайг мөнхөд, үргэлж хайрладаг.

Мэйдлин Б., 16 настай, АНУ, Делавэр

Түүний талаарх мэдээлэл: Гурван хүүхдийн ууган нь; кросс гүйлтээр хичээллэдэг; ном уншиж, дуу дуулах дуртай мөн испани хэлэнд дуртай бөгөөд англи хэлийг гадныханд заахыг хүсдэг.

Асуултуудын хариу

Надад Ерөнхий чуулган болохоос өмнө (1) Би хэрхэн эерэг хандлагатай байж, найзуудаа буруу шийдвэр гаргахаас өмнө тусалж болох вэ? (2) Би тэднээр шоглуулахгүйгээр хэрхэн Сүмийн талаар гэрчилж болох вэ? гэсэн хоёр асуулт байсан. Чуулганы үеэр Сүнс надад ганцаараа биш гэдгийг гэрчилсэн юм. Одоо би чин сэтгэлээсээ судраас суралцах юм бол найзуудтайгаа холбоотой асуултуудынхаа хариултыг олж авна гэдгээ мэднэ. Тэнгэрлэг Эцэг минь залбирлыг маань сонсдог гэдгийг би мэдэх бөгөөд өдөр бүр илүү сайн болохыг хичээх болно.

Исаак Р., 13 настай, Эквадор, Пичинча

Түүний талаарх мэдээлэл: Айлын ганц хүүхэд; төгөлдөр хуур тоглох, тэшүүрээр гулгах, жудогоор хичээллэх, сэлэх, дуулах, лаа хийх дуртай; эмч болохыг хүсдэг; ногоон өнгөнд дуртай.

Суралцахад бэлэн байх

Би Ерөнхий чуулганаар Сүнсийг маш хүчтэй мэдэрдэг. Би чуулганд асуултуудаа болон сүнслэг байдлын хувьд өөрийгөө бэлдэж байсан тул энэ нь миний амьдралын утга учрыг өөрчилж, үг бүрээс илүү ихийг суралцах болсон юм. Би бошиглогч, төлөөлөгчдөд талархдаг бөгөөд Тэнгэрлэг Эцэг бидний амьдралыг удирдан залахаар тэднийг илгээсэн гэдгийг мэднэ.

Бэн Х., 17 настай, АНУ, Кентаки

Түүний талаарх мэдээлэл: Спортод дуртай; сургуульдаа сагсан бөмбөг, теннис тоглодог; цана, сноубордоор гулгах, аялах, ууланд алхах дуртай.

Өсөж хөгжих урилга

Ерөнхий чуулган Есүс Христийн сайн мэдээний дагуу амьдрах хүслийг маань хүчирхэгжүүлсэн. Энэ нь энэ Сүм гэрэл болон аз жаргалыг авчирдаг үнэн Сүм болохыг мэдэж, ойлгоход надад тусалсан. Сүнс намайг өдөр бүр өсөж хөгжин, сайн мэдээний талаарх хүчтэй гэрчлэлтэй болохын тул Мормоны Номоос уншихад урихыг би мэдэрсэн. Тэнгэрлэг Эцэг намайг тэдгээр сүнслэг захиасыг сонсоосой хэмээн хүссэн гэдэгт би итгэдэг.

Висэнт А., 16 настай, Чили, хотын бүс

Түүний талаарх мэдээлэл: 4 хүүхэдтэй айлын ууган нь; видео тоглоом тоглох, хөгжим сонсох, хөл бөмбөг тоглох дуртай; жүжигт оролцдог, номлолд үйлчлэхийг хүсдэг.

Гэрэл эрэлхийлэх

Уржнан жил надад хамгийн хүнд жил байв. Аав маань хорт хавдартай тэмцэж байсан ба манай хот террорист халдлагад өртсөн байлаа. Би сэтгэлийн түгшүүрт автах болсон бөгөөд сүнслэг болон бие махбодынхоо аюулгүй байдалд санаа зовж байж хэрхэн амар тайванг мэдрэх билээ гэж боддог байв. Ерөнхий чуулганаас бид ариун журамтай амьдрах юм бол амар амгаланг олж, зүрх сэтгэлээ итгэлээр дүүргэж, аливаа зүйлийг мөнхийн талаас нь авч үзэх чадвартай байх болно гэдгийг би мэдэж авсан. Энэ нь хүнд хэцүү үед өөрийн ойлголтод тулгуурлахын оронд Христэд хандахад намайг сүнслэгээр өдөөсөн. Христийн гэрлийн тод туяаг эрэлхийлснээр харанхуйн нөлөөнөөс гарч чадна гэдгээ би мэднэ.

Оливиа Х., 17 настай, Бельги

Түүний талаарх мэдээлэл: Усанд сэлдэг; орон гэргүй хүмүүсийг хооллодог шөлний газрын гал тогоо, асрамжийн газар, сургуулийнхаа хөгжлийн бэрхшээлтэй хүүхдүүдэд зориулсан хөтөлбөрт сайн дураараа үйлчлэх дуртай.