Ma Ngai I baki!
Isadora Marques Garcia
São Paulo, Brazil
Kamataata n te tamnei iroun Allen Garns
Te bong teuana ae kakarau iaon au mition i Colombia, ngai ma toau iai nikiran ara aoa imwain ae ti na okira mweengara. Ti taonaki n te baki ao tia kua imwiin te ririanna inanon te ngaina. Akea ae ti a tia ni kunea ae ti na reireinna.
Akea naba ara mwane inanon baira, ao ti tuai ni boobwai. Ti ataia bwa ngkana ti roko ni mweengara ao akea te bwai ae ti na kanna. I kataia ni kararoai iango aika aki raraoi ao ni kabotoa riki iaon te mwakuri.
“Noora te bwai ae I kunea!” E waekoa n takarua toau.
Iai te mwane ae kunea iaon tano. Man te bwai are I nooria i moana, I kona n ataia bwa e iangoa te bwai are I iangoia. Ti a kona ni kabooa te bwai ae ti na kanna!
Ma teutana te tai imwiina, toau e taku, “Tiaki, te mwane aei tiaki ara mwane!”
“Ma ngai I baki!” I iangoia.
“Ma antai are ana mwane, ti aki kona n ataia n taina aei ae e a bong,” I tuanga toau.
E kaotinano bwa ti na tataro. I ataia bwa anne ae eti, ma iterau are teuana e taku bwa e baba. Ti a tia ni mwakuri korakora inanon te ngaina. Ti a bon baki. Tao kuneakin te mwane bon te kakabwaia ibukin ara mwakuri.
Imwiina I a uringa tinau. Ngke I uarereke, e reireiniia tariu ao ngai bwa ti na kokoaua n tainako. Bon te banna ni katooto nakoira ao n tataro bwa e na reke iroura te ninikoria ni kokoaua. I ataia bwa ngke e mena ikekei, e na bon nanokawaki ngkana I aki karaoa te baire ae eti.
Ngaia are ti a tataro. Ti bubutia Tamara arei I Karawa bwa e na buokiira ni kakaea are ana mwane. Tabeua te miniti imwiina, te ataeinimwaane e kaoti, ni kakaea te bwai teuana. Iai rannimata i matana ao e taraa n aki rau nanona. Ngai ma toau ti nakoina ao ti kunea bwa iai iroura te bwai ae e kakaea.
Ti kaoka ana mwane nakoina, ao e okioki ana karabwarabwa. E taku bwa e kainnanoia bwa e na kabwaka roona n te reirei. Ngkana akea, e na bon aki bae arana. E kaonaki matau n rannimata, ao I rairannano man au kantaninga are mai imwaina ibukin kabonganaan te mwane. Ti karekea ana nambwa, ao ti a kona n reitaki ma ngaia n reireinna ma niiman riki aomata. Te tairiki anne I kaaitaua toau ibukin ana banna ni katooto ae tamaroa.
I ataia bwa e kakabwaiara te Atua ngkana ti bwaina te kokoaua. Akea te bwai ae ti kanna n te tairiki anne, ma I uringnga bwa ti matu n aki namakina te baki. Kuneakin te mwane bon te kakabwaia, iaon bwaai ni kabane.