Kairake n Ikawai
Reireinai ni Kiba: Karekean te Marurung n te Namakin n Toronibwai n ana Kawai te Uea
E maeka te tia korokaraki i California, USA.
Valerie Durrant bon kain California, USA, ao e mare ma buuna ae Ryan n te maan ae aua te ririki. E a tibwa riki bwa te tina n rikin natina ae te mwaane. E tatangira te yoga, te korobanna, te wareware, ao tamwarakean te maunga.
Ti kainnanoia n onimakina Tamara are i Karawa ao Iesu Kristo ao n anga oin ara kekeiaki ngkai ti kataia bwa ti na marurung n te namakin.
Kamataata n te tamnei iroun Getty Images
Ngkana ti iangoa te mannikiba ae uarereke ae reireinna ni kiba, n angin te tai ti katamneia ana kabanea ni kekeiaki ae bubura: moani kibana mani ngaona, karobaan baina, ao te kiba i karawa. Imwain te kabanea n tokanikai, e ngae ngke, iai kabwaka aika mwaiti ae e uota te mannikiba n aki kiba nako karawa ma e bwaka ni kaineta aontano.
N ai aron te mannikiba ae e reireinna ni kiba, ngaira naba ti kona ni bwaka n ae okioki n ara tai ni kakaea karekean te marurung n ara namakin n toronibwai i bon iroura. Ma ngkana ti nakon te Uea ibukin te ibuobuoki ao n anga ara kekeiaki, ti kona n reiakinna bwa ti na kanga ni waekoa ni bitiira ngkana e aki nakoraoi te maiu n aron ae baireaki ao n Onimakinna ao ngkana a matoa kaangaanga ibukira bwa ti na rinanoi n tii ngaira.
Reiakinan te Kiba
Ngkana reiakinan te kiba bon te waaki ae kammaraki, bukin tera e na kitana ngaona te mannikiba n te moan tai? Ibukin tinana. Ni moan mwakoron maiuia natina, te tina ni mannikiba e na uota te amwarake nakoia ni ngaoia. Ma inanon taina, e waaki ni katuka te amwarake itinanikun te ngao bwa aonga mannikiba aika a uarereke n otinako man mweengaraoia ni karekea nuaia.
Bon te waaki ae titebo ae ti rinanona ngkai ti reiakina te riki n toronibwai n te namakin—ma tiaki kantaningaki bwa ti kona ni kiba raoi n ti ngaira ngkai.
N te arona ma tinaia mannikiba ae kariaia natina bwa a na bwaka mani ngaoia, Tamara are i Karawa e kariaia bwa ti na rinanon kaanganga ao waaki aika a kona ni kammaraki, ni kaun, ao ni kamamaara. Ana babaire ni kamaiu e karaoaki bwa e na buokira bwa ti na riki n ai Arona, ngaia are ni kabane kakaewenako ae ti kaitarai a kona n riki bwa te tai n reirei ao n rikirake. N ai aron tinaia mannikiba, Tamara are i Karawa e teimatoa i katauraoa te rau ao te kawai ibukin ae tii man ana Ibuobuoki ae ti kona ni karekea ao ni kateimatoa marurungira n ara iango ao n ara namakin.
Karobaan Oin Baira ni Kiba
E ngae ngke Tamara are i Karawa bon raora, ti riai n aki iangoia bwa e a karaoi bwai ni kabane ibukira. E tangiriira bwa ti na kabongana inaomatara n rinerine ao buoka ake E a tia n anganiira ni kawaira nakon te namakin n toronibwai.
Te katooto, ngkana ti rinanon te rawawata n nano, te un, te nanokawaki, E tangiriira bwa ti na maroro ma Ngaia, ma ti riai n aki toki ikanne—ti kainnanoia ni karaoa ara kabanea ni kona n mwakuri wirikiriki ake e anganiira; ni kawakini tuua; kawaran te tembora ni kakaea te rau, raunnano, ao taian reke; n iangoi raoi reirei mai irouia burabet ao n onimakina ana Babaire ibukira.
Tamara are i Karawa e a tia n anganiira bwaai ni mwakuri aika a mwaiti ibukin karekean te marurung n te namakin, ma ngkana ti a tia n anga ara kabanea n tamaroa ao ni kunea bwa e aki ibuobuoki ke n iai ara kaangaanga ma aorakin ara iango, bwaai n ibuobuoki aika raka a kainnanoaki. Iai taai ake ti kainnanoa te nako nakon te tia rabakau ibukin marurungin te iango ke ni karekei reirei ma iroun am bitiobi ibukin kaetieti bwa ko aonga n reitinako.
Katikua n am iango, bwa, e ngae ngke ti kakaea te kairi mai irouia tabeman ni katoa tai are ti rinanon te kaangaanga, ti kona ni kabuai taai n reirei ao n rikirake i bon iroura. Ni kaokia riki, ti kainnanoia n anga oin ara kekeiaki ae tau ni waaki nako.
Iran Nanon ana Baaten te Uea
N Reirei ao Berita aika Tabu mwakoro 9, Oliver Cowdery e boaaki ibukin ae e kataia n rairi bwaatua aika ana Boki Moomon n akea “iangoana iroum ma tii te kan bubutia te [Atua]” (te kibu 7). I mwina E reireinaki bwa e na “kamatebwaia n [ana] iango.” ni karekea ana reke, ao imwina e na “titirakina te [Atua] ngkana e bon eti” (te kibu 8).
Ngkana ti ira te baaten aei, Tamara are i karawa e na aki katikuira n ti ngaira bwa ti na onimakina oin konabwaira ma ara iango n ara tai n tabeakina marurungin ara iango. E anganira ara tai bwa ti na reiakina aron kabonganan inaomatara n rinerine. Kakaean kaekaan ara titiraki ao kakaean tobwaan ara kaangaanga ma ana Ibuobuoki boni ngaia ae e na buokira raoi n riki n ai Arona. Ma aio n ara iango, ti kona ni Butiia bwa e kaota nakoira arora bwa ti na baeranti riki n ara namakin nakon are ti Butiia bwa e na kamarurungira.
Ngkai ti kammwakura inaomatara n rinerine n te aro aei n ae okioki n te tai are e kataaki iai marurungira, ti rikirake ni marurung n ae karaurau ao n iai iroura te onimaki. E ngae ngke ti aki kainnanoia bwa ti na mwatita n te kiba ngkai, ti kona n anganaki te raunnano bwa E mena irarikira inanon te kawai ao ni kimwareirei n te koaua are E buokiira bwa ti na marurung teutana imwin teutana. Ni katoa bong bon iai te tai teuana bwa ti na rikirake—katauraoira ibukin te bong are ti na kona iai ni kiba i bon iroura.