Oin Bukin te Bitaki n Ara Mwakuri n Ibuobuoki

Ngkai e mwaiti bukin te mwakuri n ibuobuoki, e riai ni kairaki ara konabwai mai inanora bwa ti na buokiia tabeman ni kamatoai rairakiia ao n riki n ai aron te Tia Kamaiu.

Ngkana ti tangiria tabeman n aron ae e karaoia te Tia Kamaiu, ti tangiria ni kan buokiia n aron ae E a tia naba ni karaoia. Ngkai te Tia Kawakin Tibu ae Raoiroi, bon Ngaia te banna ni katooto n te mwakuri n ibuobuoki ae rangin uaana.

Karaoan ara ibubuoki ni katotongan ana mwakuri, e kakawaki bwa ti na uringnga bwa Ana konabwai n tangira, n tabekirarake, ao ni kakabwaia iai te kouru ae korakora ae e reke nakon ae tii buokakin te kainnano. Ni koauana E atai kainnanoia n te bong teuana ma teuana ao iai ana nanoanga iaon karawawatakiia ae ngkai. Ngaia are E kamarurungiia, e kamwarakeia, e kabwarai aia bure, ao n reireiniia. Ma E tangiria ni kan karaoa riki ae mwaiti nakon ae tii tararuan kainnanon te aomata ae ngkainaba (taraa Ioane 4:13–14). E tangiriia ake a mena irarikina bwa a na Iriiria (taraa Ruka 18:22; Ioane 21:22), ni Kinaa (taraa Ioane 10:14; Reirei ao Berita aika Tabu 132:22–24), ao ni karokoia n aia konabwai (taraa Mataio 5:48). Titebo koauana n te bong aei (taraa Reirei ao Berita aika Tabu 67:13).

A mwaiti kawai aika aki kona ni warekaki ake ti kona n ibuobuoki iai ni kakabwaiaiia tabeman, ma ngkana tokin ara kouru n ara mwakuri n ibuobuoki bwa ti na buokiia aomata ni kinaa te Tia Kamaiu ao n riki n ai Arona, ti na mwakuri nako te bong ngke ti nang aki reireiniia kaain rarikira ni kinaa te Tia Kamaiu ibukina ae ti boni bane ni Kinaa (taraa Ieremia 31:34).

Ana Taratara te Tia Kamaiu e Riaon Riki Kainnano aika Ngkai naba

Tabeman aomata e korakora kamiimin aia mwakuri bwa a kairiia raoraoia nakon Iesu bwa a na kamaiuaki. N tokin te tai te Tia Kamaiu e kamarurunga te mwaane, ma E korakora riki nanona ni kabwarai ana bure (taraa Ruka 5:18–26).
Ngke aomata a kaira te aine ae wenenibure nakon te Tia Kamaiu, ngkai E aki motika bukina ni kabuakaka e kamaiua neienne n te maiu n rabwata. Ma E tangiria naba ni kamaiua tamneina, e tuangnga ko na “nako, ao tai manga bure” (taraa Ioane 8:2–11).
A kanako taeka Maria ao Mareta nakon Iesu ni butiia bwa e na roko ni kamaiua raoraona, ae Rataro. Iesu, are e kamaiuiia tabeman n taai aika aki kona ni warekaki, e taona rokona ni karokoa mwin maten Rataro. Iesu e ataa nanoia te utu bwa tera ae a tangiria, ma ni kautan Rataro man te mate, E kakorakorai aia koaua n Rikina mai ieta (taraa Ioane 11:21–27).

Tera tabeua katooto ae ko kona ni karin n te rinan aei?

Tera Ae Ti kona ni Karoia?

Ngkana oin ara kantaninga bwa ti na buokiia tabeman n riki n ai aron te Tia Kamaiu, e na bita aron ara ibuobuoki. Aikai tabeua kawai ae te atatai aei e kona ni kaira ara konabwai n ibuobuoki.

Iango 1: Reita te mwakuri n ibuobuok ma te Tia Kamaiu

Ara konabwai ni kabane ni karao ae raoiroi a bongana, ma ti kona n tarai taai ni katamaroai ara mwakuri n ibuobuoki n reitia ma te Tia Kamaiu. N aron te katooto, ngkana te utu are ko buokia bwa e aoraki, e na manena ngkana e nikiraki te amwarake, ma kaotakin am tangira ae bebete e kona ni kamwaitaki riki man ana tangira te Tia Kamaiu ibukiia. Am ibuobuoki ni mwakuri itinanikun te auti e butimwaeaki, ma tao e kona ni uaana riki ngkana a anganaki te kakabwaia man te nakoanibonga.

Unimwaane Neil L. Andersen man te Kooram n Abotoro n te Tengaun ma Uoman e taku: “Te aomata ae tamaroa nanona e kona ni buoka temanna ni karaoa rabwan ana kaa, n nikira kaain ana ruu nakon te taokita, ni katawanou ma temanna are e nanokawaki, ao ni moangare ao ni kangai mauri ni kanakoraoa ana bong te aomata.

“Ma te tia kawakina te moan tua e na karin baikai nakon mwakuri aika a kakawaki aikai n te ibuobuoki.”¹

Iango 2: Kabanea nanom iaon Kawain te Berita

N taetaena nakoia membwa n te moan tai ngkai te Beretitenti n te Ekaretia, e taku Beretitenti Russell M. Nelson, “Kateimatoako iaon kawain te berita.” Karaoan ao kawakinan berita aika a tabu “e na kauki mataroan nako kakabwaia ma angaraoin te tibwanga.”²

Ngkai ngaira Aomata Aika Itiaki, ti bwabetitoaki, kamatoaaki, ao ni karekea ana bwaintituaraoi te Tamnei ae Raoiroi. Membwa mwaane aika a tau a karekea te nakoanibonga. Ti nako n te tembora ibukin ara entaumente ao ni kabaeaki ni kabane bwa utu ae akea tokina. Aikai otenanti ni kamaiu ao berita aika a tabu aika a irekereke ao ni kakawaki ibukira bwa ti na riki n ai Arona bwa ti aonga ni maeka ma Ngaia.

Iai tabera ae ti na karoia ni buokiia aomata inanon kawaia ngkai ti buokiia bwa a na kawakin aia berita ao ni katauraoi ni karaoi berita n taai aika a na roko.³ Ko na kanga ni buokiia aomata ke utu ake ko beku ibukiia bwa a na karekei otenanti ake imwina ake a kainnanoi? Nanon aei bon buokan te karo ni katauraoia ni bwabetitoa natina te aine, ni kamataatai kakabwaia ibukin berita ake a na karaoi imwina, ke n tibwauai kawai ni karekei riki taneiai aika a uaana ni kaboouan ara berita inanon kanakin te toa.

Iango 3: Kaoa ao Kaungaa

Ngkana e riai, marooro ma naake ko tabeakina aron rairakiia ao aia konabwai n riki n ai aron Kristo. Kariaia bwa a na atai korakoraia ake ko noori ao kaota ae iai nanom irouia. Kakaea bwa itera raa ae a na katamaroaia iai ao marooroakinna bwa ko na kanga n ibuobuoki. (Ibukin rongorongo riki te kaai ni marooro ma naake ko buokiia, taraa “Marooro ibukin Kainnanoia,” Riaona, Tebetembwa. 2018, 6–9.)

Tai maaku ni kaoiia bwa a na iriira te Tia Kamaiu ao ni kariaia bwa e na buokiia ni karokoia n aia konabwai mai ieta. Te kakao aei e kona n riki bwa te maiu ae reitinako, ngkana e irianaki ma kaotan ae iai onimakinaia iroum ao am onimaki Irouna.

Onoua Kawai ae Ti Kona ni Buokiia Tabeman n Rikirake nakon Kristo

Iai iango akana imwina ibukin boutokakiia tabeman ibukin kanakoraoan maiuia ao n rikirake ni kawain aia berita. (Tara Tataekina Au Euangkerio Mwakoro 11, ibukin iango riki tabeua.)

Tibwauaia. Bwaina te kokoaua ao n ninikoria ngkana ko tibwauaia bwa e na kanga ni buokiko te Tia Kamaiu ngkai ko kataia ni kaaniko ma Ngaia man maiuakinan reirein te euangkerio n aki tabe ma baika a tuuka te rikirake.
Kakabwaia aika a beritanaki. Aomata a kainnanoa ae e na iai bukin te bitaki are e a kairoro riki nakon ae a na akea bukin te bitaki. Ni kamataatai kakabwaia ake iai rekerekeia ma te mwakuri e kona ni katauraoa te ungannano ae korakora (taraa Reirei ao Berita aika Tabu 130:20–21).
Kaoa. Maiuakinan reirein te euangkerio e uota te kakoaua ae e koaua (taraa Ioane 7:17) ao ni kaira te rairaki ae korakora.⁴ E kuri n ae mwakuri nako e kona ni kairaki inanona te kakao ae bebete bwa iai te bwai ae a na karaoia ni buoka aron rikirakeia.
Uaia ni babaire. Tera te bwai ae e na riki nakoia aika a tokanikai n teimatoa ni kawakina aia motinanno ni bitaki? Ko na kanga n ibuobuoki? Iai te tai ae baireaki ae iai rekerekena?
Boutoka. Ngkana e ibuobuoki, karikirakea te boutoka n toma ma aomata ake a kona ni buoka te aomata n teimatoa ni kaungaaki ao n nako raoi. Ti bane ni kainnanoa kaungakira.
Manga ririmwin. Tibwaua te rikirake ni katoa tai. Kateimatoa am taratara iaon te babaire ma kanakoraoia ngkana e riai. Bwaina te taotaonaki n nano, teimatoa, ao te kaunganano. Te bitaki e kona n anaa te tai ae maan.

Te Kakao ni Mwakuri

Iangoa waakin am konabwai n ibuobuoki—n ae bubura ao n ae uarereke—e kona ni buokiia tabeman ni kakorakora rairakiia ao n riki n ai aron te Tia Kamaiu.

Tibwaua Am Taneiai

Kanakoa nakoira am taneiai ngkai ko buokiia tabeman ke ngkai ko a tia n ibuobuoki nakoia. Nako nakon liahona.lds.org ao kotea “Kanakoa te Rongorongo ke te Kukune.”