Te Kanre-Aiti te Buoka nakon te Mition
Te tia korokaraki e mwakuri bwa te mitinare i Biribin ao ngkai e a maeka i Virginia, USA.
“E taku Iesu nako ina, Kakawakinia au tibu” (Ioane 21:17).
E rianna n okira mweengana Iareta man te taromauri i aan kirokiron te riringa ma Tinana ao Tamana. E iangoa reireiana n ana reirei n te Moanrinan. Ibukina bwa e aki raoiroi ana kakauongo, Iareta e riai n tarai tamnei ake e kaotii ana tia reirei ao taeka ake e korei i aon te burakibooti.
N te bong anne a reiakinna bwa Iesu e tua nakoia ana reirei bwa a na riki bwa mitinare. E iango Iareta bwa tera ae kona ni karaoia n tibwaa te euangkerio, n aron are e tua Iesu. E ataia ae e tuai roro n te nako ni mitinare n te tai aei. Ngkanne e reke ana iango ae tamaroa. Tao e kona ni waakina kawakinan te mwane ibukina!
Ngke e roko ni mweengana, e biri Iareta rirakin Umber, ana man te kooti, ao e rin nako n te auti. E anaa te turumwa ao e karaua ni korea te bwangabwanga mai i etana. E korea ae kangai “Te Buoka nakon te Mition” irarikina. Imwina e nakon ana ruu ao n anaa ana mwane mai i aan ana kainiwene. Teuana imwin teuana e kabwakai ni kabane tianti. Ma ni kabane ana mwane e kuri ni kaona kabin te turumwa. E na kanga riki ni kareke mwane?
E a iango ma e a iango. E taraa taai ae kirokiro man te wintoo. E bon rangi ni kabuebue aoni Biribin. Iareta ao raoraona a kana te kanre aiti e kuri ni katoa bwakantaai imwin te reirei. “Ngaia anne!” e iango. Tao e kona n karaoa te kanre aiti ao ni kabonakoa nakoia aomata ake a kani kamwaitoroia.
E biri ni kakaea Tinana. “Ko kona n reireinai aron karaon te kanre aiti?” E taetae ma baina. A kabongana te taetae n tiaina, te aeka n taetae ae ko taetae ma baim. E wingare Tinana ma ni katoutoua atuna.
N te bong are imwina, Iareta ao Tinana a nakon te mwakete ae bubura ao ni kabooi bwaina. Ngke a okira mweengaia, Iareta e anaa te boora ae bubura ao n rengana te raniben, te mirikibua, te vanilla, ao ai te ben ae kokoaki. Ngaia ma Tinana a kabongana te mamata ni kaboroa are e a tia nako nanon taian aiti baeki aika a uarereke. A karini aiti baeki inanon te aitibwaoki. “E tamaroa!” E taetae ni baina Tinana.
E anaa te tai ae maan kaburaokan te kanre aiti. Ma n te bong are imwina imwin te reirei, e a tauraoi raoi! E toka iaon te kaintekateka ao n anaa te kuura ae mainaina ae e mena iaon te aitibwaoki. E karini taara tabeua i kabin te kuura ao ni katokai taian kanre aiti iaona. E rangi n ingainga ni kabonakoa.
E biri nako tinaniku nakon te kawai ae bubu. A takakaro raoraona ma utuao aika oin aia kakaraoi ao a kare tiin ni kabonganai aia kauniwae.
Irarikin te kawai, e kamena ana taibora ma te koroboki ae bubura ae kangai, “Kanre Aiti, 5 te pesos.” Raoraona ae Jhonne e biri nako na ma ni kotekotea te kuura. E angan Iareta nimaua te peso, ao Iareta e anganna teuana te kanre aiti. A orobai.
Imwina iai riki raoraon Iareta aika a roko naba ni kabooa te kanre aiti. Tabeua te aoa imwina ngke e wewete tinana nakoina, ai bon tabeua nikaran te kanre aiti.
E anaa te kuura ae e a kabi kanoana n ikotaki ma taian tianti. Ni buuana teuana, e karin tabeua tianti bwa ana kabwianibwai. E karina nikiran te tianti inanon buuana are teuana. E ingainga nanona ni kan noora ana bangke bwa e na onrake.
Ni mweengana e karin tianti ibukin buokan te mition nako nanon te turumwa. E mwaiti riki ae e tuai kakanoa! Ma e namakina te rau Iareta n iangoan te beku n te mition n te bong teuana. E iangoia bwa e na kabonakoa te kanre aiti ni katoa bong ni karokoa e onrake ana turumwa. Bon te namakin ae tamaroa karekean te mwane bwa e aonga n riki bwa te mitinare are e tua Iesu nakoina.