Kanikina n te Nu Tetemanti

E anaaki man ana rongorongo Russell M. Nelson,“N te Aba ae Tabu Aio,” Tambuli, Beberuare 1991, 13, 17, 18.

I rarikin taian reirei, ti kona ni kunei nanon taian bwai, katei, rongorongo ni kawai, ao tabo n te Nu Tetemanti.

the River Jordan

Tamnei iroun Getty Images

Te Ran: “Te Karanga are Ioretan bon te tabo are e rineia Iesu ibukin Ana bwabetito iroun Ioane ni ‘karaoa te raoiroi ni kabanea’ [Mataio 3:15]. E kakawaki karaoan te otenanti ae e tabu aio ngkai e karaoaki n te tabo ae e kuri ni karako iai te ran ae boou iaon te buraneti? Tao E na kona n rinea te tabo ae tamaroa riki are e kanikinaea aron karinanoana are e a tia n inako iai ao n otirake mai iai?”

Taian Maunga: “E aki bebete tamwarakean taian maunga. Ngkoa, ao ngkai, e weteia Ana abotoro te Uea bwa a na tamwarakea te maunga ni katereterea bwa te korakora e na reke man te kekeiaki ao te ongotaeka. E na bon tangira naba ae ai aron aei mai iroum, n ae kanga te katautau ao tao n ae e bon rinanoaki raoi, naba.”

hand squeezing olives

Oriweta: “E roko Iesu n rabeen te Maunga are Oriweta ni karaoa te moan itera n te Mwakuri ni Kamaiu. E katia te moan itera n te Mwakuri ni Kamaiu n te Onaroka i Ketetemwane. Te taeka Ketetemwane e reke man uoua boton te taetae n Ebera: gath, nanona ‘taona,’ ao shemen, nanona ‘oera,’ ni kaineti riki ma te oriwa.

“Ikanne are taian oriwa a taonaki iaan rawawatan te wiira ae te atibu ni katinakoa te oera ae e kakawaki mai iai. N te aro naba anne are te Kristo n te Onaroka i Ketetemwane e taonaki raoi iaan rawawatan ana bure te aonaaba. E waanako maonona bwa raraa aika tim—maiuna ae te ‘oera’—are e nako man bwangabwangan rabwatana. (Taraa Ruka 22:44; R&B 19:18.)”

Te Tabanou: “Te Mate iaon te Kaibangaki e riki n te maunga ae arana Korokota (Ebera) ke Calvary (Ratine) nanona ‘te tabanou.’ Te tabanou te kanikina ibukin te mate. N te tabo ae ai aron aio, e a kakoroaki iai bukin te karea ni kamaiu. Iaon te kaibangaki, te tia Kamaiua te aonaaba e a tabekakirake iaon te mate bon te kabanea ni kakawaki ni mwakuri ae nano nanona—ataakin ao koauan mwaakan te Uea iaon te mate.”