Kairake n Ikawai

Reirei iaon Karaoan Mwin Am Mwakuri

Ni katoa tai are I iangoa aron te riki n toronibwai, ana kibuntaeka au beretitenti n te mition e roko n au iango: “Karaoa mwin am mwakuri ma tai anganiia tabeman.” Eng, bon te mwakoro n taeka ae kamiimi, ma e bati te koaua n te iango ae iai bwaai aika a matoatoa inanon maiura are tiaki kona n tuangiia tabeman bwa a na karaoi ibukira.

Ngaia are ti na kanga ni “karaoa mwin ara mwakuri ma ti na aki anganiia tabeman” ni kaineti ma toronibwain ara namakin? Ti na kanga n buoka aron te nano ae e aki kukurei ao n reireiniira ni katamaroai ara namakin?

Ti kakaitau, bwa ti aki katukaki n te roo—a mwaiti bwaai n ibuobuoki. Ti kona ni kunei aikai n “14 Kawai ibukin Kaokan Marurungin Am Iango bwa E na Okira Arona.” Ae e kakawaki riki, ti kona ni kabebetea te maiu ngkai ti kawakin tuua (taraa iteraniba 44).

N reiakina totokoan bwaai ni kabane ake a reke nakoira man te maiu aei bon te bwai ae e na waakinako. Te riki n toronibwai n te namakin e aki nanonaki bwa ti na namakinna n tainako te bwai are ti tangiria. E nanonaki bwa, rinanon ana nanoanga Iesu Kristo ao n oin ara kekeiaki, ti na kona n taua aron ara namakin n te aro ae marurung ao bongana. Beretitenti M. Russell Ballard e anganiira tabeua taeka n reirei aika a kona ni kabaeranta aio (taraa interaniba 48).

Ngkai ti keiaki ibukin karekean te toronibwai n te iango, ti na bae n namakina ae ti a nimamate n aron te mannikiba ae e uarereke (taraa iteraniba 46), ma ngkana ti keiaki ao n raona Tamara are i Karawa, ti na kona n ataia raoi bwa n te taina ti na “mwemwe rake ni baia ni kiba n ai aroia ikare” (Itaia 40:31), are bon katamaroan taekan ae iai korakorara n karaoi mwin ara mwakuri.

A bane n raraoi,

Heather J. Johnson

Reirei aika Raraoi …

A tibwai taeka n reirei aika a raraoi kairake n ikawai ake a tia ni karekei ibukin taraan marurungin aia namakin ao aia iango:

“Karekea te tai ibukim ni karaoa te kamarurung, ni kaitiaka nanomi ao ni kanakoi taian iango ao namakin aika kamamate.”

—Brianna Forrester, Washington, USA

“Tai maaku ni kawara te aomata are e kona ni buokiko n aekakin aoraki nako. Man taraan raoi ikotakin katokan te aoraki n tamnei ao n rabwata, I a tia ni kona ni maiuakina maiu ao n tataninga weteu man te mition bwa I aonga ni beku ibukin te Uea.”

—Nate Seal, Utah, USA

“Karaoi bwaai aika raoiroi ma te karaurau ngkai ko kabotoa maium iaon Kristo.”

—Nan Crews, Louisiana, USA

“Uringnga ni karekea te motirawa ae e tau. E taraa ni kamanga, ma bon te kabanea ni kakawaki!”

—Sydney Smith, California, USA

Teraa te kabanea n tamaroa n reirei ae ko karekea ibukin ae ko na aki rang karawawatako? Kanakoa am kaeka iaon liahona.lds.org n Tianuare 31, 2019.

Tibwaua Am Karaki

Iai am karaki ae kakaongora ae ko na tibwauaia? Ke ko tangiria n noora te bwai ae e onoti iaon atuun tain rongorongo? Ngkana ngaia anne, ao ti tangiria ni kan ongo mai iroum! Kanakoa am karaki ae ko koreia ke am kaeka iaon liahona.lds.org.

Aikai Riki Ibukim

Noora “Kairake n Ikawai ni Katoa Wiiki,” ae kuneaki n aia iteraniba kairake ni ikawai iaon te Gospel Library app, bwaai aika a maiu man te iti ni kabwarabwaraana ae e tauraoi ni katoa wiiki, ao kawariira n facebook.com/liahona ni karekei rongorongo n tii te aonraain ao kanuangan rongorongo.