Man te Maaku nakon te Baka n Amwarake
Matt Maxwell
Utah, USA
Kamataata n te tamnei iroun Greg Newbold
I rang ni kakaonimaki n te Ekaretia inanon maiu. I a tia ni beku n au tai ae e bwanin n te mition, ni mareaki n te tembora, ao I buokiia ni karikirakeia natiu aman ataeinaine aika a kakateke. Inanon te ririki teuana ma teuana, I ataia ae tabeman raoraou a kitana te Ekaretia. Tabeman kain te utu a kabonganai taian rongorongo ake iaon te intanete n titiraki ao ni kabuakakaia taan kairiiri n te Ekaretia. Ao e a moanna n reke te nano uoua irou ibukin te Ekaretia n te moan tai inanon maiu. Au nanououa e a karika te maaku ibukin taai aika a na roko. N taai tabetai, I a rootaki n te bwarannano.
N tain te karawawata aio, I a bon imanonoai bwa N na kaea te maungatabu n te titeiki. N ana tai n taetae te beretitenti n te titeiki, e taku, “Ngkana ti na tokanikai iaon taai ni kaangaanga aika imwaira, ti na riai ni mwaing man tautauan nanora n tain te baka n amwarake nakon te ienikuri n tain te baka n amwarake iaon ana taeka te Atua. Ti riai ni karaoa n taainako ao ni katurua ara kamatebwai ni koroboki aika tabu bwa te moan bwai ni maiura. Ngkana ti karaoia, I berita bwa ti na bon aki maaku.”
Te taeka ae “maaku” e katika nanou ni kan ongora. I ataia bwa I a tia ni kariaia ae e na rangi uarereke au tai ni kamatebwai n te euangkerio. Ao n tokina, e a taonai te maaku ni maiu. I a iangoia bwa N nang karaoa nanon ana reirei te beretitenti n te titeiki.
I okira mweengau ao I karaoa te tabo ni kamatebwai ibukin te euangkerio. Ni koonan te ruu, I a bairea te taibora ae e uarereke ao te kaintekateka ae e kamwengaraoi iai. I a katekei tabeua tamnein te tia Kamaiu iaon te oo. I a botii au boki aika tabu, tabeua bentira, ao te boki ni koroboki. I moana au kamatebwai ma te tataro.
Imwin teuana ke uoua te wiiki, e a reke aron au kamatebwai ni katoabong. N na riai moa n ongora nakon taian marooro man te maungatabu ni kabuta ao imwina I a kamatebwaia teuana reirein te euangkerio. Ngkane N a manga wareware n tabeua mwakoro man Ana Boki Moomon ao I a kabanea au kamatebwai n te tataro ae I bon nanonna nakon Tamau are i Karawa.
E ngae ngke a rawata bwaai ni katabetabe, e bon aki bua au bong ni kamatebwai n te euangkerio inanon onoua namakaina. E rikirake ni korakora mataatau iaon reirein te euangkerio aika bati ao e korakora reitakiu ma Tamau are i Karawa rinanon te tataro ni katoa bong.
Au koaua e a manga riki bwa te bwai ae I kona ni katan iaana. E a moana ni mauna te nanokokoraki ibukin te kakoaua ae e boou are I a tia ni karekea n te euangkerio are e kaokaki. I ataia bwa e a karako raraomau ibukina bwa I a onimakina riki te Atua. I namakina ae te maaku ao te bwaranano akea mai irou. E a bua naba te nano ni karaoan waaki ni kakukurei ake a kabanetai ao I a ataia ae I a moanna n rang n akoi ao n tangira nakoia tabeman.
Ngkai I a tia n ongo nakon ana reirei au titeiki beretitenti, e a kona te Atua ni bitai. I kamaIuaki ao ni kaokaki i bon iroun te Mataniwi ngkai I a tia n amwarake n Ana taeka.