Waniua Iango ibukin Kabaerantan te Maiu ae Kairoro

Beretitenti M. Russell Ballard

Bonomwi ni Beretitenti n te Kooram n Abotoro n te Tengaun ma Uoman

Man te marooro n te maungatabu ni kabuta n Eberi 1987.

Iai tabeua iango ake au kantaninga bwa a na uaana nakoimi ake a tabeaianga ma kabaerantan te maiu ae kairoro.

Te Moan, iangoa maium ao katei am moanibwai. Kakaea tabeua te tai ae rau ni katoa tai ni iango raoi bwa ko na nakea ao tera ae ko kainnanoia ni karaoia bwa ko na roko ikekei. Iesu, ara Banna, n angin te tai “e nako ni maeka n te rereua, ao E tataro” (Ruka 5:16). Ti kainnanoa karaoan aekakin aei n taai tabetai ni manga kakorakoraira n tamneira n ai aron are e karaoia te Tia Kamaiu. Korei mwakuri ake ko kan kakoroi nanoia ni katoa bong. Moanibwaia n am iango berita aika tabu ake ko a tia ni karaoi ma te Uea n am tai ni korei babairean am bong.
Te Kauoua, katei kouru ibukin te tai ae aki maan ae ko kona ni kakoroi nanoia. Katei kouru aika a baeranti raoi—aki rang mwaiti ke aki rang uarereke, ma e aki rang rietaata ke n rang rinano. Korei am kouru aika kona n reke ao mwakuri ni kaineti ma kakawakiia. Tataro ibukin te kairi mai i eta ni katean am kouru.
Te Kateniua, rinanon te kataumwane ae wanawana, babairea oin kainnanom ao katinei raoi ma baike ko tangiri ni maium. E rang mwaiti aomata ao utu aika a kabaeia ma te tarau ae riao. Tarai ngkami man taian anainano aika mwaiti n tango mwane. E rang bebete te tango mwane nakon kabwarana. Akea te kawai ae kimototo nakon te riki n toronibwai n ara kataumwane. Ti na bon aki karekea te baeranti ni maiuira ma ti ngkana ti bairea raoi ara kataumwane.

Uringnga ni kabwaka am kabwianibwai n taainako.
Te kaaua, teei ni kaan ma kainnabam, natim, am koraki, ao raoraom. A na buokiko n kabaeranta maium. Karekei reitaki ma am utu ao raoraom rinanon te reitaki ae uki ao ae e koaua.

Te mare ae tamaroa ao te reitaki ae tamaroa n te utu e kona n kateimatoaki rinanon te reitaki ae amarau, ae tatangira, ao ae iaiango n reitaki. Uringnga bwa n angin te tai, tarakin temanna n ae waekoa, kakeean te mata, katouan te atu, ke ringan temanna e korakora riki nanona nakon tain taeka. Te anua ni kamanga ao te ongora raoi boni mwakoron te reitaki aika kakawaki.
Te kanimaua, kamatebwai koroboki aika tabu. A anga teuana bwaai n ibuobuoko aika moan te tamaroa bwa ti na teimatoa n reitaki ma Tamnein te Uea. Teuana te kawai are I karekea iai au atatai ae aki nanokokoraki bwa Iesu bon te Kristo bon rinanon au kamatebwai ni koroboki aika tabu. Beretitenti Russell M. Nelson e a tia n tuangiia membwa n te Ekaretia bwa a na kamatebwaia ana Boki Momon ma te tataro ni katoa bong.
Te kaonoua, Ti riai n bairei taai iaon ara karenta ibukin te motirawa ae tau, te kamarurung, ao te kabebete ngkana ti na kimwareirei n te maiu ae marurung mani baeranti. Tarakin tinanikura ae tamaroa e na kamatoa karineakira ao onimakinara i bon iroura.
Te kaitiua, karaoa bootakin te utu n te tairiki ni katoa wiiki. Ti riai n aki kabuaa te tai ae onoti aei n “reiakini imarenami reirein te abanuea.” (R&B 88:77) are e kairiia utu nakon te maiu ae akea tokina.

Tatan e mwakuri n taainako n uri ara koaua, ma e aki kona n reke mwaakana n kaririira ke ni kamangaoira n ae riaon ara korakora ni kaaitara ngkana ti kamatebwaia te euangkerio ao ti maiukini tuua.
Au kabanea n iango bon te tataro n taainako. Ko kona n ata te rinerine ae eti ae ko na karaoia ni katoa bong rinanon te tataro ae teimatoa ao ae man te nano. Ngkana I reitaki inanon te tamnei, i kunea bwa i kona n kabaerantii bwaai ni kabane ni maiu n ae bebete riki.

I a ataia a kona n ikotaki iango riki tabeua ma aikai. Ma, I kakoaua bwa ngkana ti katurua ara taratara iaon bwaai aika ti konaa ni kakoroi nanoia aika bebete, ti na kona riki n babairei ana kairoro te maiu are e anganira. Uringnga, ngkana e riao mwaitin te bwai teuana ni maiuira e na kona n tewenakoira man ara baeranti. N reitaki ma aei, uarereken baika a kakawaki e kona ni karaoa ai aron aei. E reirei te uea ae Beniamina “bwa a na karaoaki bwaai aikai ni kabane n te wanawana ao n te tangira” (Motiaea 4:27).

N angin te tai bon aki taun te kaetieti ae itiaki ao kouru a kona n kabanebuaka ara tai ao korakorara ao n anganiira te aki baeranti ni maiura. Oin ara kouru bon ukoukoran te “aki mamate ao te maiu ae akea tokina” (Mote 1:39). Ma aei bwa ara kouru, bukin tera ti na aki kanakoi mani maiura bwaai aika a kaberoroi mani roota ara iango, namakin, ao korakora n akea buokan kakoroan nanon te kouru anne?

Tii karaoa am kabanea n tamaroa ni katoa bong. Karaoi baika a bebete ao, imwain ae ko ataia, ae maium e na onrake ma te ataibwai n tamnei ae e na kamatoaa nakoim bwa e tangiriko Tamam are i Karawa. Ngkana e ataa aei te aomata, ngkanne te maiu aei e na onrake ma te kantaninga ao ae e bongana, ni kabebetea kateimatoan te baeranti.