Taan Kakaae A Bwaka man taian Aroka
Yamila Caminos
Buenos Aires, Argentina
Kamataata n te tamnei iroun Robert Crawford
Nakoia mitinare aika kairake aika a ririaki ni kaawan nako Buenos Aires, Argentina, n te 1995, te berita are a karekea mai iroun te membwa n te Beretitentii n te Aono e taraa ni kamimi: “Ngkana kam mwakuri korakora ao kam ongotaeka n ae bwanin, taan kakaae a bwaka man taian Aroka bwa a na bwabetitoaki.” Ti kunea imwina taekan te berita anne tabeua te tai imwina.
Tamau e korei ni kauarerekei taian aroka irarikin te tabo n nakonako i moan ara auti. Ngke e mena i etan te aroka ni korokoro, e nooria uoman ataeinimwane aika mwananga ni kainetia inanon te kawai. Ngke a riaan te aroka, e wewete nakoia ni Imatang.
E aki bati ni bwati n taetae n Imatang tamau, ma e atai tabeua taeka, ao e tabetabe nanona. Antai ataeinimwane aikai, ao tera ae a karaoia n ara kaembwa?
A tei mitinare, ni mimi bwa e roko ma ia te bwana. E ruo rikaaki tamau man te aroka bwa e na kataetaeia. Ni mataaina n aia rongorongo ao aroia, e kaoia nakon mweengana.
Te bwai ae e a tia n rinanona mai imwaina tamau n reitaki ma te aro e katabeaiangaaki iai, ma rongorongon te euangkerio ae kaokaki e taetae i nanona. E a tia ni maeka rinanon taai aika kangaanga, ao e ataia ae e riai ni bitaki. E ongora raoi ngke a reireinna mitinare, n raonaki ma tinau, tinan tinau, ao ngai.
Ai tibwa 11 au ririki, ma koaua ake a reiakin a taraa ni koaua nakoiu—ao nakon tinau ma tinana. N tokina, ti bane ni bwabetitoaki tabeua namwakaina imwina, n Tebetembwa 1995.
Atin te onimaki are a unikia mitinare i nanora a rikirake man aia iraorao raao n te taromauri, tabeua riki reirei n te euangkerio, ao baika tamaroa ake a rinanona taan kairiiri n te Ekaretia aika a korakora. Ibukin te butimwaai ae mwaitoro are ti karekea, atin ara onimaki “a bwaka i aon te tano ae raoiroi, ao a riki rake, ao a kariki ua aika tatabebubua” (Ruka 8:8).
Atin ara onimaki are ti kimwareirei iai ngkai—e kaaniia 25 te ririki imwina—n ikotaki ma te motinnano ae matoa nakon ana euangkerio Iesu Kristo ae kaokaki, kakabwaia man te tembora, ao te maiu ae kakukurei man bwanin ma te roro ae boou aika kaain te utu aika ikotaki ibukin te tai ae akea tokina.
Ti na teimatoa ni karabwarabwa nakoia uoman mitinare aika kakaonimaki ake a kataa te berita mani karaoana.