Te Kabanea n Taeka
Te Bootaki n Toa ao Karekean Anuan Kristo
Iroun Unimwaane D. Todd Christofferson
Man te Kooram n Abotoro n te Tengaun ma Uoman
Man te marooro n te maungatabu ni kabuta n Okitobwa 2017.
Kanikinaean te toa n ana kabanea n amwarake te Uea e rang tamaroa iangoana. Te berena ao te ran a tei ibukin irikona ao raraana are Ngaia te Berena ni Kamaiu ao te Ran ni Kamaiu (taraa Ioane 4:10), e ringa te nano ni kauringiira boon kamaiuara are E kabooira iai. Ngkai e uruakaki te berena, ti uringa uruakakin irikon te Tia Kamaiu. Ngkai ti nima te ran, ti iangoa raraana are E bwaro i Ketetemwane ao iaon te kaibangaki ao mwaakana ni kaitiaki (taraa Mote 6:60).
Ma katamneian kanakin irikona ao nimakin raraana e mwaiti riki nanona, ao anne bon namakinana inanora raoiroin ao anuan Kristo. … Ngkai ti kana te berena n toa ao te ran ni katoa wiiki, ti karaoia n iangoa tabwaninin are ti riai ni karekerekei Anuana ao tein maiuna ae akea kairuana nakon maiura ao arora. Iesu e aki kona ni mate ibukin aia bure aomata ma ti ngkana akea Ngaia Ana bure. Ngkai akea korakoran te motikitaeka Iaona, E kona n anga Ngaia n onei mwiira ni kakoroa bukin te motikitaeka ao n anga te nanoanga. …
Kanakin irikon ao nimakin raraan te Tia Kamaiu nanona kaotinakoan bwaai man maiura ake aki teimatoa ni kaineti ma anuan Kristo ao ni karika Anuana bwa anuara. Aio nanon te rairannano ae rabaaba; tiaki tii n tannako man buure rimoa ma “bitakin te nano ao te kantaninga nakon te Atua” ni waaki rake (taraa Rikitionare n te Baibwara, “Rairanano”). Te Atua e na kaoti kairuara ao kabwakara, ma E na buokiira naba ni bita te mamaara nakon te korakora (taraa Ita 12:27). Ngkana ti titiraki ma nanora, “Tera ae I kabwaka iai?” (Mataio 19:20) E na bon aki katikuiira bwa ti na keeti, ma inanon te tangira E na kaeka ibukin kukureira. Ao E anganiira te kantaninga.