Ara Bwai ni Kaabue E Mwakuri iaon te Onimaki
Lois Mansius
Texas, USA
Kamataata n te tamnei iroun Kopp Illustration
Ngke kainnabau, Mark, ao ngai ma natira niiman aika uarereke ti maeka i maeaon mataniwiin taari n te United States, ti maeka n te auti ae iai ana bwai ni kaabue ae maiu man te oera. Ngkana ti na tuoa tian te oera, ti karina te kai n tau abwaki inanon te tangke. Ao ngkana e uarereke te oera, ti bae ni wetea te kambwana n oera bwa e na roko ni kanoaia.
N tain te mwaitoro ae aki bati n riiriki n Tianuare, ti a rinanon te kangaanga n te mwane. I ngae n itera n tai ni mwakuri n te tairiki n te tabo n amwarake ni buoka au karekemwane, ma ti teimatoa n iai ara kaangaanga ni karekean tokin bwaai aika ti kainnanoi. N tokina e a roko n te rinerine ni kabwakaan ara kabwianibwai ke kabwakaan boon te bwai ni kaabue n ara auti. Ti noora tian te oera ao e a roko n tii uoua te inti (5 cm). Anne e na bon ti kona ni mwakuri inanon tebongina ke uabong. Ma ti baireia bwa ti na katuka ara onimaki iroun te Uea ao ti kabwaka ara kabwianibwai.
Te bong are imwiina, Mareko e a manga noora riki mwaitin te oera. E bon tiku iaon uoua te inti. Mark e manga nooria riki n te bong are imwiina, ao e bon teimatoa n tiku iaon uoua te inti. Te kabuebue e bon teimatoa n roko, ma te oera e aki keerikaaki. Boong aika uoua ake imwiina, te oera e teimatoa n tiku iaon uoua te inti. I uringnga ngke I tang ni kukurei n te tairiki ngke I ongo tangin te bwai ni kabuebue ni maiu. Ara bwai ni kaabue e aki maiu iaon te oera, e mwakuri iaon te onimaki.
I namakinna bwa kanga ai aron te aine are akea buuna are e kamwarakea te burabeti Eria ao e kunea bwa “e aki kenako kanoan te bwaketi ni baraua, ao e aki bane naba kanoan te batoro ni bwa” (1 Uea 17:16). Ngke e a roko te tai ni bwakabwai, Mark e a manga noora naba mwaitin te oera. N te tai aei e a roko n teuana te inti (2.5 cm). N te tai aei e a kerikaaki te oera, ma e a reke ara mwane ni manga kanoa te tangke.
Ara utu ti a tia ni kataaki n ana berita te uea are e reke ni Maraki 3:10: “Ao kam na katai ngkai n aei; e taku aia Uea Taanga ni Buaka, bwa tao N na aki kauki wintoon karawa, ma ni kabwaroa te kakabwaia i aomi n te aro are kam na aki kona ni butimwaei.”
Nakoia ake a nanokokoraki n te kakabwaia ni kabwakaan te kabwianibwai, I kaungaiia bwa a na butimwaea ana kakao te Uea bwa a na “kakoaua ngkai n aei.” Kabwakaan kabwianibwai e kauki mataroan karawa, ao rinanona te ongotaeka ao te kakaonimaki nakon ana tua te Uea ao ana tua nako, ti na kakabwaiaaki n aro aika a mwaiti.
Ara utu aki kona ni mwaninga ngke ara bwai ni kaabue ae maiu man te oera e mwakuri iaon te onimaki n onea mwiin te oera.