Kawakin Au Tua
Ko a tia n iango, “N na kanga ni kaotia bwa I rang n tangiria bwa Tamara are i Karawa E na kaekai au tataro ao e na kakabwaiaai?” Te Tia Kamaiu Iesu Kristo e a tia n anganiira te kiing ngke E taku “Ngkana kam tangirai, ao tou mwiin au tua” (Ioane 14:15).
N taekana teuana, ti kaota ara tangira nakon Tamara arei Karawa man kawakinan Ana tua nako.
N tabetai te kaeka e aki roko ngkana ke n aron are ti kantaningaia, ao ti kona ni kataaki bwa ti na bwarannano ke ti na toki man te ongotaeka. Ma ngkana ti taotaonannano ao ni kakauongo, te Uea e na kaekai n oin Ana tai ao n ana kawai. E kaekai n taainako tataro aika a raoiroi. E kakabwaiaia n taainako ake a ongotaeka (taraa Motiaea 2:21–24).
Te aonaaba e reirei bwa te tangira akea katabeana. Ma Kaitaraana e boni koaua. Ara tangira nakon te Atua e kaotaki man ara anganano ao ara mwakuri korakora ni kawakin Ana tua.
E reirei te Tia Kamaiu, “E na kainaomatai ngkami te koaua” (Ioane 8:32). E kabwaranakoa riki te burabeti are Aramwa, “te aro ae buakaka e bon aki kona ni karekea te kakukurei” (Aramwa 41:10). Ao rinanon te Burabeti Iotebwa Timiti, e reirei te Uea, “Iai te tua ae e aki kona ni bibitaki are e kateaki i karawa imwain karikan te aonaaba aei, ake e boto iaona kakabwaia ni kabane—ao ngkana ti karekei kakabwaia nako mai iroun te Atua bon man te ongeaba nakon te tua anne are e boboto iaona” (Reirei ao Berita aika Tabu 130:20–21).
Kukurei, kakabwaia, ao te kairaki e roko rinanon te ongotaeka. Tamara are i Karawa e tangiriko bwa ko na kukurei ma n inaomata ibukina bwa E tangiriko, ao anne bukina ngkai E anga ana tua. Karekean te rau are e aki reke n te aonaaba aei, ti riai n ataia bwa nanora n anganga nakon ana kantaninga Tamara are i Karawa bon tii ngaia te kawai nakon te kakukurei.
Tamara are i Karawa e tangiria bwa ko na karekea te kukurei ae akea tokina. Ana burabeti a tangiriko bwa ko na karekea te kimwareirei ae akea kabotauana. Ti tangiria bwa ko na karekea te rau are ti a tia ni karekea n iriirakin te Tia Kamaiu. Toua te kawai are E a tia ni kaotia (taraa “Lord, I Would Follow Thee,” Kuna n Taromauri, nambwa 220). Rineia bwa ko na ongotaeka. Nanom ni kan ongeaba e na kairiko nakon te kainaomataaki ni koaua ao te kukurei.