Savali a Taitai o le Eria
Iloaina o, malamalama, ma le tausia o poloaiga a le Atua
O le tasi o mea o le iloaina o poloaiga. O le isi mea o le malamalama i poloaiga. Ae o le isi, o le tausia ma le loto i ai o poloaiga.
I le avea ai ma se tagata fou liliu mai i le Ekalesia, i le sefulutolu o tausaga, sa ou iloa ai poloaiga. Peitai, ou te le’i malamalama i le mafuaaga mo nisi o poloaiga a le Alii, pe sa ou mafaufau foi e mafai ona ou vaaia faamanuiaga o le tausiaina o [poloaiga]. Mo se faataitaiga, o le tausiaina ma le faamaoni o le Upu o le Poto mo se taimi, o lo’u malosi ma le malosiaga e taalo i taaloga sa le sili atu, ma i nisi tulaga, e sili atu ona leaga, nai lo a’u uo taaalo o e na le usitaia vaega uma o le Upu o le Poto. Na foliga mai o i latou na mafai ona, taufetuli ae lē vaivai 1, ae le o a’u, peitai, i le faatuatua sa ou faaauau pea ona usitai.
E le gata i lea, sa foliga mai ia te au o poloaiga sa saisaitia ai a’u i totonu ma faatapulaa ai a’u sitaili. Peitai, i le taimi nei, i nai 48 tausaga mulimuli ane sa ou vaai ai i poloaiga o se saolotoga, ae le o le saisaitia. O a mea na sui? E mautinoa lava e le o poloaiga. O lo’u malamalama ma o’u uiga na sui.
Ua ou vaai nei i poloaiga e pei ona ou vaaia faailoga “’a’au i va o le fu’a” i le matafaga; ma le talisapaia. Ina ia olioli ma le saoloto i se taelega i le matafaga, i se vaega lea sa mua’i fuafuaina e saogalemu, ou te filifili ai e ‘a’au i va o fu’a. Ioe, e mafai ona ou filifili e ‘a’au i se isi mea, ae i le faia ai o lena mea, e tatau ona ou taliaina taunuuga o lena faaiuga.
Ua ou filifili nei e tausi ia poloaiga aua ou te maua ai le filemu ma le saogalemu silisili i le faia, ma i le aluga o taimi, ua ou vaaia faamanuiaga i le usiusitai i poloaiga.
Na saunoa Elder Dale G. Renlund o le Korama a Aposetolo e Toasefululua e uiga i poloaiga, “O le fuafuaga a le Atua e aofia ai faatonuga mo i tatou, o loo faatatau i ai tusitusiga paia o ni poloaiga. O nei poloaiga e le o ni tulafono e faafiafia ai pe o se faaputuga o faasalaga o tulafono ua faamalosia mai ia ua faamoemoe e na o le aoaoina ai o i tatou ia usiusitai. Latou te fesootai ma lo tatou atiinaeina o uiga paia faaleatua, toe foi atu i le Tama Faalelagi, ma le mauaina o le olioli tumau. E ui e finagalo le Atua ia tatou i ai i luga o le ala o feagaiga, ae Na te tuu mai ia i tatou le mamalu o le filifiliga.” 2
Mo a’u, e pei o Nifae, ou te iloa “e ao ina ou usiusitai”. 3
O le olioli, fiafia, faamalieina loloto, o se lagona o le malupuipuia ma le faamoemoega paia, e oo mai, i taimi tatau ai, ia i latou o e malamalama ma tausia poloaiga. O le mea moni, pe a tatou tausia poloaiga i le faatuatua, o le a tatou malamalama i ai. Na sii mai e Ioane le fetalaiga a le Alii, “Ai se tasi e fia fai lona finagalo, e iloa ai e ia le mataupu pe mai le Atua, pe ou te tautala fua lava a’u.”4
Na tusia e Edgar A. Guest upu nei ua maua ai le ute o le faia, e ese mai le na o le tautala i ai.
E sili ia te a’u le vaai i se lauga nai lo le faalogo i ai i soo se aso;
E sili ia te a’u se tasi e savali faatasi ma a’u nai lo le na o le ta’u mai o le ala.
E sili atu le aoaoina soo o mata, sili ona naunau nai lo le taliga;
O fautuaga lelei e fenumiai, ae o le faataitaiga e manino i taimi uma,
Ma o le failauga sili o failauga uma o alii o loo ola i o latou talitonuga,
Mo le vaaia o se lelei e faatinoina o le mea lea e manaomia e tagata uma.
E mafai ona ou vave iloa pe faapefea ona fai pe afai e te faataga au e vaai i le faiga;
E mafai ona ou matamata i lou lima o loo faatinoina, ae o lou laulaufaiva e ono saosaoa tele.
Ma o lauga e te tuuina mai atonu e atamai tele ma moni,
Ae e sili atu lo’u mauaina o a’u lesona e ala i le matauina o mea e te faia.
Aua ou te ono malamalama sese ia te oe ma le fautuaga maualuga e te tuuina mai,
Ae e leai se malamalama sese i le auala e te faatino ai ma le auala e te ola ai. 5
O le avea ma soo e le na o le iloaina o poloaiga i se auala faaleatamai ae e le ola ai. O le avea ma soo e le o le tausia ma le tauaso o poloaiga. O le avea ma soo moni o le malamalama lea i poloaiga ona tausia lea ma le loto i ai, aua ua tatou iloa o [poloaiga] o faamanuiaga ia mai lo tatou Tama alofa o i le Lagi.