Itulau o le lotoifale
So’o Moni, Mulimuli i le ‘Galuega a Keriso,’ i Samoa
“Tatou te ausia lena ola atili e lē ona o le taulai atu i o tatou lava manaoga po o a tatou lava ausiaga ae e ala i le avea ma soo moni o Iesu Keriso—e ala i le mulimuli atu i Ona ala ma auai i Lana galuega. Tatou te maua le ola atili e ala i le faagaloina o i tatou lava ia ma auai i le galuega tele a Keriso.
Ma o le a le galuega a Keriso? O le talitonu lea ia te Ia, alofa atu e pei ona Ia alofa, ma faia e pei ona Ia faia.
Sa “femaliuai [Iesu] ma agalelei.” Sa Ia savavali faatasi ma ē matitiva, o ē ua faaāunu’ua, o ē mama’i, ma ē maasiasi. Sa Ia auauna atu i ē faatauvaa, o ē vaivai, ma ē ua leai ni uo. Sa Ia faaalu le taimi ma i latou; sa Ia talanoa ma i latou. “Ona faamalolo ai lea e ia o i latou uma” (Dieter F. Uchtdorf, “Talitonu, Alofa, Faia,” O Le Liahona, Novema 2018).
Sa feoai le Au Paia i Samoa i le faia o mea lelei i eria uma o alalafaga ma i le tele o auala tulaga ese ma musuia.
Auaunaga i le Alalafaga
O se vaega o le aso o auaunaga lautele i alalafaga i le Pasefika atoa, sa volenitia ai Au Paia i Amerika Samoa e fesoasoani i le galuega i le lotoa o se aoga e umia e se Ekalesia i le lotoifale.
I lena lava aso e tasi o auaunaga, sa faaauau pea e tagata ma uo o le Siteki a Savaii Samoa se tumasani ua tolu tausaga o le faamamaina o le lotoa o le maketi o fua o faaeleeleaga i Salelologa e ala i le veleina o le vao, moaina ma le pikiina o le lapisi i le alalafaga.
Sa saunoa mai Peresitene Setefano Tauvao e fesoasoani mai tagata o le Ekalesia i le alalafaga i soo se taimi lava e talosaga ai mo se fesoasoani. Afai e i ai soo se gaoioiga faalemalo i lea nofoaga, e ofofua atu lava le Au Paia o Aso e Gata Ai e fesoasoani e saunia le nofoaga i togalaau ma galuega faaleleia.
Faasoaina atu o Taleni
Mai i le tamai motu mauga mu o Aunuu i sautesasae o Tutuila i Amerika Samoa, sa faimalaga atu ai se vaega suifefiloai o tagata o le Ekalesia i le lotoifale i Pago Pago e pepese i le faasalalauga i le televise o le Viiga O Siona.
O le aufaipese na aofia ai le autalavou ma le au matutua, o tagata pepese lelei. Sa latou lagiina se filifiliga o viiga paia na tuufaatasi ma afioga tulei, ma faaiuina i se savali mai ia Epikopo Kuresa Tiaua.
O le naunautaiga o nei tagata e “Faamalamalama le Lalolagi” e faaaoga ai a latou taleni sa tauia ai le galue malosi ma taumafaiga a o lagona e tagata faalogologo ia musika ma savali na faasoa atu o ni molimau i le alofa o le Atua mo Lana fanau.
E le gata sa latou tuuina atu se faafiafiaga mata’ina, ae sa latou faaali atu foi le faatuatua ma le tuuto i le galuega a le Tama Faalelagi e ala i le latou tuufaatasia o taleni, ma le lototele ina ia lagonaina o latou siufofoga.
O le faasalalauga o le Viiga O Siona sa i ai aufaipese mai Amerika Samoa atoa. O musika o se natura paia ma saunoaga e masani ona faia e taitai i le lotoifale po o sui o le faapotopotoga.
Foai i Auaunaga Alofa o le Lotoifale ma Vaega o Alalafaga
I le galulue faatasi ai o ni Au Paia ina ia faamanuiaina o latou alalafaga, ua galulue foi le Ekalesia i Samoa ma auaunaga alofa i le lotoifale ma vaega o alalafaga e fesoasoani i a latou taumafaiga amiotonu. Sa galulue le LDS Charities ma le faafeagaiga ia Lenny o le 1Touch, o se vaega e le faapisinisi sa auai i le taua e tetee i le ma’i suka, ina ia fesoasoani i le amio o le ‘Taumafa Maloloina ma Ia Malosi’ lea ua avea o se faamuamua i le Pasefika. Sa foai atu e le Ekalesia se uamea fai papakiu, ato o fualaau aina suamalie ma le masini vili [blender] i tagata na manumalo i le ‘lu’i o le boot camp’ e faaopoopo ai i le galuega.
E pei foi o le 1Touch, o loo auai foi le LDS Charities i se polokalama ua ta’ua o le ‘Nobesity’, lea e galulue ma a’oga i le aoaoina o fanau e uiga i le taumafa maloloina ma le faamalositino.
Sa auai talu ai nei foi le LDS Charities i Le Sailiga Tupe Faaletausaga mo Auaunaga Alofa a le Fesoasoani Trust ma le Project H.O.P.E. (Helping Offenders Pursue Excellence [Fesoasoani i Tagata Solitulafono e Tulitulimatagauina Mea Silisili]). O se tasi o galuega faatino o loo auai ai le H.O.P.E. o le fausiaina lea o polokalama mo le totoina o meaai, faaleleia o le siosiomaga ma le fatuina o se alalafaga sili ona maloloina. O le LDS Charities, e ala i le Galuega Taimua a le Benson Food, ua saunia meafaigaluega, fatu laau, faamiliga, aoaoga, ma aoaoga faamasani mo tagata auai i lenei galuega faatino. I le taimi o se polokalama, sa faaali ai e le faifaatoaga a le H.O.P.E. a latou fua o faaeleeleaga o fualaau faisua matagofie, ma le maloloina.
Talu ai nei, sa foai atu ai e le Ekalesia tane vai e 21 i le ekalesia Kindomized ma tagatanuu i Vailuutai. Sa tuuina atu e le Peresitene o le Siteki o Farani A. Loto ia tane vai i le Faafeagaiga ia Fale Leilua o le na faailoa mai lona agaga faafetai i le LDS Charities mo le latou foai agalelei.
E luasefulu tane vai 2000-lita sa foai atu ma faapipiiina mo aiga e 20 ae maua e le ekalesia se tane vai e 10,000-lita aua o le a tausia ai foi lo latou faalapotopotoga.
Faatasi ai ma faatinoga uma o auaunaga, telē pe itiiti, o le ‘Galuega a Keriso’ e faaauau pea ona agai i luma i tagata o Samoa. I le faia o la tatou vaega i a tatou lava ala tulaga ese, e faaaoga ai a tatou lava meaalofa ma taleni tulaga ese, o le a faaauau pea ona tupu ma o le a salalau atu le afioga a le Atua i atumotu uma o Samoa.