Itulau o le lotoifale
“O A’u, O Se Tagata o le Ekalesia”
O se tala e uiga i le liua moni.
Sa oo i le faaiuga o le lesona ae ou te lei iloaina e logonoa o ia. Sa avea a’u ma se faifeautalai talavou ma sa faatoa tasi le masina talu ona ou i ai i le uarota. Ina ua ma vaai atu ma la’u soa ia Tuagane Yao o loo saofai na o ia iina, sa ma manatu e matamuli o ia. Ina ua ma fesili atu ia te ia i lona igoa, sa i’u ina faapea mai le faiaoga o mataupu faavae o le talalelei, “Sisters, e logonoa o ia!”
O le vasega na sosoo ai o se lesona tuufaatasi a le au perisitua ma le Aualofa e uiga i talafaasolopito o aiga. Sa ou vaai ia tuagane Yao o matamata atu i isi tagata o le ekalesia a o latou talanoa o le tasi ma le isi. Sa ou vaai i ona fofoga lona fia manao ina ia avea ma se vaega [o le talanoaga], ae sa le mafai ona ia lagona se mea pe tautala, sa na o le saofai lava na o ia i le tulimanu.
Sa ou saofai i talaane o ia ma tusi i luga o se fasi pepa, “Tuagane o ok oe?”
Sa ia fai mai ioe. Sa mafai ona ou iloa sa matamuli tele o ia e fesili mai mo se fesoasoani, o lea sa ou faaauau ai ona tusi atu ia te ia.
“O loo latou talanoa e uiga i talafaasolopito o aiga.” Sa ou tusia.
Sa ia tuu mai se faailoga mo le faafetai.
Sa ou faaauau pea ona tusi atu ia te ia i le lesona atoa ina ia mafai ona ia malamalama i le mea sa talanoaina. A o ou faia, sa ou vaaia le liliu o lona faa’ū’ū matamuli i se ataata. Sa ou mafaufau pe faapefea ona ia malamalama i mea sa aoaoina pe ana ou le i ai iina e tusi mea uma mo ia.
“Tuagane, e te malamalama i mea o fai mai ai tagata pe a latou aoao mai?” sa ou tusia a o faaiuina le lesona.
Sa lulu lona ao.
“Ae e te sau lava?” sa ou fesili atu ai.
Sa ia ave le peni ma tusi, “O a’u o se tagata o le ekalesia,” ona tusi lea o lona lima ia te ia lava.
O na upu e lua na matua ootia ai a’u. O lenei alii matua e 58-tausaga, sa leai se uo i le lotu aua sa faigata tele le fesootaiga. Sa le mafai ona ia auai i soo se talanoaga o le vasega pe usu ia viiga po o soo se tasi o na mea sa ou fiafia ai pea i le lotu. Sa leai sona aiga na totoe aua ua maliliu ona matua ma o ona uso sa masii atu i Ausetalia ma tuua ai o ia ma sa faigata le mauaina o se galuega mo se tagata logonoa, a o ia galue malosi i galuega sa ia maua, o ia moni o se tagata e leai se aiga. Ae o loo i ai o ia iinei. Sa auai o ia i le lotu i soo se taimi e mafai ona ia totogi ai le pasi. Sa ia auai i vasega ma pikiina soo se mea sa ia maua aua, “O a’u o se tagata o le ekalesia.”
Sa ou fesiligia lou lava liua. Pe o le a ou sau pea pe afai e le mafai ona ou lagona pe talanoa atu i tagata? Pe o le a ou sau pea pe afai o le faia o ni uo e faigata? Pe o le a ou sau pea pe afai o na mea uma tatou te manatu faatauvaa i ai e le o i ai iina?
Ina ua maea le lotu, na tonu i nisi o i matou o faifeautalai e aoao le tele o le gagana fai faailoga na matou mafaia a o lei oo i le isi a matou taimi faatulagaina. Na mafai ona matou aoaoina le alafapeta ma isi upu e tele i le na o le afa itula. Ina ua matou vaai ia te ia mulimuli ane i lena aso, sa mafai moni ona matou maua se talanoaga lelei ma ia e faaaoga ai le gagana fai faailoga sa matou aoaoina. Sa fiafia lava o ia. Sa i ai se malamalama e uiga ia te ia a o i’u ina mafai ona ia lagona ma malamalama.
O Tuagane Yao o se faataitaiga sili ia te a’u o le uiga o le liua moni. Ou te fia manao ia pei o ia. Ou te fia iloa e tusa lava po o le a le suiga o mea po o le faigata o le ola ai i le talalelei, o le avea o a’u ma se tagata o le ekalesia o le a sili ona taua ia te au e pei ona sili ona taua ia te ia ma o le a ou faamaoni i ai e pei ona ia faamaoni i ai.