Itulau o le lotoifale
O Se Laa o le Faatuatua, i le Atua ma ia i Tatou Lava
Na mafai ona ou lagonaina le totoina o fatu o suiga i totonu o o ma loto. Sa le fiafia lo’u toalua i lana galuega. Sa ia lagona o le auala na manaomia ai e lona tulaga faalepulega o ia e taulimaina tagata sa le ogatusa ma ona tulaga faatauaina. Na faato’a ou amata i le kosi ‘Amataina ma le Faaolaina o La’u Pisinisi’ e ala i Le Ekalesia a Iesu Keriso o le Au Paia o Aso e Gata Ai. Sa ou matuai fiafia e uiga i lenei avanoa ma sa faia i lena taimi ia kata pisinisi mo le lu’i e ‘amata ai’.
I le lē mautonu ma saunia mo le suiga, sa mafaufau lo’u toalua e faatau le pemita faalemalo o tautua faitogalaau [mo kamupani tetele]. Na faigofie ona oo mai le faitogalaau ia i maua uma. Faatasi ai ma le 28 tausaga o le potomasani a o ola a’e i Samoa, sa ma manatu o le ma avanoa lenei e amata ai i se ala fou ae, o le tau o le faatauina o le pemita [faakamupani] sa taugata tele. O le tau amata, o tupe e totogi faalemasina faifai pea, o tau o fesiitaiga taitasi ma le taugata tele o mea e manaomia mo aoaoga faamasani sa matua faigata ona mafaufau i ai. Sa sauni lo’u toalua e faatau lana pepa malaga i Melepone e amata lana aoaoga faamasani ae ma filifili loa e taofi ma tatalo e uiga i ai. Pe o le ala sa’o ea lenei mo i maua? Sa ou maua ni talosaga se fitu mai i a’u tagata faatau e fai ni togalaau mo i latou. Pe sa i ai se auala sili atu e maua ai le ola-tutoatasi nai lo le pemita taugata? Sa ma iloa afai ma te tuu atu lo ma faatuatuaga i le Alii, e le mafai lava ona ma sese o lea sa ma tatalo ai ma le faamaoni i lena afiafi mo le taitaiga. O le taeao na sosoo ai sa ma feala ai i luga, tilotilo le tasi i le isi ma fai atu, “Leai se pemita!”
Nai lo lena, sa uunaia i maua e amata la maua lava pisinisi faitogalaau fai faatasi. O vavega ma faamanuiaga sa tele naua. I le na o le ono vaiaso sa ma totogia uma ai tau na amata ai. O lea mea sa aumaia ai ia i maua se filemu o le mafaufau e le mafai e tupe e totogi faalemasina o le pemita ona tuuina mai.
Sa ou faaauau pea le kosi pisinisi e faaaoga ai tomai ma le malamalama na ou mauaina e fesoasoani ai i lo’u toalua e faia ia manuia le ma pisinisi.
O le avea ma tagata lelei o le Ekalesia na aumaia ai le manuia o galuega faalematata ia i maua. Ona sa ma talitonu i le faamaoni ma le paleni ma le amio sa’o, ua matou olioli i le tele o pisinisi faifai pea ma le mauaina o tagata lea semanu e faaopoopo se tau mo i maua pe ana ma faatauina le pemita.
A o ma vaaia le aao o le Alii i le ma tulaga manuia, sa ma maua le manao e toefaafoi atu. Ua ma fuafua e amata ona tuuina atu e le aunoa auaunaga fai fua mo i latou o e le tagolima i le iloaina ona ua ma maua le tele o mea e tatau foi ona ma toe foai atu. O le ala a le Alii e atoatoa. Ua Ia tuuina mai ia i tatou poloaiga, e pei o le mauaina o le amio sa’o, lea e faia i tatou ia manuia ina ia mafai ona tatou auauna atu i isi tagata.
Ou te uunaia tagata uma o le ekalesia ina ia faaaoga kosi o le ola-tutoatasi ua ofo mai e le ekalesia. O le a latou fesoasoani ia te oe e vaai i mea e te gafatiaina ma faaali atu ia te oe le ala e ausia ai na mea. Ua manino ia te au o loo naunau le Tama Faalelagi e tuu mai ia i tatou mea uma tatou te manaomia pe afai e lava lo tatou faatuatua e mulimuli ai i Ana musumusuga. Ua ou vaai i vavega mai le faaaogaina o mea sa ou aoaoina i lenei kosi. E faigata le galuega mo a’u ma lo’u toalua, ae ua ma fiafia i le iloaina o loo ma i ai tonu i le mea e finagalo le Alii ia ma i ai.