ការស្វែងរកភាពសុខសាន្ត សម្រាប់ខ្លួនឯង និងមនុស្សដទៃនៅក្នុងគ្រាលំបាក

ដោយ អាឡិច ហូហ្គី និង អាស្ពែន ស្ទែនឌើរ

ទស្សនាវដ្តីសាសនាចក្រ

នេះគឺជារបៀបប្រាំបីយ៉ាងដើម្បីជួយអ្នក និងមនុស្សដទៃឲ្យទទួលអារម្មណ៍សុខសាន្ត ពេលជីវិតជួបការលំបាក ។

ជួនកាលជីវិតមានភាពវឹកវរ និងភាន់ច្រឡំ ។ អ្នកអាចបារម្ភអំពីបញ្ហាគ្រួសារ បញ្ហាសុខភាព បញ្ហានៅសាលារៀន ឬព្រឹត្តិការណ៍ច្របូកច្របល់រាប់មិនអស់នៅក្នុងពិភពលោកសព្វថ្ងៃនេះ ។ តើយើងអាចស្វែងរកភាពសុខសាន្តផ្ទាល់ខ្លួនក្នុងពិភពលោកដ៏ច្របូកច្របល់ដោយរបៀបណា ? ទោះបីការខ្វះភាពសុខសាន្តរបស់អ្នកកើតមកពីព្រឹត្តិការណ៍នានាហួសពីសមត្ថភាពដែលអ្នកអាចគ្រប់គ្រងបាន ឬកើតចេញពីអ្វីៗដែលអ្នកអាចជះឥទ្ធិពល និងផ្លាស់ប្តូរបានក្តី នេះគឺជាយោបល់មួយចំនួនដើម្បីជួយអ្នកឲ្យស្វែងរកភាពសុខសាន្តក្នុងចិត្តតាមរយៈព្រះយេស៊ូវគ្រីស្ទ ។

របៀប ៤ យ៉ាងដើម្បីស្វែងរកភាពសុខសាន្តសម្រាប់ខ្លួនឯង

ផ្ដោតទៅលើភាពអស់កល្បជានិច្ច

វាពិបាកដើម្បីទទួលអារម្មណ៍នៃភាពសុខសាន្តពេលអ្នកផ្តោតទៅលើក្តីបារម្ភរយៈពេលខ្លី ។ ប៉ុន្តែប្រសិនបើអ្នកផ្តោតទៅលើទស្សនដ៏ធំទូលាយគឺផែនការនៃសុភមង្គលរបស់ព្រះ នោះអ្នកអាចរកឃើញភាពសុខសាន្តនៅក្នុងការដឹងថា អ្វីដែលឈឺចាប់ក្នុងពេលនេះ វាមិននៅយូរអង្វែងឡើយ ។ ឧទាហរណ៍ ព្រះវិហារបរិសុទ្ធជួយយើងឲ្យផ្តោតទៅលើភាពអស់កល្បជានិច្ច ។ ប្រធាន ហ្គរដុន ប៊ី. ហ៊ិងគ្លី ( ១៩១០–២០០៨ ) បានមានប្រសាសន៍ថា នៅក្នុងព្រះវិហារបរិសុទ្ធ « អ្នកនឹងស្គាល់ភាពសុខសាន្តដែលអ្នកនឹងមិនអាចរកឃើញនៅកន្លែងណាទៀតឡើយ » ។^១
ចូរកុំបារម្ភនូវអ្វីដែលអ្នកពុំអាចគ្រប់គ្រងបាន

ពេលមានអ្វីមួយដែលអ្នកពុំអាចគ្រប់គ្រងបាន ដែលដកយកភាពសុខសាន្តរបស់យើង វាល្បួងយើងឲ្យមានអារម្មណ៍អស់សង្ឃឹម ឬខឹងសម្បារ ។ ប៉ុន្តែវាពុំជួយឡើយ ដែលយើងផ្តោតលើរឿងដែលយើងពុំអាចផ្លាស់ប្តូរបាននោះ ។ ផ្ទុយទៅវិញ សូមខិតជិតព្រះអង្គសង្គ្រោះ ដើម្បីស្វែងរកភាពសុខសាន្តក្នុងចិត្ត ទោះបីអ្នកមានអារម្មណ៍ថា ជីវិតនេះហាក់ដូចជាអយុត្តិធម៌ក្ដី ។ ទ្រង់បានសន្យាបញ្ជូនអង្គជាជំនួយមកគឺព្រះវិញ្ញាណបរិសុទ្ធ ( សូមមើល យ៉ូហាន ១៤:២៦–២៧ ) ។
អភ័យទោសអ្នកដទៃ

ជារឿយៗ រឿងលំបាកបំផុតដើម្បីឈប់បារម្ភនោះគឺ ភាពអវិជ្ជមានដែលអ្នកទទួលពេលនរណាម្នាក់ធ្វើខុសនឹងអ្នក ។ ប៉ុន្តែ អែលឌើរ ឌៀថើរ អេហ្វ អុជដូហ្វ ក្នុងកូរ៉ុមនៃពួកសាវកដប់ពីរនាក់បានបង្រៀនថា ៖ « យើងនឹងទទួលអំណរនៃការអភ័យទោសនៅក្នុងជីវិតយើងផ្ទាល់ នៅពេលយើងកំពុងបង្ហាញនូវអំណរនោះដោយសេរីដល់អ្នកដទៃ ។… ជាលទ្ធផល ព្រះវិញ្ញាណនៃព្រះអម្ចាស់នឹងបំពេញព្រលឹងរបស់យើងដោយអំណរ ជាមួយនឹងភាពសុខសាន្តនៃសតិសម្បជញ្ញៈមកពីព្រះ ( សូមមើល ម៉ូសាយ ៤:២–៣ ) » ។^២ ការងាកបែរទៅរកព្រះអង្គសង្គ្រោះអាចជួយអ្នកមានអារម្មណ៍រួចពីបន្ទុកផ្លូវចិត្ត ហើយពោរពេញដោយភាពសុខសាន្ត ។
ប្រែចិត្ត ហើយពឹងផ្អែកលើព្រះគ្រីស្ទ

មិនថាមានអ្វីផ្សេងទៀតដំណើរការល្អនៅក្នុងជីវិតរបស់អ្នកទេ ការរែកបន្ទុកនៃអំពើបាបនឹងប្លន់ភាពសុខសាន្តពីអ្នកជានិច្ច ។ ជួនកាលយើងត្រូវការប៊ីស្សពរបស់យើងជួយយើងឲ្យប្រែចិត្តពេញលេញទាំងស្រុង ។ ប៉ុន្តែយើងទាំងអស់គ្នាត្រូវប្រែចិត្តជាទៀងទាត់ តាមរយៈដង្វាយធួនរបស់ព្រះយេស៊ូវគ្រីស្ទ ហើយប្រែជាស្អាតស្អំនូវរឿងគ្រប់យ៉ាងដែលរារាំងយើងពីការប្រែកាន់តែដូចទ្រង់ ។

របៀប ៤ យ៉ាងដើម្បីជួយមនុស្សដទៃស្វែងរកភាពសុខសាន្ត

ចែកចាយដំណឹងល្អរបស់ព្រះយេស៊ូវគ្រីស្ទ

ដូចជាយើងអាចស្វែងរកភាពសុខសាន្តសម្រាប់ខ្លួនឯង ដោយផ្តោតលើព្រះអង្គសង្គ្រោះ នោះយើងអាចចង្អុលបង្ហាញមនុស្សដទៃឲ្យទៅកាន់ទ្រង់ ថាទ្រង់ជា « ម្ចាស់នៃសេចក្ដីសុខសាន្ត » ( ម៉ូសាយ ១៥:១៨ ) ។ ឧទាហរណ៍ សូមព្យាយាមចែកចាយបទគម្ពីរ ឬពាក្យដកស្រង់មួយមកពីសន្និសីទទូទៅ ដែលជួយអ្នករៀនបន្ថែមទៀតអំពីព្រះយេស៊ូវគ្រីស្ទ ។
ចូរធ្វើជាអ្នកផ្សះផ្សាគេ

សូមជួយមិត្តភក្តិ ឬបងប្អូនបង្កើតរបស់អ្នកដោះស្រាយជម្លោះ ។ ដូចជាពួកសាសន៍ អាន់តៃ នីហ្វៃ លីហៃ ក្នុងគម្ពីរអាលម៉ា នោះយើងអាចកប់អាវុធពិជ័យសង្គ្រាមរបស់យើង—អាវុធនានាដូចជា ការនិយាយដើមគេ, ការស្វែងរកការសងសឹក ឬភាពអាត្មានិយម—ហើយដូរវាយកឧបករណ៍នានានៃភាពសុខសាន្ត ៖ គឺការនិយាយដោយក្តីសប្បុរស ការគោរពបទបញ្ញត្តិព្រះ និងការអត់ទោសឲ្យមនុស្សដទៃ ( សូមមើល អាលម៉ា ២៤:១៩ ) ។
ចូរធ្វើជាអ្នកស្តាប់ល្អម្នាក់

ជួនកាលមនុស្សដែលកំពុងជួបការលំបាកត្រូវតែនិយាយបើកចំហរអំពីគំនិត និងអារម្មណ៍របស់ពួកគេ ជំនួសឲ្យទុកវានៅក្នុងចិត្ត ។ យើងពុំមែនដោះស្រាយបញ្ហាឲ្យពួកគេទេ ប៉ុន្តែយើងអាចស្តាប់យ៉ាងសាមញ្ញនូវកង្វល់របស់ពួកគេ ហើយផ្តល់ការគាំទ្រ បង្ហាញសេចក្តីស្រឡាញ់ និងការយល់ចិត្តដូចជាព្រះយេស៊ូវគ្រីស្ទ ។
ផ្តល់ការងារបម្រើដល់អស់អ្នកដែលនៅក្នុងវួដ និងសហគមន៍របស់អ្នក

អ្នកអាចស្ម័គ្រចិត្តធ្វើការនៅការិយាល័យអ្នកគ្មានផ្ទះសម្បែង ធ្វើជាមិត្តអប់រំមិត្ត ឬយកនំទៅឲ្យគ្រួសារថ្មីមួយនៅជិតខាងអ្នក ។ ជួយមនុស្សឲ្យរកឃើញភាពសុខសាន្តនៅក្នុងកិច្ចការតូចតាច ។ ការមានកន្លែងមួយជាប់លាប់ដើម្បីបរិភោគ និងស្នាក់នៅ ធ្វើជាអ្នកផ្តល់ប្រឹក្សាដែលអាចទុកចិត្តបាន ឬការបញ្ជាក់តូចមួយដែលថា ការយកចិត្តទុកដាក់របស់បុគ្គលម្នាក់អាចជះឥទ្ធិពលដ៏ខ្លាំង ។

ព្រះយេស៊ូវបានមានបន្ទូលនូវពាក្យលួងលោមទាំងនេះដល់អស់អ្នកដែលពុះពារស្វែងរកភាពសុខសាន្តថា ៖ « ខ្ញុំទុកសេចក្តីសុខនៅនឹងអ្នករាល់គ្នា គឺខ្ញុំឲ្យសេចក្តីសុខសាន្តរបស់ខ្ញុំដល់អ្នករាល់គ្នា ហើយដែលខ្ញុំឲ្យ នោះមិនមែនដូចជាលោកីយ៍ឲ្យទេ ។ កុំឲ្យចិត្តអ្នករាល់គ្នាថប់បារម្ភ ឬភ័យឡើយ » ( យ៉ូហាន ១៤:២៧ ) ។ ប្រសិនបើយើងនាំខ្លួនយើង និងមនុស្សដទៃខិតកាន់តែជិតព្រះយេស៊ូវគ្រីស្ទ នោះយើងអាចរកឃើញភាពសុខសាន្ត ទោះបីពេលជីវិតជួបការលំបាកក្តី ។