Jerbal In Mijenede: Kwaļo̧k Ta eo Kwoj Lukkuun Tōmak im En̄jake
Jekdo̧o̧n ia eo kwoj pād ie ioon laļ in, ekanooj lōn̄ iien ko rem̧m̧an n̄an kwaļo̧k naan eo em̧m̧an an gospel eo an Jisōs Kraist.
Allōn̄ eo ļo̧k Jon̄oulruo eo kar kajjitōk ippāer jān rikanaan eo ad ejitō nbōro, Būreejtōn Russell M. Nelson, n̄an ilo̧k ippānļo̧k n̄an aje eo an Rome Italy Tampeļ. Ke iaar ilo̧k, iaar ļōmņak kōn Rijilōk Paul im iaļ ko an. Ilo tōre eo an, n̄an etal jān Jerusalem n̄an Rome, emaron̄ in kar bōk 40 raan ko. Rainin, ilo juon iaan baļuun ko rem̧m̧an tata ippa, ebōk edikļo̧k jān 3 awa ko.
Ro retijem̧ļo̧k ilo Baibōļ rej tōmak bwe Paul eaar pād ilo Rome ke eaar jet iaan leta ko an, ko raar kanooj aorōk ilo kōkajoorļo̧k membōr ao Kabun̄ in ilo tōre ko barāinwōt ilo tōre in.
Paul im membōr ro jet an Kabun̄ eo etto, Armej ro Rekwojarjar ilo Raan ko m̧okta, raar lukkuun jeļā kōn kaarmejete. Elōn̄ raar lukkuun kaen̄taan er, em̧ool n̄an mej.
Ilo iiō ko 200 remootļo̧k, membōr ro an Kabun̄ eo an Jisōs Kraist kar kōjepļaaktok, Armej ro Rekwojajar ilo Raan-ko Āliktata, raar barāinwōt ioon kaen̄taanan ilo elōn̄ jekjek ko. Bōtaab jekdo̧o̧n kaen̄taanan eo (im jet iien kōnke jān e), Kabun̄ eo an Jisōs Kraist im Armej ro Rekwojarjar ilo Raan-ko Āliktata eaar wōnm̧aanļo̧k wōt in eddōk im kiiō loe ilo aolepān laļ in.
Ekanooj in Ļap Ijo n̄an Kōm̧m̧ane
Ijowōt ke, m̧okta jen ad kōm̧m̧an m̧akūtkūt ko n̄an keemem, im kōjeraam̧m̧an kōj make kōn tōprak in ekabwilōn̄lōn̄, jej aikuj meļeļe kōn eddōkļo̧k eo an Kabun̄ in im aorōk eo an.
Ewōr enan̄in jon̄an in jiljilimjuon im jimettan pilien armej ro ilo laļ in, keidi n̄an 16 jim̧a milien ro uwaan Kabun̄ eo an Jisōs Kraist im Armej ro Rekwojarjar ilo Raan-ko Āliktata—ilo m̧ool juon kumi ekanooj in dik.1
Ilo tōre in, oran ro rej tōmak ilo Kraist ilo jet mōttan ko ilo laļ in rej dikļo̧k.2
Jekdo̧o̧n ilo Kabun̄ eo kōjepļaaktok an Irooj—mekarta aolepān uwaan kabun̄ eo ej wōnm̧aanļo̧k wōt in eddōkļo̧k—ekanooj lōn̄ ro me rejjab bōk kōjeraam̧m̧an ko an bōk kuņaan in Kabun̄ eo raan otemjej.
Ilo bar juon wāween ba, jekdo̧o̧n ia eo kwoj pād ie ioon laļ in, ekanooj lōn̄ iien ko rem̧m̧an n̄an kwaļo̧k naan eo em̧m̧an an gospel eo3 kōn gospel eo an Jisōs Kraist ippān armej ro kwoj ioon er, ekkatak kōn, im mour kake ak jerbal im iaio ippāer.
Ilo iiō eo ej jem̧ļo̧kļo̧k, eaar wōr juon aō iien em̧m̧an ekaitoktok limo n̄an kanooj bōk kuņaō ippān m̧akūtkūt ko an mijenede ro aolepān laļ in an Kabun̄ in. Ekar emakijkij aō kejekļo̧kjeņ im jar kōn kajjitōk eo eļap an Rilo̧mo̧o̧r eo n̄an ro Rikaļoraan—kōj, ajri ro Nejin—n̄an “kom̧win ilo̧k, im kōm̧m̧an ri aelōn̄ ko otemjej bwe ren ri kaļora, im peptaij er ilo etan Jema im Nejin im Jetōb Kwojarjar.”4
Iaar kakkōt n̄an uwaake kajjitōk eo “Ekōjkan ad, āinwōt membōr ro im rikaļoor ro an Kraist, kakūrm̧ool eddo in ad eļap ilo mour ko ad raan otemjeļo̧k?”
Rainin ij kajjitōk ippam̧ n̄an kejekļo̧kjeņ kōn ejja kajjitōk eo wōt ilo būruwōm̧ im am̧ ļōmņak.5
Juon Tōļan n̄an kōm̧m̧ane Jerbal in Mijenede
Em̧ōj kar an ritōl ro an Kabun̄ in kar kalikkar kūr eo “Aolep membōr ej juon mijenede!” ium̧win n̄oul iiō ko.6
Membōr ro an Kabun̄ eo an Jisōs Kraist—jim̧or ilo tōre ko etto barāinwōt ilo tōre in ad—kar lo̧udin̄din̄ im m̧ōņōņō in kar kwaļo̧k gospel eo ippān ro jeraer im m̧ōttaer. Būruwier rej lo̧udin̄din̄ kōn naan in kam̧ool eo kōn Jisōs Kraist, im rej kōņaan ilo m̧ool bwe ro jet ren en̄jake ejja lan̄lōn̄ eo wōt em̧ōj aer loe ilo gospel eo an Rilo̧mo̧o̧r eo.
Jet membōr in Kabun̄ in rej āinwōt ewōr ippāer juon tōļan n̄an kōm̧m̧ane menin. Rej iakwe āinwōt ro rej jutak kōn gospel eo. Kōn lōke im lem̧ōņōņō rej jerbal im tōl jerbal eo āinwōt membōr mijenede ro.
Ijowōt ke, ro jet iaad eļapļo̧k aer aepedped. N̄e jerbal in mijenede ej ekōnono kake ilo kweilo̧k ko an Kabun̄ in, bar ko rej jidik wōt aer walaļļo̧k m̧ae rej penjak ilo jea eo kadu in wōt juon ajri, mejeer rej kalimjōk jeje ko rekwojarjar ak kilōk ilo kejekļo̧kjeņ n̄an jab lale mejān membōr ro jet.
Etke jej wōjake wāween in? Bōlen kōnke jej en̄jake ad bōd kōn jab kōm̧m̧ane eļapļo̧k n̄an kwaļo̧k gospel eo. Bōlen jej en̄jake jab jeļā kōn ekōjkan kōm̧m̧ane. Ak jemaron̄ en̄jake mijak ilo ad kōm̧m̧ane juon men enaaj kōm̧m̧ane menin an jab em̧m̧an ad mour.
Ij meļeļe menin.
Bōtaab keememej, Irooj ejjan̄in kar aikuji kijejeto ko an mijenede retijem̧ļo̧k, weppāān. Ijello̧kin, “Irooj ej eaikuj bōro eo im ļōmņak eo em̧ōņōņō.”7
Eļan̄n̄e em̧ōj am̧ kadede m̧ōņōņō in kōm̧m̧ane jerbal in mijenede, jouj im etal wōt, im jutak āinwōt juon waanjon̄ak n̄an ro jet. Irooj enaaj kōjeraam̧m̧an kom̧.
Eļan̄n̄e, mekarta, kwoj en̄jake bwe kwaar aepedped n̄e ej itok n̄an kwaļo̧k ennaan eo an gospel eo, imaron̄ ke kwaļo̧k ļalem men ko renaaj kōm̧m̧an bwe kwon jab en̄jake bōd eo me aolep remaron̄ kōm̧m̧an n̄an bōk kuņaan ilo kūr eo eļap an Rilo̧mo̧o̧r eo n̄an jipan̄ aiintok Israel?
Ļalem Ļōmņak ko Reļem Waan
Juon, kepaakļo̧k Anij. Kien eo eļap tata m̧oktata ej n̄an iakwe Anij.8 Ej un eo eļap tata etke jej pād ioon laļ in. Kajjitikin eok make, “Ij ke lukkuun in tōmak ilo Jemedwōj Ilan̄?”
“Ij ke iakwe im lōke E?”
Am̧ epaakeļo̧k Jemedwōj Ilan̄, meram eo An ej ļapļo̧k im lan̄lōn̄ eo enaaj romaakļo̧k jān itulowaam̧. Ro jet renaaj kile bwe ewōr juon men āinjuon im ejeno̧lok kōn kwe. Im renaaj kajjitōk ippam̧ kake.
Ruo, kobrak būruwōm̧ kōn iakwe n̄an ro jet. En̄in ej kein eo eļap kein karuo.9 Kajjieon̄ m̧ool in ļōmņak kōn aolep ro ipeļaakūm̧ āinwōt juon nejin Anij. Jerbal in karejar n̄an er—jekdo̧o̧n ta eļan̄n̄e etaer rejjab waļo̧k ilo laajrak in m̧aan im kōrā jeid im jatid ilo jerbal in karejar eo.
Ettōn̄ ippāer. Lem̧ōņōņō ippāer. Jan̄ ippāer. Kautiej er. Kōmour, ļōn̄aj, im kōkajoorļo̧k er.
Kajjion̄ anōk iakwe eo an Kraist im wōr meanwōd n̄an ro jet—jekdo̧o̧n n̄an ro me rejjab jouj n̄an eok, ro rej kajirere kōn eok im kōņaan kakkure eok. Iakwe er im kōm̧m̧an em̧m̧an n̄an er āinwōt ajri ro m̧ōttam̧ nejin Jemedwōj Ilan̄.
Jilu, kajjieon̄ etetal ilo iaļ in rikaļoor. Ilo an iakwe eo am̧ n̄an Anij im ajri ro nejin m̧wilaļļo̧k, ebaarāinwōt am̧ kallim̧ur n̄an ļoor Jisōs Kraist.
Kwoj katak kōn iaļ eo An jān kwojkwoj ioon naan eo An im ron̄jake im kōjerbal katak ko an rikanaan im rijilōk ro raan kein. Kwoj eddōkļo̧k ilo lōke im ketak n̄an ļoor iaļ eo An ilo ad ekōnono ippān Jemedwōj Ilan̄ kōn juon bōro epidodo katakin, ettā.
Etetal ilo iaļ eo an rikaļoor ebōk kaminene—kajjojo raan, jidik kōn jidik, “jouj kōn jouj,”10 “lain im bar lain.”11 Jet iien jej kōm̧m̧an wōnm̧aanļo̧k ak wōnm̧aanļo̧k ekanooj pen im raļo̧k.
Men eo eaorōk ej bwe kwojjab ebbweer; jej kajjeion̄ wōt n̄an kōm̧m̧an bwe en jetjet. Ilo jem̧ļo̧kin kwonaaj erom em̧m̧anļo̧k, m̧ōņōņōļo̧k, im ļapļo̧k am̧ kōjparok kien ko. Ekōnono ippān ro jet kōn tōmak eo am̧ enaaj erom ekkā im make waļo̧k. Ilo m̧ool, gospel eo enaaj erom juon m̧ōttan emenin aikuj, aorōk in mour ko ami jon̄an jamin en̄jake jab bwilōn̄ n̄an kōnono kake ippān ro jet. Emaron̄ jab waļo̧k ilo iien eo em̧ōkaj tata—ej juon kijejeto ilo aolepān mour. Bōtaab enaaj waļo̧k.
Emān, kwaļo̧k ta eo kwoj tōmak im en̄jake. Ijjab kajjitōk bwe kwon jutak ilo juon kona in iaļ kōn juon kein kōnnaan im lam̧ōj kōn juon eoon in Bok in Mormon. Ta eo ij ba ej bwe kwon aolep iien kappukōt iien ko rem̧m̧an n̄an kwaļo̧k kabun̄ eo am̧ ilo wāween ko rej make waļo̧k im ekkā ippān armej ro—jim̧or ilo nememein armej barāinwōt ilo online. Ij kajjitōk bwe kwon “jutak āinwōt rikam̧ool ro”12 an kajoor eo an gospel eo ilo iien otemjej—im n̄e emenin aikuj, kōjerbal naan ko.13
Kōnke “gospel eo an Kraist … ej kajoor an Anij n̄an lo̧mo̧o̧r,” komaron̄ in lōke, peran, im ettā ilo ad kwaļo̧ke.14 Lōke, peran, im ettān remaron̄ āinwōt kwalo̧k m̧wil ko me rejjab waļo̧k ilo juon armej ilo iien eo wōt, bōtab rejjab. Rej kwaļo̧k kajjitōk eo an Rilo̧mo̧o̧r eo n̄an jab ņooj aorōk ko im pedped in katak ko an gospel eo ium̧win juon jepe ak n̄an kōromaakļo̧k meram eo am̧, bwe jerbal ko am̧ rem̧m̧an ren maron̄ kaiboojo Jemam̧ ilo Lan̄.15
Ekanooj lōn̄ wāween ko rekkā im make waļo̧k n̄an kōm̧m̧ane menin, jān m̧akūtkūt ko raan otemjej an jouj n̄an naan in kam̧ool ko an juon make ilo YouTube, Facebook, Instagram, ak Twitter n̄an bwebwenato ko reļem waan ippān armej ro kwoj ioon er. Iiō in jej ekkatak jān Kallim̧ur Ekāāl ilo m̧ōko im̧ōd im ilo Jabōt Jikuuļ. Juon iien em̧m̧an ekabwilōn̄lōn̄ n̄an kajjitōk ippān ro m̧ōttam̧ im ro rūturiūm̧ n̄an itok n̄an jar im n̄an im̧ōko im̧ōmi n̄an ekkatak kōn Rilo̧mo̧o̧r eo ippam̧. Kwaļo̧k ippāer Gospel Library app eo, ijo remaron̄ lo Itok, Ļoor Eō. Eļan̄n̄e kwojeļā kajjien jodikdik ro im baam̧le ko aer, leļo̧k n̄an er N̄an Kōkajoorļo̧k Jodikdik ro bok jidikdik eo im kajjitōk ippāer n̄an itok im lale ekōjkan an jodikdik ro ad kajjieon̄ n̄an mour kōn pedped in katak ko.
Eļan̄n̄e jabdewōt ej kajjitōk kōn wiikān eo am̧, jab aepedped n̄an kōnono kake ta eo kwaar en̄jake ilo jar. Jiron̄ er kōn ajri jiddik ro me raar jutak im̧aan in jarlepju eo im al kōn ketak kōn ekōjkan aer kajjieon̄ āinwōt Jisōs. Kōnono kōn kumi in jodikdik eo me eaar joļo̧k iien jipan̄ rūtto ro ilo im̧ōn rūtto ro n̄an kōm̧m̧ane bwebwento ko aer make. Kōnono kōn oktak eo ejkab kōm̧m̧an ilo jikejuuļ in kweilo̧k in Jabōt eo ad im ekōjkan an kōjeraam̧m̧an baam̧le eo am̧. Ak kōmeļeļeik etke jej kōmejajaik bwe en̄in ej Kabun̄ eo an Jisōs Kraist im bwe jej Armej ro Rekwojarjar ilo Raan-ko Āliktata, āinwōt ejja an membōr ro an Kabun̄ eo etto kar barāinwōt ņa etaer Armej ro Rekwojarjar.
Ilo jabdewōt wāween ko me rej make waļo̧k im ekkā n̄an eok, kwaļo̧k ippān armej ro etke Jisōs Kraist im Kabun̄ eo An rej aorōk n̄an kwe. Karuwaineneik er n̄an “kwōn itok im lo e.”16 Innām kōketak er n̄an itok im jipan̄. Ekanooj lōn̄ iien ko rem̧m̧an n̄an armej n̄an jipan̄ ilo Kabun̄ in ad.
Jar ejjab n̄an wōt mijenede ro n̄an pukōt rikāālet ro. Jar raan otemjej kōn aolepān būruwōm̧ bwe kwonaaj lo ro me renaaj itok im loe, itok im jipan̄, im itok im pād wōt. Jab meļo̧kļo̧k in kobaik wōt mijenede ro ilo kijejeto ko am̧. Kom̧ij āinwōt enjeļ ro, pojak n̄an jipan̄!
N̄e kwoj kwaļo̧k naan eo em̧m̧an, gospel eo an Jisōs Kraist, kōm̧m̧an āindein kōn iakwe im kijenmej. Eļan̄n̄e jej kōnono ippān armej ro kōn juon wōt kōtmene bwe ejjab to renaaj kōņak juon nuknuk mouj im kajijtōk kōn naan in kōmeļeļe ko n̄an jikin peptaij eo epaak tata, ebōd ad kōm̧m̧ane.
Jet rej itok im lale naaj, bōlen, jamin kobatok ilo Kabun̄ in; jet naaj ilo juon iien tokālik. Ej aer kāālet. Bōtaab men jab in eban ukōt ad iakwe n̄an er. Im eban ukōt kijejeto ko ad rekalimomo n̄an wōnm̧aanļo̧k wōt in karuwaineneik kajjojo im baam̧le ko n̄an itok im loe, itok im jipan̄, im itok im pād wōt.
Ļalem, lōke Irooj n̄an jerbali kabwilōn̄lōn̄ ko An. Meļeļe bwe ejjab am̧ jerbal n̄an ukōt armej. Ej jerbal eo an Jetōb Kwojarjar. Jerbal eo am̧ ej n̄an kwaļo̧k ta eo kwoj en̄jake im tōmak im mour jokkun wōt juon ippān tōmak ko am̧.
Kōn menin, kwon jab ebbweer eļan̄n̄e juon ejjab bōk ennaan eo an gospel eo ilo iien eo em̧ōkaj tata. Ejjab am̧ likjab.
Ej ikōtaan kajjojo armej im Jemedwō Ilan̄.
Eddo eo am̧ ej n̄an iakwe Anij im iakwe ro rūturūm̧, ajri ro Nejin.
Tōmak, iakwe, kōm̧m̧an.
Ļoor iaļ in, im Anij enaaj jerbali kabwilōn̄lōn̄ ko kōn kwe n̄an kōjeraam̧m̧an ajri ro Nejin raorōk.
Ļōmņak kein ļalem renaaj jipan̄ eok n̄an kōm̧m̧ane ta eo rikaļoor ro an Jisōs Kraist raar kōm̧m̧ane jān tōre ko etto. Gospel eo An im Kabun̄ eo An rej juon m̧ōttan eo aorōk an mour eo am̧ im kōn wōn kwe im ta eo kwoj kōm̧m̧ane. Kōn menin, karuwaineneik ro jet n̄an itok im loe im itok im jipan̄, im Anij enaaj kōm̧m̧ane jerbal in lo̧mo̧o̧ren eo An, im renaaj itok im pād wōt.
Ak Ta eo Eļan̄n̄e Ej Pen?
“Ak,” komaron̄ kajjitōk, “ta eo eļan̄n̄e ij kōm̧m̧ane aolepān menin im armej ejjab em̧m̧an aer uwaak? Ta eo eļan̄n̄e rej ba nana kōn Kabun̄ in? Ta eo eļan̄n̄e ebōjrak aer m̧ōttāik eō?”
Aaet, bōlen enaaj waļo̧k. Jān tōre ko etto, rikaļoor ro an Jisōs Kraist ekar emakijkij aer kaen̄taan er.17 Rijilōk Piter eaar ba, “Lan̄lōn̄ … kōn am̧ bōk m̧ōttan en̄taan ko an Kraist.”18 Armej ro Rekwojarjar ilo tōre ko m̧okta raar lan̄lōn̄ “bwe em̧ōj likūt er im tōllo̧kun kōn aer en̄taan kōn āt eo.”19
Keememej, Irooj ej jerbal ilo wāween ko an rekabwilōn̄lōn̄. Emaron̄ in bwe jān uwaak eo am̧ āinwōt an Kraist n̄an kowaan juon bōro epen emaron̄ in pidodo.
Āinwōt juon Rijilōk an Jisōs Kraist, ij kōjeraam̧m̧an kom̧ kōn lōke n̄an erom juon naan in kam̧ool emour kōn aorōk ko an gospel eo, kōn peran n̄an iien otemjej kile āinwōt juon membōr in Kabun̄ eo an Jisōs Kraist im Armej ro Rekwojarjar ilo Raan-ko Āliktata, kōn ettā n̄an jipan̄ ilo jerbal eo An āinwōt juon kakōļļe in am̧ iakwe n̄an Jemedwōj Ilan̄ im ajri ro Nejin.
Ro m̧ōtta rejitōn bōro, kom̧ naaj lan̄lōn̄ ilo jeļā bwe kwoj juon m̧ōttan eo aorōk ilo koba eo an Israel kar kōnono kake jān etto, kōpooj n̄an itok eo an Kraist ilo “kajoor im wōj eļap; ippān aolep enjeļ ro rekwōjarjar.”20
Jemedwōj Ilan̄ ejeļā kajjiōm̧. Irooj ej iakwe eok. Anij enaaj kōjeraam̧m̧an eok. Jerbal in ej ekkapit jān E. Komaron̄ kōm̧m̧ane menin. Jemaron̄ aolep kōm̧m̧ane menin ippān doon.
Ij lukkuun kam̧ool ilo etan Jisōs Kraist, amen.