Elōn̄ Menin Jeraam̧m̧an ko

Jān Elder Dale G. Renlund

Jān Doulul eo an Jon̄oulruo Rijilōk ro

Enan̄in aolep kōjeraam̧m̧an ko me Anij ekōņaan letoki n̄an kōj ekkar n̄an jerbal eo ad—ad jerbal ej pedped ioon ad tōmak ilo Jisōs Kraist.

Ro jeiū im jatū, Jemedwōj Ilan̄ im Jisōs Kraist rej kōņaan kōjeraam̧m̧an kōj kajjojo.¹ Kajjitōk eo elmen n̄an dipuki im būki kōjeraam̧m̧an kein raar baj menin kōnono wōt jen epepen ko etto.² Jet rej ba kōjeraam̧m̧an ko jej būki; n̄e jej jerbal n̄an bōki. Jet rej iakweleel bwe Anij eaar kālet kadede wōn eo Enaaj kōjeraammane im elmen—im bwe kōļmenļo̧kjeņ in eban oktak. Ļōmņak kein jim̧or rebōd. Kōjeraam̧m̧an ko jān lan̄ rejjab jide im waļo̧k “kōn jerbal ko rem̧m̧an” ak jen am̧ kōttar n̄an lale eļan̄n̄e jej wiini juon kāāmbōļ. Jaab, m̧ool in eļapļo̧k an oktak meļeļein ak men eo eļap an ekkar bwe jem̧doon eo kōtaan Jemedwōj Ilan̄ im rijolet ro An—kōj. M̧ool eo em̧ōj an jepļaaktok ej kwaļo̧k bwe kōjeraam̧m̧an ko reban kajju waļo̧k, ak tōmak kōn jerbal ko reim̧we rej m̧ōttad, jim̧or ilo jinoin im wōnm̧aanļo̧k, raorōk.³

Ilo ad ļōmņake elmen ad bōk kōjeraam̧m̧an ko jān Anij, jen keidi kōjeraam̧m̧an ko an lan̄ n̄an juon eojik in kane. Ļōmņake io̧ļapān juon kijeek, ioon eobrak kōn kane ko rem̧m̧an jon̄an. Aļaļ ko tokālik, innām jidik ra, im āliktata ra killep. Kane in ej kwaļo̧k juon kaan eļap, kwaļo̧k meram im māņāān ium̧win raan. Antoone ļo̧k iturin eojik in kijeek eo kōn juon wōt mājet, juon eo me erabōlbōl bōran.⁴

Bwe en waļo̧k kajoor jen eojik in kijeek eo, ej aikuj in itmājete bwe en urur. Mājet in enaaj m̧ōkaj an kaurur kijeek eo im kōm̧m̧an bwe en urur kane ko. Ilo an kijeek in jino urur, ej urur wōt m̧ae iien aolep kane ko im bwiļ ak kwaļo̧k kijeek ak kijeek eo ej aikuj oxygen.

Itmājete im kaurur kijeek eo rej jerbal dikdik ko me rej kwaļo̧k kajoor eo ad eaorōk āinwōt an aļaļ ko urur.⁵ M̧ae iien itmājet mājet eo, ejjeļo̧k jabdewōt, jekdo̧o̧n ewi jon̄an eojik in kane eo. Eļan̄n̄e ej itmājet mājet eo ak ejjab etal n̄an kijeek eo, jon̄an kijeek im māņāān jen mājet eo make eban jerbal im kajoor in aļaļ eo eban urur. Eļan̄n̄e ejjeļo̧k kūtwōn n̄an jidik, kijeek eo eban urur.

Ilo ejja wāween in wōt, enan̄in aolep kōjeraam̧m̧an ko Anij ekōņaan letoki n̄an kōj ekkar n̄an jerbal eo ad—ad jerbal ej pedped ioon ad tōmak ilo Jisōs Kraist. Tōmak ilo Rilo̧mo̧o̧r ej juon pedped in jerbal im kajoor.⁶ M̧oktata jej jerbal kōn tōmak; innām kajoor ej itok—ekkar n̄an ankilaan im karōk an Anij. Laajrak in eaorōk.⁷ M̧akūtkūt eo emenin aikuj, men̄e, ej aolep iien jidik wōt n̄an keidi n̄an kōjeraam̧m̧an ko jej būki.⁸

Ļōmņake ta eo eaar waļo̧k ke jedpenit kijeek ko rej ekkāke raar itok ilubwiljin RiIsrael ro etto ilo iaļ eo aer ļo̧k n̄an āneen kallim̧ur. An jedpenit eo kijkij enana. Ak jabdewōt eo em̧ōj kiji emaron̄ in mour ilo an reiļo̧k n̄an jādpenet brass eo me Moses ekar kōm̧m̧ane im likūti ilo juon aļaļ.⁹ Ewi jon̄an an bōk iien n̄an kalimjōk jet men? Ro raar reilo̧k kar bōk kajoor ko an lan̄ im raar mour. Ak RiIsrael ro jet kar kiji er raar likjab in reilo̧k n̄an jedpenit eo raar mej. Bōlen raar jab tōmak n̄an reilo̧k.¹⁰ Bōlen raar jab tōmak kain jerbal rot in eļam waan emaron̄ kar kaal kallim̧ur in kōmour eo. Ak bōlen raar lukkuun kapen būruweer im kōjekdo̧o̧n kapilōk ko an rikanaan ro an Anij.¹¹

Pedped in jerbal in kōro̧o̧ltok kōjeraam̧m̧an ko me rej itok jān Anij rej n̄an indeeo. Āinwōt RiIsrael ro etto, jej aikuj bar jerbale ad tōmak ilo Jisōs Kraist bwe jen jeraam̧m̧an. Irooj eaar kwaļo̧k bwe “ewōr juon kien, kar kean̄ kake im ban kajejtokjān ilo lan̄ m̧okta jān foundasōn ko an laļ in, eo me ioon aolep kōjeraam̧m̧an ko rej pedped—im n̄e jej bōk jabdewōt kōjeraam̧m̧an jān Anij, e ej jān pokake kien eo me ioon e ej pedped”¹² Kar ba menin, kwoban bōk juon kōjeraam̧an—menin ejjab m̧ool—ak kwoj aikuj in ekkar kake. Ad lo̧mo̧o̧r ej itok wōt jen im jouj an Jisōs Kraist.¹³ Jon̄an en̄taan in pinmuur eo An meļeļein bwe kane ko ejjeļo̧k jemļo̧kier; jerbal ko ad rem̧ōjņo̧ n̄an keidi jon̄aer. Ak ejjab jejtokjeer, im rejjab jaorōk; ilo m̧arok, juon mājet eo ej urur naaj jān ettoļo̧k. Jerbal ko reddik kōn tōmak rej aorok n̄an kwaļo̧ki kallim̧ur ko an Anij.¹⁴

N̄an bōk juon jeraam̧m̧an jen Anij, jerbal kōn tōmak, kōkāāl kajoor eo an lan̄ ioon jeraam̧m̧an eo an lan̄ ej itok. N̄an waanjon̄ok, juon iaan menin kōnono ko kōn jar ej n̄an lale kōjeraam̧m̧an ko me Anij ej kōņaan litok ak rej pedped wōt ioon ad kajjitōk.¹⁵ Alma eaar kūr kōn tiriam̧o im metak ko an raar jako; eaar jab bar ikimmaļ kōn ememļo̧kjeņ kōn jero̧wiwi ko an. Mōņōņō eo an eaar bōkļo̧k an metak—kōnke eaar kūr kōn tōmak ilo Jisōs Kraist.¹⁶ Kōkāāl kajoor eo jej aikuji n̄an bō eļap tōmak ilo Kraist n̄an lukkun kajjitōk ippān Anij ilo jar im kōm̧man Ankilaan im karōk in uak eo An.

Emakijkij, kōkāāl kajoor aikuji n̄an kōjeram̧m̧an ebōk eļapļo̧k jan baj kappukōt ak kajjitōk; ebōk wōnmanļo̧k wōt im jerbal ko ilo tōmak. Ilo kar likwōļpen kein 19th epepen, Brigham Young eaar tōl juon kūrup in Armej ro Rekwojarjar ilo Raan-ko Āliktata n̄an etal im jokwe ilo Arizona, juon jikin ilo North America. Ālkin tōparļo̧k Arizona, kūrup in eaar ejjeļo̧k nim̧weer dān im kar mijak n̄e renaaj jako. Raar akweļap n̄an Anij kōn jipan̄. Tokālik, wōt im sno raar wōtļo̧k, kōm̧m̧an bwe ren teiin̄ nien dān ko aer kōn dān im kakke n̄an menin mour ko. M̧ōņōņō im wāmourur, raar bar ro̧o̧l n̄an Salt Lake City kōn lan̄lōn̄ kōn em̧m̧an eo an Anij. Ke raar ro̧o̧l, raar kwaļo̧k aolep meļeļe kōn en̄jake eo aer n̄an Brigham Young im ļōmņak eo aer bwe Arizona eaar jikin ejjab em̧m̧an n̄an mour.

Ālkin ron̄jake ennaan eo, Brigham Young ippān juon em̧m̧aan ilo ruum̧ eo ta eo eaar ļōmņake kōn en̄jake im kabwilōn̄lōn̄ in. Em̧m̧aan in, Daniel W. Jones, eaar kajju uwaak, “In kar bar kanne, bar kanne, im bar jar.” Brother Brigham eaar likūt pein ioon Brother Jones im ba, “En̄in ej em̧m̧aan eo me enaaj bōk eddoin tireep eo juon n̄an Arizona.”¹⁷

Jemaron̄ aolep keememej elōn̄ alen n̄e jej ioon men ko reppen im bar jar—im kōjeraam̧m̧an ko rej itok. En̄jake ko an Michael im Marian Holmes rej kwaļo̧k pedped in katak kein. Komro Michael eaar jim̧or jerbal ippān doon āinwōt Eria Jiljilimjuonn̄oul. Aolep iien ij m̧ōņōņō n̄e rej kūr e bwe en jar ilo kweilo̧k ko am̧ kōnke mour in jetōb eo an eļap im pidodo n̄an loe; eaar jeļā kilen kōnono ippān Anij. Em̧m̧an aō ron̄ an jar. Ilo jinoin m̧are eo aer, ijoko, Michael im Marian raar jab jar ak etal im jar. Raar lukkuun boub ippān ajri ro jilu nejier im juon kombani in jikin jerbal. Michael eaar en̄jake bwe ejjab juon em̧m̧aan in jar. Juon joteen, bisop eo aer eaar etal n̄an m̧weeo m̧weer im kar rōjan̄ er n̄an jino jar.

Ālkin an bisop eo etal, Michael im Marian raar pepe ke rej aikuj kajjieon̄ in jar. M̧okta jen kiki, rej bukwelōlō iturin jikin kiki eo aer, im, an nana tabm̧win, Michael eaar jinoe. Ālkin jejjo̧ naan in jar, Michael eaar bōjrak, im ba, “Marian, ijjjab maron̄ kōm̧m̧ane.” Ke eaar jutak im jino tin etal, Marian, eaar jibwe pein, bar kabukwelōlōiki, im ba, “Mike, komaron̄ kōm̧m̧ane. Bar kajjieon̄!” Kōn kapilōk in, Michael eaar kam̧ōj juon jar ekadu.

Holmes ro rekar jino emakijkij aer jar. Raar bōk karuwainene eo jen juon eo riturueer n̄an etal im jar. Ke rej deļo̧n̄e im̧ōnjar eo im ron̄ al in kōppeļļo̧k eo, Jetōb eaar unoojdikdik n̄an er, “En̄in m̧ool eo.” Tokālik, ijeļo̧kkin kajjitōk ak an ro jet kile, Michael eaar jipan̄ būki kopej ko jān im̧ōnjar eo. Ke eaar kōm̧m̧ane, eaar en̄jake juon im̧we ekajoor, “En̄in Mweeo Im̧ō.”

Michael im Marian rekar bōk kūr ko an Kabun̄ in im kar jerbal ilo ward im stake eo aer. Raar liāp n̄an doon, im ajri ro 3 nejier raar liāp n̄an er. Eaar bar wōr nejier, im kar oraņ in 12. Holmes ro raar jerbal āinwōt mijen būreejtōn—ruo alen.

Jar eo jinoin ekar dik ak eaar kōm̧akūt jerbal in tōmak me eaar letok kōjeraam̧m̧an ko an lan̄. Holmes ro raar ankane kijeek in tōmak eo ilo aer etal n̄an jar im kōm̧m̧ani kūr eo aer. Aer wūjļepļo̧k ilo iiō ko eaar kajoor im im̧we n̄an rainin.

Juon kijeek, eaikuj bōk ak kajoor jen kane ko n̄an kwaļo̧k an lukkuun kajoor. Āinwōt kōmeļeļein jen Michael im Marian Holmes, tōmak ilo Kraist ebōk jerbal bwe kijeek en urur wōt. Jerbal ko reddik rejipan̄ ad maron̄ etetal ilo iaļen bujen in n̄an tōl ļo̧k n̄an kōjeraam̧m̧an eo eļap Anij emaron̄ letok. Bōtaab kajoor eo ej itok wōt eļan̄n̄e jej kajjieon̄ wōnm̧aanļo̧k wōt. Jet iien jej aikuj in kōm̧m̧ane juon lippen ak m̧ade m̧okta jen an revelesōn itok ilo ad aikuj kakijen¹⁸ Jet iien jej aikuj in kepooj kein jerbal ko m̧okta jen an revelesōn itok n̄an kwaļo̧k kilen ad jek juon wa.¹⁹ Jet iien, ilo tōl an rikanaan eo an Irooj, jej aikuj in iiōke jidik kāāk jān jidik oil im pilawā n̄an ad bōk eļap jen jon̄an oil im pilawā.²⁰ Im jet iien jej aikuj in “ikōn̄ wōt im jeļā bwe [Anij ej] Anij” im leke An karōk.²¹

N̄e kwoj bōk jabdewōt kōjeraam̧m̧an jān Anij, komaron̄ kōjem̧ļo̧ke ke kwaar jerbale ippān kakien ko an indeeo me rej kien kōjeraam̧m̧an eo.²² Ak keememej bwe “jon̄ak indeeo” kien ejjeļo̧k jemļo̧kin, meļeļein kōjeraam̧m̧an ko rej itok ilo karōk an Anij. Bar rikanaan ro etto ro rej pukot mejen kajjik eo aer²³ “raar mej ilo tōmak, raar jamin bōk menin kallim̧ur ko, a raar loi jān ettoļo̧k… [im] raar tōmak … im raar mour kaki”²⁴ Eļan̄n̄e juon kōjeraam̧m̧an jān Anij ejjan̄in waļo̧k—em̧ool—kwojjab aikuj in ļōmņak, ta eo kwoj aikuj kōm̧m̧ane. Ijoke, ron̄jake kapilōk in an Josep Smith n̄an “m̧ōņōņō ko im rej pād ilo kajoor eo [am̧] … n̄an jutak pen, kōn jeļā ekanooj dim, n̄an lo … lo̧mo̧o̧r an [Anij] … kwaļo̧k.”²⁵ Jet kōjeraam̧m̧an rej waļo̧k tokālik, em̧ool n̄an ro rekajoor nejin Anij.²⁶

Jiljino allōn̄ rem̧ootļo̧k, pedped wōt ilo m̧weeo, rie Kabun̄ in kar peek n̄an ekkatak katak ko, kōkajoorļo̧k tōmak, im ļōn̄aj kajjojo im baam̧le ko kar kwaļo̧k kadkad in. Būreejtōn Russell M. Nelson eaar kallim̧ur bwe oktak in emaron̄ jipan̄ kōj anjo̧ ilo mour in jetōb, kōļapļo̧k m̧ōņōņō eo ad ilo gospel in, im kapen ļo̧k oktak eo ad n̄an Jemedwōj Ilan̄ im Jisōs Kraist.²⁷ Ak ej ad pepe n̄an būki jeraam̧m̧an kein. Ej ad kajjojo eddo n̄an kōppeļļo̧ke im ekkatak Itok Ļoor Eō—N̄an Kajjojo Armej im Baam̧le ko, ippān ļo̧k jeje ko rekwojarjar im ko jet Itok, Ļoor Eō kein katakin ko.²⁸ Jej aikuj kōnono kaki ippān baam̧le eo ad im ro m̧ōttad im ejaake meram eo ad ilo Raan in Jabōt āinwōt juon kijeek. Ak jemaron̄ likūt kein katak kein ilo m̧ōko im̧ōd bwe ren pād bajjōk im kowaan aorōk eo ilowaer.

Ij karuwaineneik kom̧ ro retiljek n̄an bar kōkāāl kajoor an lan̄ n̄an būki kōjeraam̧m̧an ko rekkar jān Anij. Kōjerbal tōmak n̄an kaurur kijeek in. Dāpij wōt tōmak ilo am̧ kōttar Irooj. Kōn karuwainene in, ij jar bwe Jetōb Kwojarjar enaaj tōl im im̧we eok, bwe kwon, āinwōt armej eo etiljek kar kōmeļeļeik ilo Jabōn Kōnnan Ko, enaaj “elōn̄ menin jeraam̧m̧an ko.”²⁹ Ij kam̧ool bwe Jemedwōj Ilan̄ im Nejin Jitenbōro, Jisōs Kraist, remour, rej n̄ūrbōktak kōn ami aikuj, im kōņaan kōjeram̧m̧an kom̧, ilo etan Jisōs Kraist, amen.

Kakeememej ko

1. Lale Katak im Bujen ko 41:1; 78:17; 104:33.

2. Lale, n̄an waanjon̄ok, Craig Harline, A World Ablaze: The Rise of Martin Luther and the Birth of the Reformation (2017), 20. Kain aitwerōk rot in ekar kōtaan Augustine (AD 354–430) im Pelagius rijumae eo an (AD.354–420). Pelagius eaar kwaļo̧k bwe “humans certainly [had] it inside them to do good, and that they earned God’s grace by acting on that goodness and keeping all of God’s commandments.” Augustine ejjab errā. Bar lale Eric Metaxas, Martin Luther: The Man Who Rediscovered God and Changed the World (2017), 296. Luther eaar katakin bwe jerbal ko remaron̄ jab tōl ļo̧k n̄an jouj an Anij, tōmak ej tōl ļo̧k n̄an jouj im jerbal ko rem̧m̧an rej waļo̧k; “Emenin pen n̄an kōjepel jerbal jān tōmak, āinwō t an pen n̄an kōjepel meram̧ jān kijeek.”

3. Lale Katak im Bujen ko 82:10.

4. En̄in ej juon mājet in kāām, a “iti jabdewōt jikin” mājet. Mājet ko raan kein, āinwōt mājet in jikin kōmat, elōn̄ aer make jikin kejjo̧ ijeļo̧kkin kein kejjo̧ eo ioon aļaļ in mājet eo.

5. Jerbal kein ekitbuuj “kōkāāl kajoor” n̄an kijeek eo. Naan in “activation energy” was introduced in 1889 by the Swedish scientist Svante Arrhenius.

6. Lale Lectures on Faith (1985), 3.

7. Lale David A. Bednar, “Ask in Faith,” Liahona, Māe 2008, 94.

8. Lale Mosaia 2:24–25.

9. Lale Bōnbōn 21:6–9.

10. Lale 1 Nipai 17:41.

11. Lale 1 Nipai 17:42.

12. Katak im Bujen ko 130:20–21.

13. Lale 2 Nipai 10:24; 25:23.

14. Lale Alma 60:11, 21; Dallin H. Oaks, “Small and Simple Things,” Liahona, Māe 2018, 89–92; M. Russell Ballard “Be Anxiously Engaged,” Liaona, No̧b. 2012, 29–31.

15. Lale Baibōļ Tikjinede, “Prayer”; bar lale Moronai 7:48.

16. Lale Alma 36:18–21; bar lale Enos 1:5–8.

17. Daniel W. Jones, 40 Years Among the Indians (1960), 222.

18. Lale 1 Nipai 16:23.

19. Lale 1 Nipai 17:9.

20. Lale 1 Kiin̄ ro 17:10–16.

21. Katak im Bujen ko 101:16.

22. Lale Katak im Bujen ko 130:20-21.

23. Lale Hibru 11:16.

24. Hibru 11:13.

25. Katak im Bujen ko 123:17.

26. Lale Jeffrey R. Holland, “An High Priest of Good Things to Come,” Liaona, Jān. 2000, 42–45. Elder Holland eaar kwaļo̧k “Jet kōjeraam̧man ko em̧ōkaj aer itok, im jet rejjab itok m̧ae lan̄, bōtaab ro rej kautiej gospel eo an Jisōs Kraist, rej itok, they come.”

27. Lale Russell M. Nelson, “Naan in Kōppeļļo̧k ko,” Liaona, Nob. 2018, 6–8.

28. Lale Quentin L. Cook, “Deep and Lasting Conversion to Heavenly Father and the Lord Jesus Christ,” Liaona, No̧b 2018, 8–12.

29. Jabōn Kōnnaan Ko 28:20.