Jidimkij in Em̧m̧an eo An Anij
Men̄e jej kijenmij ilo kōttar Irooj, ewōr jet kōjeraam̧m̧an rej itok n̄an kōj ilo jidimkij.
Jet iiō ko remootļo̧k, ļaddik eo nejim ļalem an iiō eaar itok n̄an ippa im ba, “Baba, em̧ōj aō kōļmenļo̧kjeņ kōn juon men. Em̧ōj aō jeļā bwe m̧ōttad jidik n̄an kwe elukkuun to n̄an n̄a.”
N̄e Irooj im rijerbal ro an rej ba men kein, “Jab lōn̄ raan ko” ak “iien eo ej jab ettoļo̧k,” emaron̄ meļeļein mour n̄an mej ak aetokļo̧k.1 Iien eo An, ekkā wōt karōk eo An, eoktak jen ko ad. Kijenmej ej kii. N̄e ejako, jejjab maron̄ eddōkļo̧k ak kwaļo̧k tōmak ilo Anij n̄an mour im lo̧mo̧o̧r. Ak ennaan eo aō rainin ej bwe, men̄e jej kijenmij ilo kōttar Irooj, ewōr jet kōjeram̧m̧an rej itok n̄an kōj ilo jidimkij.
Ke Rileman ro raar kalbuuj Alma im armij ro an, raar jar n̄an anemkwoj. Raar jab m̧ōkaj in anemkwoj, bōtaap ke rej kijenmij in kōttar anemkwoj, Irooj eaar kwaļo̧k Em̧m̧an eo an kōn jet kōjeram̧m̧an ko rejidimkij. Eaar m̧ōkaj in kapidodoik buruon Rileman ro bwe ren jab man er. Eaar barāinwōt kōkajoor armij ro an Alma im kōmeraik eddo ko aer.2 Ke raar anemkwoj, raar em̧akut n̄an Zaraemļa, ijo raar kwāļo̧k bwebwenato in men ko raar iooni n̄an ro raar ron̄jak im ļo̧kjenaer. Armej Zarahemla raar ļo̧kjenaer, im “ke raar ļōmņak kōn jidimkij in em̧m̧an an Anij im An kajoor ilo lo̧mo̧o̧ren Alma im ro jein im jatin jān pein riLeman ro im jān … kōm̧akoko, raar kotak ainikier im leļo̧k kam̧m̧oolol n̄an Anij.”3
Jidimkij in em̧m̧an eo an Anij ej itok n̄an aolep ro rej kūr n̄an E kōn lukkuun m̧ool in juon bōro eo eobrak kōn un. Mennin ekoba ro rej jan̄ ļo̧k ilo lukkuun aikuj, n̄e anemkwoj āinwōt ke elukkuun ettoļo̧k im en̄taan einwōt ej wōnmanļo̧k wōt, aaet ej ļapļo̧k.
Kar waļo̧k ippān juon rikanaan edik eo eaar en̄taan eļap ilowaan jikin kalbuuj mokta jān lamōj ļo̧k: “O Anij, kwo pād ia? … Ewi toun naaj an Peim tōt wōt … ? Aaet, O Irooj, ewi toun … ?”4 Ilo an uaak, Irooj eaar jab m̧ōkaj in kaanemkwoj Josep, ak eaar m̧ōkaj in kwaļo̧ak aenōm̧m̧an.5
Anij eaar barāinwōt m̧ōkaj in leļo̧k kōjatdikdik n̄an anemkwoj eo ej itok wōt.6 Jekdoon ta, jekdoon ia, ilo Kraist im jān Kraist aolep iien kōjatdikdik ej meram im̧aad.7 Em̧ōkaj im̧aad.
Barāinwōt, Eaar kalim̧m̧ur, “Aō jouj ejjamin jako jen kom.”8
Eļaptata, iakwe eo an Anij em̧ōkaj. Ippanļo̧k Paul, n̄aij kam̧ool ke ejjeļo̧k jabdewōt emaron̄ “kōjepel kōj jān iakwe eo an Anij, eo ej ilo Kraist Jisōs.”9 Ilo jerawiwi ko ad, mekarta remaron̄ kōjepel kōj jān Jetōb eo An ilo jidik iien, eban kōjepel kōj jān ikutkut im jidimkij in An iakwe indeeo.
Erkein jet iaļ im wāween ko me “E ej kōjeraam̧m̧an [kōj] m̧ōkaj.”10 Kiō, n̄an bōktok katak kein rekāāl im epaak, n̄aij kwaļo̧k juon en̄jake kōn ruo armej me mour ko aer rej jutak āinwōt kallim̧ur ko kōn jidimkij in em̧m̧an an Anij.
Jān eo iien eo ej juon jodikdik, Emilie eaar m̧ōjno ilo kōjerbal uno ko rekajoor. Edjon̄ eaar tōl n̄an imminene, me eaar pen ļo̧k im erom̧ juon an̄ūrlep me kar kalbuuji ium̧win iiō, mekarta iien ko rem̧m̧an. Emilie eaar lukkuun nooj būraapļōm̧ eo an, eļaptata ālkin an kar juon lio pālele im juon jinen.
Jinoin an deor jān wāween eo ekar jab en̄jake an em̧m̧anļo̧k. Juon minit, Emilie ekar kōm̧m̧ane etale in ājmour eo an, iien eo juon, kar ettōr kake ilo waan rinan̄inmej n̄an mōn lale rinan̄inmej. Eaar jino ikumkum ke ej kōļmenļo̧kjeņ kōn jepelļo̧k jān ajri ro nejin, ļeo pāleen, m̧weo im̧ōn.
Bon̄en eo, ajimakeke ilo mōļo, Emilie eaar nokjek ioon kineen im jan̄. Kajoor eo an n̄an kajjitōk eaar jako m̧ae, ke obrak kōn inepata, leln̄on̄, im marok in ruum eo an im jetōb eo an. Emilie eaar lukkun ļōm̧ņak enkar jako wōt bo̧n̄en eo. Make iaan.
Ilo an lukkuun aikuj, ilo juon wāween Emilie eaar maron̄ kajoor n̄an jerkak jān kineen im jupukwe. Ilo an jab kajejjōt jekjek in an jijōt āinwōt ilo an jar moktaļo̧k, eaar kajju kōtļo̧k an make n̄an Irooj im akweļap, “Anij jitōnbōro, Ij aikuj Eok. Jouj im jipan̄ eō. Ijjab kōņaan make iaaō. Jouj im bōkļo̧k eō jān bon̄ōnin.”
Im jidimkij in wōt, āinwōt An kar kom̧m̧an n̄an Pita eo m̧okta, Jisōs eaar erļo̧ke Pein im dāpij jetōb eo an.11 Kar itok juon aenōm̧m̧an, kajoor, im iakwe ioon Emilie. Eaar ejeļo̧k ruum̧ n̄an m̧ōļo, eaar jab make, im kein kajuon jān ke kar 14 an iiō, Emilie ekar jeļā aolep men renaaj em̧m̧an. Ke ej “rujļo̧k n̄an Anij”12 Emilie ekar kiki ļo̧k ilo aenōm̧m̧an. Im jej loe bwe “eļan̄n̄e kom̧ naaj ukeļo̧k im jab kapene būruōmi, ejidimkij an naaj karōk in lo̧mo̧o̧r eļap itok n̄an kom̧.”13
Deor eo eļap im an Emilie mour ekar bōk juon iien eaitok—allōn̄ in kōmourur, ekkatak, im kapilōk, ilo iien in me kar lelōn̄ļo̧ke im jet iien ineeke kōn jidimkij in em̧m̧an eo An. Im em̧m̧an eo eaar etal wōt ippān ilo an kar deļo̧n̄e tam̧peļ ippān ļeo pāleen im ajri ro ruo nejin n̄an liāp ippān doon n̄an indeeo. Āinwōt armej in Zaraemla ro, Emilie ej kiiō kam̧m̧oolol ilo an kōļmenļo̧kjeņ kōn jidimkij in em̧m̧an an Anij im kajoor eo An n̄an kōrōļo̧k e jān kōm̧akoko.
Kiiō, jān mour eo an bar juon ritōmak ekajoor. Ilo Tijem̧ba 27, 2013, Alicia Schroeder eaar m̧ōņōņō in karuwaineneik ro m̧ōttan, Sean im Sharla Chilcote, ro jab kōtmene ke ren kar jutak ilo kōjem̧ eo an. Sean, eo kar an Alicia bisop, kar leļo̧k cellphone eo nejin n̄an liin im ba, “Alicia, kōmij iakwe eok. Kwoj aikuj in uwaake taļboon in.”
Ļeo pāleen Alicia, Mario, ej pād ilo ļain in taļboon eo. Eaar pād ilo juon jikin emake iaan ippān jet iaan ajri ro nejier ilo juon tūreep in ettōr ilo jiņo̧. Eaar wōr juon jōrrāān. Mario eaar lukkuun jōrrāān, im ļaddik eo nejier 10 an iiō, Kaleb, emej. Ke Mario ej jiron̄ Alicia kōn mej eo an Kaleb, eaar obrak kōn ilbōk im būrom̧ōj eo jejjo ban kōtmāne. Eaar kookjak e. Kar jaje m̧akūtkūt kōn liejļōļ, Alicia eaar jab maron̄ kōnono ak m̧akūtkūt.
Bisop im Sister Chilcote kar m̧okaj in kotake e, im atbokwoje. Raar jan̄ im būrom̧ōj ippān doon ilo jidik iien. Innām Bisop Chilcote eaar kajjitōk an leļo̧k kōjeram̧m̧an n̄an Alicia.
Ta eo eaar waļo̧k tokālik jab maron̄ meļeļe ijjelo̧kin ad jeļā kōn Pinmuur eo an Jisōs Kraist im jidimkij in em̧m̧an eo an Anij. Bisop Chilcote eaar likūt pein ibōran Alicia im, kōn ainikien wūdidid, kar jino kōnono. Alicia eaar ron̄ ruo men āinwōt n̄e Anij ekar kōnono. Kein kajuon, eaar ron̄ etan, Alicia Susan Schroeder. Innām eaar ron̄ an bisop eo owar e maron̄ eo an Anij Kajoor Bōtata. Ilo iien eo—ilo kar ke ej ron̄ etan im kōn Kajoor an Anij—Alicia eaar obrak kōn aenōm̧m̧an im iakwe eo epen kōmļeļeiki, barāinwōt lan̄lōn̄. Im eaar wōnm̧aanļo̧k ippān.
Kiiō, aaet, Alicia im Mario, im baam̧le ko aerro rej būro̧m̧ōj wōt im o̧n̄ kōn Kaleb. Menin e epen! Jabdewōt iien n̄aij kōnono ippān, mejen Alicia ej kemjaļaaļ ilo an kwaļo̧k n̄an eō jon̄an an iakwe im o̧n̄ kōn ļaddik eo nejin. Im mejen ej toor wōt ilo an kwaļo̧k n̄an eō kōn Rikanemwkoj eo Eļap kar lelōn̄ļo̧k e ilo aolep wāween, ijjino ilo jidimkij in em̧man eo An ilo kar būrōm̧ōj eo an em̧wilaļ im wonmanļo̧k wōt kio kōn kōjatdikdik in bar ioon doon eo me “Ejjab lōn̄ raan ko.”
N̄aij kile bwe en̄jake ko an mour jet iien rej boktok inepata im ļōkapokpok me remaron̄ kōm̧m̧an bween pen bōk ak kile ak dāpiji kain en̄jake in anemkwoj in me kar itok n̄an Emilie im Alicia. Emōj aō kar bar pād ilo jekjek rot ņe. N̄aij kam̧ool bwe, ilo iien rōt kein, kōjpārok eo ad ej juon kam̧ool em̧m̧an im kajoor kōn jidimkij in em̧m̧an an Anij. Keemeemej, Israel eo etto ekar anemkwoj “jān ejja Anij eo wōt eaar kōjpārok er”14 raan n̄an raan.
N̄aij kwaļo̧k kam̧ool bwe Jisōs Kraist ej Rikanemkwoj Eļap, im ilo Etan, n̄aij kallim̧ur bwe ilo am oktak ļo̧k n̄an E ilo m̧ool im bōro ettā, Enaaj kanemkwoj eok jān aolep men me renaaj kamijak n̄an kakure am mour ak m̧ōņōņō. Kanemkwoj in emaron̄ bōk eļapļo̧k iien jān am̧ kōņaan—emaron̄ mour n̄an mej ak aetokļo̧k. Kōn menin, n̄an lewaj aenom̧m̧an, im kōjatdikdik, n̄an lelōn̄ļo̧k im kōkajoor eok n̄an raan in anemkwoj eo, n̄aij kam̧ool n̄an kwe kōn jidimkij in em̧m̧an eo An Anij ilo etan Jisōs Kraist, amen.