Kwojkwoj ioon Naan ko an Kraist
Kwojkwoj ioon naan ko an Kraist emaron̄ waļo̧k ilo jabdewōt iien im ilo jabdewōt m̧akūtkūt eļan̄n̄e jej kōpooje būruwōd.
Jemedwōj Ilan̄ ej iakwe kōj. Ekar letok juon karōk ewāppen n̄an lan̄lōn̄ kōn kōjeraam̧m̧an ko An. Ilo mour in, kar kajjitōk ippād n̄an itok n̄an Kraist im bōk gospel eo an Jisōs Kraist ekar jepļaaktok kōn peptaij, bōk menin letok eo an Jetōb Kwojarjar eo, im tiljek mour kōn gospel eo. Nipai ej kōmeļeļeiki kallim̧ur eo ad n̄an peptaij ilo ad deļo̧n̄e juon, “iaļ in erānin̄ im eaidik,” im ej kakeememej kōj n̄an wōnm̧aanļo̧k im “bun̄ m̧aanļo̧k kōn dim ilo Kraist, … kwōjkwōj ioon naan an Kraist, im niknik n̄an jem̧ļo̧kin,” n̄an ad maron̄ bōk aolep kōjeraam̧m̧an ko Jemedwōj Ilan̄ ekar kōjparoki n̄an kōj (2 Nipai 31:19–20).
Nipai ej bar kakeememej kōj bwe eļan̄n̄e jenaaj “kwojkwoj ioon naan ko an Kraist,” er “renaaj jiron̄ [kōj] aolep men ko [jej] aikuj kōm̧m̧ani” (2 Nipai 32:3) im bwe jenaaj bōk kajoor n̄an anjo̧ jān “m̧ade kijeek ko an rikapo eo” (1 Nipai 15:24).
Ta in Kwojkwoj?
Ke ikar dik, ikar ļōmņak bwe kwojkwoj ej n̄e jej m̧ōn̄āik juon m̧ōn̄ā ekilep ewōr rice, sushi, im joiu ie. Kiiō ijeļā kwojkwoj eo em̧ool eļapļok jān baj lan̄lōn̄ kōn juon m̧ōn̄ā enno̧. Ej juon en̄jake em̧m̧an, kōketak, lem̧ōņōņō, leto letak, kwaļo̧k iakwe n̄an baam̧le ko im ro jej iakwe, kōnono kōn kam̧m̧oolol eo ad n̄an Anij, im kalōk jem̧jerā ko ad ko jej m̧ōņōņō kōn aer ļap, im m̧ōn̄ā ko renno̧. Ij tōmak bwe n̄e jej kwojkwoj ioon naan ko an Kraist, jej aikuj in ļōmņak kōn kain ejja en̄jake rot in. Kwojkwoj ioon jeje ko rekwojarjar ejjab baj riiti wōt. Ej aikuj bōktok n̄an kōj lan̄lōn̄ eo em̧ool im kalōk jem̧jerā eo ad ippān Rilo̧mo̧o̧r eo.
Bok in Mormon eo ealikkar an katakin menin. Keememej ettōņak eo an Liai ijo me ekar lo juon wōjke “eo leen [ej] lukkuun kaijoļjoļ n̄an kam̧ōņōņō jabdewōt. Leen in ej bōk jikin iakwe eo an Anij, im āinwōt an Liai nemak leen eo, “eaar kanooj … tōn̄al, ilōn̄ in aolep ko [eaar] edjon̄i m̧okta.” Ej “kobrak [aō] kōn eļap otem ļap lan̄lōn̄” im ej juon men eo ekōņaan kwaļo̧k ippān baam̧le eo an (1 Nipai 8:10–12).
N̄e jej kwojkwoj ioon naan ko, jenaaj barāinwōt pukot wōņāān ak kain m̧ōn̄ā ko remaron̄ jab lukkuun aorōk ippād eļan̄n̄e būruwōd rej obrak kōn kam̧m̧oolol. Baam̧le eo an Liai rekar mour kōn kanniōk ko rekood ilo āne jam̧dān, Ak Nipai ekar kōmeļeļeiki mālijjon̄ in epen, ba, “Eaar ļap kōjeraam̧m̧an ko an Irooj” bwe “kōrā ro am … raar kajoor” “im kar maron̄ ilo̧k ilo iaļ ko aer ilo ejjeļo̧k ellotaan” (1 Nipai 17:1–2).
Kwojkwoj jet iien ekitbuuj ekkatak kake im nemake. Alma ej katakin kōn juon ine em̧m̧an em̧ōj karōke ilo būruwōd. Ilo ad ekkatak kake, jenaaj kile bwe ine eo ej jino “in kaijoļjoļ” (lale Alma 32:28–33).
Kwojkwoj ioon Naan ko an Kraist
Kōjeraam̧m̧an kein an kwojkwoj ioon naan ko an Kraist rej kajoor im ukōt mour. Ewōr jilu baj men ko ikōņaan kajjitōk ippem̧ n̄an mour kaki ilo mour eo am̧.
Juon, naan ko an Kraist remaron̄ jipan̄ kōj “kōļapļo̧k [maron̄] eo ad ilo jetōb n̄an bōk revelesōn” (Russell M. Nelson, “Revelesōn n̄an Kabun̄ eo, Revelesōn n̄an Mour ko Ad,’ Liaona, Māe 2018, 96) im kōjparok ilo tōlļo̧k kōj ilo ad mour. Mormon ej katakin bwe naan ko an Kraist ewōr ie “ļap an̄in n̄an tōl armej ro n̄an kōm̧m̧ane men eo [ejim̧we],” im bwe eļapļo̧k aer kajoorļo̧k jān jabdewōt “jāje ko” maron̄ kōttōbraki (Alma 31:5). Ke ikar kappukot māletlet eo an Anij ilo aō jelm̧ae apan̄ ko aō make, aolep iien ilo aō kajjieon̄ “wanōk eo an naan eo an Anij” (Alma 31:5), Ikar en̄jake im̧we im maron̄ eo n̄an kōm̧m̧ane jokālet ko remāletlet, anjo ioon mālijjon̄ ko, im kōjeraam̧m̧an mour eo aō kōn eļapļo̧k tōmak ilo Kraist im iakwe n̄an ro ipeļaakū. Rikanaan eo ad, Russell M. Nelson, ekar katakin kōj bwe “ilo raan kane rej itok, enaaj pen ad jo̧o̧r ilo jetōb ilo an ejjeļo̧k tōl, jineet, kaenōm̧m̧an, im kareel ko aolep iien jān Jetōb Kwojarjar eo” (“Revelation for the Church, Revelation for Our Lives” (“Revelesōn n̄an Kabun̄ eo, Revelesōn n̄an Mour ko Ad,” 96). Revelesōn eo jaikuji renaaj itok ilo ad kajjieon̄ “wānōk eo an naan eo,” im bwe naan in enaaj ļapļo̧k an kajoor jān jabdewōt men jemaron̄ kajjieon̄ ak ļōmņake.
Ruo, n̄e jej kakkōt wōt kōn kadkad eo ad make im ejjeļo̧k ad laudin̄din̄ kake, “naan e jouj an Anij” (Jekab 2:8) ilo eoon in enaaj jipan̄ kōj jeļā wōn lukkuun kōj im letok n̄an kōj kajoor eo eļapļo̧k jān kajoor eo ad. Kile kadkad eo aō āinwōt ajri eo nejin Anij ekar juon iaan iien ko ralijaļļo̧k ikar en̄jake. Ilo iiō in jodikdik ko aō jinotata, ikar jab jeļā jabdewōt kōn katak ko an Rilo̧mo̧o̧r eo. Ke ikar jinointata riiti Kallim̧ur Ekāāl, naan ko an Kraist rem̧ool rekar kamo kinej in jetōb eo aō. Ikar kile bwe ikar jab make iaaō im bwe n̄aij juon ajri nejin Anij. Ke ij kile kadkad eo aō em̧ool im̧aan Anij, ikar kile jeraam̧m̧an eo aō eļap kōn Pinmuur eo an Kraist.
Inōs ekar barāinwōt kwaļo̧k en̄jake eo an make kōn meļeļe eo em̧m̧an ej itok jān ļōmņak kōn naan ko an Kraist. Āinwōt an Inōs kōtļo̧k bwe naan ko me jemān ekar katakin e kōn “mour indeeo, im kōn lan̄lōn̄ an ro doon, [raar deļo̧n̄] ilo m̧wilaļ [in] būruwōn,” an ekar “ean̄den; im [eaar] bukwelōlō im̧aan [an] Rikōm̧anm̧an … ilo jar ekajoor” (Inōs 1:2–4). Ilo jar eo ekar jino jeļā Rilo̧mo̧o̧r eo im ekar ekkatak bwe kōj eļap ad aorōk, im iakwe im maron̄ jeorļo̧k ad bōd, im ilo m̧ool jej ajri ro nejin Anij.
Jilu, jemaron̄ kotak mour ko an ro jet kōn naan ko an Kraist. Āinwōt Inōs ekar wōr an make iien im jikin ijo me naan ko an Kraist rekar un̄ir būruwōn, Irooj enaaj kōm̧m̧ane ijo kuņaan n̄an un̄ir bōro ko an ro rekōņaan kwaļo̧k gospel eo. Elōn̄ iaad wōj rekar en̄jake ebbeer ke jekar kajjieon̄ karuwaineneik juon armej n̄an ron̄jake gospel eo kōnke kōņaan eo ad ekar jab ļoore. Mekarta ta eo ekar waļo̧k, Irooj ej karuwaineneik kōj n̄an kōppeļļo̧ke lo̧n̄iid im kwaļo̧k ennaan eo an gospel eo ippān ro jet.
Ruo iiō ko remootļo̧k, Irooj ekar un̄ir būruwōn jinō eo ejitōn bōro, im kar jipan̄ e kālet bwe en bōk kain̄i in peptaij eo. Ikar kōttar raan eo n̄an bōk jikin ium̧win enan̄in 35 iiō ko. Bwe en kōm̧m̧an kālet in, elōn̄ ro uwaan Kabun̄ in rekar jerbal in karejar n̄an e āinwōt Kraist enaaj kar. Juon Jabōt, ekar en̄jake ke eaikuj etal in jar. Ekar ļoor im̧we eo. Ke ekar jijet ilo jea ko im̧aan tata im kōttar an jinoe kwojkwoj eo, juon ļaddik emān an iiō ekar jutak im̧aan mejān im kalimjōke. Ekar iakweiakwe e kōn juon ettōn̄dikdik. Ļaddik jidikdik in ekar etal jān im̧aan mejān im etetal likļo̧k n̄an jea eo an make, eo ekar pād iturājet in ro eo me jinō ekar jijet ie. Ļaddik in edik ekar kotak juon men jān jea eo an im bar ro̧o̧ltok im leļo̧k n̄an jinō juon bok in al im bar ro̧o̧lļo̧k n̄an jea eo an. Jinō ekar kile juon bok in al emōj likūti ilo aolep tulikin jea ko ilo im̧ōnjar eo. Emaron̄ kar pidodo an bōke jān jea eo tok juon iturin. Ijoke, ekar lukkuun bwilōn̄ kōn jerbal eo erreo im jouj eo an ļaddik eo, eo ekar katak jān m̧weo im̧ōn im jān m̧ōnjar eo. Ekar lukkuun juon iien em̧m̧an n̄an e. Ekar bōk juon en̄jake ekajoor bwe Anij ekar karuwaineneik e n̄an itok im ļoor Rilo̧mo̧o̧r eo. Ekar en̄jake bwe ej aikuj peptaij. Ļaddik jidikdik in ekar jab pukot nōbar kōn ta eo ekar kōm̧m̧ane, ak ekar kōm̧m̧ane men eo em̧m̧an n̄an mour kōn naan eo an Anij im iakwe eo riturin. An jouj ekar kōm̧m̧ane juon oktak eaorōk ilo būruwōn jinō.
Naan ko an Kraist renaaj lukkuun un̄ir bōro ko im kōppeļļo̧k mejān ro rej jan̄in loe E. Ilo iaļ eo an n̄an Emmaus, ruo rikaļoor rekar etetal ippān Jisōs. Rekar būrom̧ōj im jab meļeļe bwe Rilo̧mo̧o̧r eo ekar anjo̧ ioon mej. Ilo aer lim̧ō, rekar jab kile bwe Kraist eo emour ekar etetal ippāer. Kōn menin Jisōs “ekar kōmmeļeļeiki n̄an erro ilo Jeje ko otemjej men ko kōn E make,” rejjab kile E āinwōt Rilo̧mo̧o̧r eo ejerkakpeje m̧ae iien rekar jijet im ruje pilaw Ippān. Innām “mejāerro” ekar peļļo̧k. Āinwōt kōj—ak ro m̧ōttad, rijerbal ro m̧ōttad, im ro riturir—kwojkwoj im ruje pilawe eo Ippān, mejān meļeļe eo ad renaaj peļļo̧k. Ke rikaļoor ro ilo Emmaus rekar kejōkļo̧kjeņ kōn iien eo aer ippān jerkakepeje Rilo̧mo̧o̧r, rekar ba bwe būruweer ekar bwil ilo er ke Ekar kōpeļļo̧k jeje ko n̄an er (lale Luk 24:27–32). Menin enaaj m̧ool n̄an kōj aolep.
Jem̧ļo̧k in
Ilo kajem̧ļo̧ke, ij kwaļo̧k naan in kam̧ool bwe kwojkwoj ioon naan ko an Kraist emaron̄ waļo̧k ilo jabdewōt iien im ilo jabdewōt m̧akūtkūt eļan̄n̄e jej kōpooje būruwōd n̄an būki. Kwojkwoj ioon naan ko an Kraist renaaj bōktok revelesōn eo ej rie mour, kapen kadkad eo ad em̧ool im aorōk im̧aan mejān Anij āinwōt ajri ro Nejin, im tōlļo̧k ro m̧ōttad n̄an Kraist im mour indeeo. In kakeememej naan kein jān Nipai ke ekar ba: “Kom̧ aikuj bun̄ m̧aanļo̧k kōn dim ilo Kraist, kōn juon kōjatdikdik emeram, im juon iakwe n̄an Anij im armej otemjeļo̧k. Kōn menin , n̄e kom̧ naaj bun̄ m̧aanlok, kwojkwoj ioon naan an Kraist,im niknik n̄an jem̧ļo̧kin, lo,āindein Jemān ej ba: Kom̧ naaj bōk mour indeeo” (2 Nipai 31:20). Ilo etan Jisōs Kraist, Amen.